Sunday, September 30, 2007

ابناء مصر

بجد ابناء مصر
انهاردة كنت فى افطار جماعى لابناء مصر فى الحسـين
و بجد مش عارفة اعبر عن سعادتى بوجودى فى وسط ناس
اقل ما يقال عليهم انهم بجد رائعين بكل معانى الكلمه
ناس فعلا بتحب مصر بجد
شوفت مجموعة من البناويت السكر بجد
و مجموعة من الشباب الواعد بردة بجد
اولا مها
صاحبه مدونه سكوت هنصوت
انسانه جميله و رقيقة و بجد رااااائعة سكر سكر يعنى
مريم صاحبه مدونه تخاريف فى المعادى سابقااا
اصلها قفلت مدونتها مش عارفة ليه
و شيماء مهدى انسانه مهذبة و هادية بحس جنبها انى نار انى دينمو.
:))
و بنوته تانية بردة اسمها كريمة بنوته ظريفة
اما بقى شمس صاحبة مدونه ربه السيف و القلم فجد بجد بجد انسانه فوق الرائعة
بنوته بس جدعة بجد
صاحبة مبدأ بجد
مصرية قوى قوى و بجد
و بردة فى شباب محترم جداااااا منذر صاحب مدونه حين البأس
و ابن ناصر شاب مخة بجد ملوش حل مصرى بحق
و الجيزاوى و يسارى و تامر هنتكلم
بجد انا مبسوطة انى عضوة فى ابناء مصر و يا رب نعمل حاجة
اةةةةةةةةةةة
نسيت
اكيد ليا تعليقى على مقابله انهاردة
انا لسه مقلتوش لمها
بس هقوله هناااااااااا
جميل قوى يا جماعة اننا نشترك فى حاجة واحدة
بس الاجمل اننا ننظم نفسنا علشان نكبر الحاجة دى
احنا كلنا مشتركين فى حب مصر
اما الى ناقصناااااااااااااااااا
هو النظام
ننظم افكارنا و نعرف احنا عايزين نعمل اييييييييييه؟
بس
و لو عملنا كدة هنعمل حاجات كتير قوى قوى لمصر
تحياتى لكم يا ابناء مصر

Saturday, September 29, 2007

المعادله

لقد انتصرت ارادة عمال المحله
واجبروا القيادات على تلبيه مطاليهم
اصروا على الرفض و الاحتجاج
وصمدوا فى وجه الظلم
و نجحوا و انتصروا
فهل هذة هى المعادله؟
اعتقد انها هى
اذا ما صمدنا و حاربنا للحصول على الحرية
سوف ننالها؟
الحرية الحقيقة و ليست المزعومة؟
اعتقد انه نعـــم
سوف ننالهااااااااا

Wednesday, September 26, 2007

فانى اتسأل

فانى اتسأل
ما هذا الذى يحدث على الساحة الان؟
اليس من الغريب و المريب هذه الاحدااث المتواليه التى تحدث فى مصرالان؟
اليست كلها تفضح النظام الحاكم و تؤيد نظرية المؤامرة على الشعب
و حريته و حقوقة الانسانية ؟؟؟؟؟؟
فما يحدث هذة الايام انما يثبت و يؤكد ان هناك خلل كبير فى هذا النظام
كيف يحدث هذا؟
مؤامرات كثيرة على الشعب تحدث فى هذة الفترة
مؤامرات على حرية الرأى و التى كان ينادى بها الرئيس
و يقول ان حرية الرأى مكفوله
فاين هذة الحرية؟
و قد تم احاله هذا العدد الكبير من رؤساء التحرير و الصحفيين الى السجون ؟
لقولهم كلمه حق
كيف ؟
هل هذة هى حرية الراى ؟
ام هى حرية التسلط فقط؟
ما يحدث للمصريين الان من تعسف و قهر و ظلم امر خطير لا يمكن السكوت عنه
ان ما فعله عمال غزل المحله خطوة فى طريق الحرية الحقيقة
وانا حقيقة احيى شجاعتهم ووقوفهم فى وجه الظلم ؟ و لكن ماذا سيحدث فى النهاية؟
هل سوف يحققوا مرادهم من الحرية و عدم التعسف ؟
هل سوف يحققون املهم ؟
و ماذا عن المصريين المعذبين فى الارض
نعم ,اعتقد انه سوف يقوم المؤلفون بتأليف كتاب
مسماه المصريون المعذبون فى الارض
ما هذا؟؟
قتيل هنا و هناك
شباب صغير
يقتل و تنهك كرامته لماذا يحدث هذاااااااااا؟
ماذا حدث لكى يا مصر؟
يا ام العروبة
ماذا حدث لك و لشعبك
اهذة هى النهاية؟؟؟؟؟
ام الله عز و جل كتب لك نهاية اخرى ؟؟؟؟؟
سنرى ماذا سيحدث
غدا يوم حافل بالاحداث
سوف يذهب مصريون لقول لا صريحة تشجب و تستنكر الاحداث و الاوضاع الراهنه
مظاهرات تندد بالتعذيب ضد المصريين على ايدى الشرطة الغادرة
مظاهرات من اجل حرية الصحافة
و حرية الراى
و التى لم يبق منها الا كلام معسول يقال فى المؤتمرات و اللقائات التليفزيونية
اما الحقيقة الواقعة فهى ليست حرية راى
انما عار وتعسف و تسلط و احتكار
اتسال ماذا سيحدث غدا ايضاا؟
هل سوف يحدث تعديل فى النظام المتبع؟
والتى تعتمد سياستة على التنكيل بكل ما هو حقيقى و جيد و حر و وطنى؟
وينجح هؤلاء المواطنين فى الحصول على حق بسيط من حقوقهم الا و هى الحرية؟
ام سوف يزداد القهروالظلم ؟
فحقيقة لا اعلم
و لذلك فانى اتسأل

