الذ تاج من احلى شرين

التاج دة وصلى من شرين و بصراحة التاج لذيذ بجد

اتكلم عن نفسك فى عشر نقط

اولا

انسانه طموحة جدا و ساعات بشوف ان دة صح و ساعات بقول عليه غلط

بحب الشغل جدا جدا بحس انى جوايا طاقه كبيرة

لازم تستغل صح لانها ممكن تبقى بالنسبة ليا طاقه مدمرة

و على راى ماما

حاسة ان نهايتى مش هتبقى طبيعية

ثانيا

بحب الحب قوى مشاعر تضحية عطاء بلا حدود حاجات كتير

مهما كتبت عنها مش هعرف اوصفها

الذ حاجة ممكن اشوفها و انا ماشية

اتنين ماشيين مع بعض مسكين ايد بعض و باين عليهم الحب

و الحب اللى بحس بيه مش علشان مسكين ايدين بعضهم

بحسه اما الاقى الولد بياكل بعنيه البنت الى معاه

و بيبقى خايف عليها قوى و نفسه يخفيها من عيون الناس كلها

و البنت بلاقيها بتبصله بحب و امان و انها اكيد حاسة معاه بالحنان

يا بختهم

ثالثا

بحب البحر قوى قوى

بحب اما اكون مضايقة اروح مكان فيه بحر و اقعد قدامه و اكلمه و افضل اتكلم و اتكلم

و اسيب دموعى هى كمان تتكلم لحد ما الاقى نفسى هديت

بحب فيه كل حاجة ثورته و هدوءه بحب امواجه اما تضرب الشاطىء بحب قوى منظره بليل

و ساعه الشروق

و خاصه ساعة الغروب

بيهز فيا مشاعر غريبة

بس بجد جميله قوى

رابعا

اعترف انى ساعات بسيب حقى

يمكن اكون بتكسف اطلبه

و يمكن كمان اكون مش محتاجاه و اسيبه بمزاجى

انما الى يغظنى قوى ان الى قدامك يتعود منك على كدة

او انه يحس بالانتصار انه اخد منى حاجة هو متهئيله انها غصب عنى

خامسا

ديما بحب ادى الامان لاى بنى ادم معايا

حتى لو عرفته لمرة واحدة

بحب ديما احسسه بالامان مش لاكتر من انى اصلا كدة

بحس ان اى حد اعرفه و معايا بقى مسؤول منى و لازم احميه من اى حاجة

او من اى موقف يتعرضله

بحس ان دة واجب عليا

و دى حاجاة تخنق , عارفه

سادسا

بموت فى حاجة اسمها مصر

بعشق ترابها بجد

بحب نيلها و جوها و نسيمها و بحرها

بحب كل حاجة فيها

و يا رب تبقى احسن بلد فى الدنيا

و هفضل وراها مش هسيبها

سابعا

بحب ديما اطور من نفسى

و بحب ديما اتعلم كل يوم جديد

و بسعد قوى اما بحس انى اتغيرت عن السنه الى قبلها

او انى بقيت اعقل من قبل كدة

بحب ديما ابص لفوق

و بحب ديما انى احلم و الاحسن و الى بعتبره ميزة و غيرى بيعتبره عيب

انى بحاول على قد ما اقدر احقق احلامى حتى لو كانت مستحيله

بحاول و ساعات بقدر و ساعات ربنا مبيردش

بس برجع احاول تانى

ساعات كتير بفشل فى حاجات

بس بحب ديما ارجع و اقعد مع نفسى و احاسبها و اشوف فين غلطاتى

و اظبط نفسى و استعد من تانى للمواجهة

و ارجع احاول من تانى و عادة بنجح و الحمدلله

الحمدلله مؤمنه انى اقدر اعمل اى حاجة فى الدنيا لو انا عايزة اعملها

بحس انى قدراتى ملهاش حدود و بحمد ربنا

ثامنا

ساعات بحس ان الصدق فىكل حاجة مش بيجب غير مشاكل بالنسبة ليا

لانى اتاكدت ان المجتمع الى احنا فيه فعلا بيصدر اوامر على البنت او الست

و بيحطلها حدود ظالمه و بيقولها متعديهاش

كنت ساعات كتير بضطر اخبى الحقيقة علشان

زى ما بيقولوا امشى حالى دة على المستوى الشخصى بس

و طبعا دة بيرجع ان الكل فاكرنى مجنونه

انما الحمدلله خلاص اتعودت انى بقول الى انا عايزاه

و اى حد يكلمنى اقوله انا كدة رانيا طبيعتها كدة

غير كدة بقول كلمه الحق فى اى موضوع و بحاول ابقى محايده بقدر الامكان

و بحب ديما لو اقدر اعمل حاجة تساعد فى اى موضوع او قضية او اى شىء

بعملها و اقول الحق و لا يهمنى

و ساعات بقول كلام رخم بيطلع منى كدة

بس و الله مش ببقى قصدة

بس الى قدامى اكيد بيضايق و اكيد لو مش عارف طبيعتى

و بحاول احاسب على كل كلمه تطلع منى و ربنا المعين

تاسعا

بعترف انى عصبية

بس عصبيتى دى زادت قوى فى الاوقات الاخيره من مواقف اتعرضتها

و كانت فى منتهى القسوة

بحاول اغير من نفسى

بحاول ابحث عن المثاليه

عارفة انى مش هوصلها بس على الاقل اكون قربت منها

بفكر كتييير جدا طول ليلى و نهارى بفكر فى حياتى

و ازى انى ممكن متحوجش لاى حد فى يوم بحب اعمل حسابى علشان

اما اتحط فى اى موقف اعرف اتصرف فيه

طبعا كل شىء بتاع ربنا

بس برتاح اما بعمل حسابى لاى ظرف مفاجىء او اى حاجة تحصل

ومشكلتى الاساسية و فى ناس بتعتبرها ضعف انى بفكر بقلبى كتير قوى

بفكر بعواطفى و دى مشكله فى الزمن الى احنا فيه دلوقت

و طبعا دة اثر كتير عليا فى حياتى الشخصية و العمليه

و اتظلمت كتير بسبب ده

عاشرا

بعتبر نفسى انسانه كويسة مش وحشة و حتى لو كنت عملت غلطات

مفيش انسان معصوم من الغلط و بعتبر نفسى مجنونه فى مشاعرى

طيبة و ممكن اكون بعرف اظهر الحب و الحنان الى جوايا

مش بعرف ابخل بيهم على اى حد اعزه او احبه

بعتبر نفسى بعرف افكر كويس و مع ان الكل بيقف ضدى فى افكارى او فى تصرفاتى

فدة انا بعتبره انى ماشية صح

مع العلم انى بفكر فى كل اعتراض بيتوجهلى و بحاول افكر فيه بالمنطق

عارفة انى رغيت و كتير

بس لو كان اتقلى اكتبى عشرين نقطة كنت كتبت اكتر

لسه فى حاجات كتير عايزة اكتبها عن نفسى

اختار خمسة و اديلهم التاج

يا مراكبى

عمار جرار

احمد سمير

قلب ينبض لله

ا ب ج د

لازم تبلغيهم

اكيد هيحصل

و مش ناوية ارجع التاج

للى بعتهولى تانى

طبيعى يعنى