Wednesday, September 19, 2007

فكرت فيها

انهاردة كان عندى امتحان ترجمة
روحته و انا بصراحة مليش نفس و لا حتى مزاج انى اترجم
و التكييف هنجنى, اصلى بتعب منه
المهم الامتحان كان طبعا شامل سياسة و اقتصاد و ترفيه و رياضة و الذى منه
بصراحة الامتحان دة كان عايزله كوبايه نسكافية جامدة
المهم
دة مش الموضوع الى عايزة اتكلم عليه
المهم فى الوقت الى كنت مهنجة فيه
و انا بترجم و عايزة اخلص, بقى دة غير
انى بقيت عايزة اضرب نفسى شوز و لا مؤاخذة انى روحته انهاردة
لقيت الترجمة السياسية
مقال للاستاذ بصراحة مش فاكرة اسمه تقريبا رفعت رشاد
المهم
كان المقال عنوانه رآى
رايه هو عن ثقافة الانتخابات فى الحزب الوطنى
و لقيت يا اخونا عنيا فتحت و مركزة مع المقال كلمه كلمه
بصراحة كلامه فكرت فيه و يعنى حسيت انه فى شىء من الصح
مش كله طبعا
المقال بيتكلم على ان الحزب الوطنى هو الحزب الوحيد الى بيعمل انتخابات
بينادى بالديمقراطية و بيعمل الانتخابات
بعيد بقى عن ان الانتخابات مزورة او حتى معروف نتيجتها مسبقا
الراجل اتكلم على ان الاحزاب التانية او المعارضة
الى ديما بتنادى بالديمقراطية
كلهم ناس قاعدين و متثبتين فى كراسيهم محدش عايز يسيب كرسيه لاحد القيادات الشابه
الى ممكن فعلا تدخل نظام و ثقافة جديدة للاحزاب
كل واحد عايز نفسة و بس
و بيكمل الاخ فى المقال ان الحزب الوطنى هو الحزب الوحيد الى دلوقت بينادى بثقافة الانتخابات
و بيضيف ان ممكن تبقى دى خطوة على طريق الديمقراطية الحقيقة
على طول يا اخونا جه فى دماغى الى حصل من فترة فى الحزب الناصرى
من خناقات و تزوير و اختفاء لكشوفات
فاكرين؟؟؟؟؟؟؟؟؟؟؟؟؟
فى مرة اتكلمت مع صديق من الحزب الناصرى محامى هو
قلتله انت فى حزبك بتنادى بايه؟
قالى بصى يا رون
احنا لو مسكنا البلد هنخليها زى ايام عبد الناصر هندى لكل واحد حقة
و هتعم الديمقراطية و الكلام الحلو الى كلنا عارفينه
رديت عليه على طول و قلتله
امال ايه بيحصل عندكوا دة فى الحزب؟
انا طبعا مش ضد الحزب
بس الى حصل و اختفاء كشوفات و خناقات مرشحين مع مرشحين
ضايقنى قوى
قلته يا متر انتوا لسه ممسكتوش الحكم و بتعملوا كدة فى بعض اومال اما تبسكوة هتعملوا ايييييييييه؟
دة كله بصراحة جه فى دماغى فى الامتحان
بتاع انهاردة
قلت احتمال فكرة او ثقافة الانتخاب دى فعلا فى المستقبل تعمل حاجة
تخلى الكل عندة استعداد للتطور و للديمقراطية الحقيقة
الى هى مش كلمه و بس
كل واحد بينادى بالديمقراطية يا ريت يراجع نفسة الاول طبعا بتكلم على الكل
هل هو ديمقراطى فعلا هل هو عندة استعداد انه فعلا يطور نفسة من اجل وطنه بجد؟
المهم
طبعا الوقت عدى و لا خلصت الامتحان و لا بتاع
و كل عام و انت بخير
:((

Friday, September 14, 2007

حديــث قدسى

سأل موسى ربه فقال
كيف تعامل من عصاك
فقال يا موسى من عصانى امهلته
فان فعل ذنبا ستـرته
فأن رجع الى قبـلته
فأن عاد الى ذنب انتظرته فأن تاب غفرت له
و احببته و لا خذلته
و الى نفســه وكلــته
حتى لا يكون بعبـــدى حــجة
و ما انا بظـــلام للعـــبيد

Sunday, September 9, 2007

الحاجة الساقعة بيبس

ايوة البيبسى
ايوة السفن اب
و بعدين فى موضوع ارتفاع الاسعار يا اخونااااااااااااا
انا زهقت
و بعدين يرفعوا الاسعار فى كل حاجة
انما ييجوا عند الحاجة الساقعة و يوقفوا بقى
بلاش دى كمان
اروح علشان اجيب كانز يقولى كل حاجة غليت
مش ممكن
و بعدين بقى ؟؟؟؟؟؟؟؟؟
روحت امبارح علشان اشترى حاجة ساقعة اصلى بحبها قوى
بموت فيها مش بعرف اعدى ساعتين من غير ما اشرب و
....................
بعدين هبقى احكيلكوا حكيتى
:))
المهم
يقولى البياع كل حاجة غليت و من اسبوع تقريبا
المهم
بدا الموضوع
اما فعلا الحاجة الساقعة غليت و بعدين ناس قالوا انها نزلت تانى
قلت لالالا طبعا
دى اكيد اشاعة اسعار ايه الى فى مصر بتطلع و تنزل تانى
اكيد طبعا مش ممكن
المهم
الراجل امبارح
فضل يحكيلى و يقولى
ان مصر الوحيدة الى عمرها ما بتنزل اسعار لو حاجة طلعت عمرها ما بتنزل
و قالى ان فى ديما ضريبة مبيعات ببتتاخد على كل حاجة
يعنى الحكومة الموقرة بتدى مرتبات الناس و تاخدها منهم من ناحية تانية
قالى علبه السجاير الى اى كلام
ب 2جنيه و نص
والحكومة بتاخد منها 1 و ربع
يعنى فعلا بتاخد مرتب الناس بس بمزاجهم مش لوى دراع يعنى
هو طبعا قلبلى دماغى بكلامة دة
و فضلت واقفة و متحمله و متغاظة و عايزة اقوله بس بقى وجعت بطنى
خلاص عرفه ان مصر فيها شوية حرامية
و تقريبا بردة هو قفل منى لانى قلبت عليه المواجع و افتكر الى بيحصل
هييييييييييييييه دنياااااااااااااااا
بس الى مضايقنى و تعبلى نفسيتى
غلو الحاجة الساقعة
بلاش دى
:(((

Monday, September 3, 2007

خلاص كدة؟

هو خلاص؟
خلاص كدة؟
الى بيحب مصر دلوقت لازم و لا بد يروح فى داهية
دلوقت بقى حب الوطن و الاحترام تهمة و نتعاقب عليها
ابراهيم عيسى
مش متفقة معاه فى حاجات
بس بصراحة و الحق يقال
انه راجل محترم
راجل محترم و بيحب مصر
و كفايه ان الجريدة بتعته من الجرايد المحترمة
فيها كلام صدق و حقيقة وواقـــع
مش رياء و نفاق زى ما بقية الجرايد الرسمية ما بتقول و لا بتعمل
ايه المشكله اما يلاحظ حاجة و يحاول ان يتكلم و يقول عنها ؟
انا مش صحفية.
بس الى اعرفه عن المهنه دى انها بترصد كل حاجة فى البلد
ان كانت سايسة او اقتصادية او حتى فنيــــــــة
ناس همهم البلد
عايزنها تكون فى احسن حال
بيكتبوا و يتكلموا و لو ربنا اراد كمان بيجيبوا حل
اشاعة موت الرئيس دى و الله اعلم ان كانت اشاعة او حتى حقيقة
لسه منعرفش
بس فعلا منتشرة و الناس كلها بتتكلم
و الى يقولك دة اصلا عندة المرض الوحش و التانى يقولك دة مات اكلينكيا
من فترة و مكتمين
و.... و..... و..... و..... و
يعنى اشاعة و منتشرة
الراجل كتب عنها و ناقشها و طلب ايضاح
ايه المشكله
بيتلككوا ليه؟
يا ما كان فى اشاعات
و الصحافة و الاعلام رصدوها و اتكلموا عنها ووضحوا
انها اشاعات و لا حقائق واقعة
و بالدلائل
حابين ياخدوا اى حد يقول كلمه حق ليه؟
معقوله الراجل دة كماااااااان
هيتسجن بتهمة زى دى؟
معقوله الدستور هيتقفل
معقوله
و تفضى الساحة للكلام الزيف و الرياء ؟؟؟؟؟؟؟؟
خلاص كدة؟