Tuesday, November 18, 2008

الكلام ده حقيقى و لا بجد

علشان انا مغيبه الايام دى عن الواقع المرير
نتيجة برد شديد
مش بشوف اخبار و لا بقرا حاجات كتيرة
بس من شوية دخلت على مدونه نوارة
لقيت خبر حلو قوى قوى
ان المحكمة الاداريه حكمت وقف تصدير الغاز للاسرائيل
بصراحة مصدقتش
روحت على الفيس بوك
لقيت كام خبر على نفس الموضوع
هو الموضوع ده فعلا حقيقى و خلاص الحمدلله
هنبطل نبيع حته حته مننا
و لا الموضوع كله علشان الشعب يتهد و يبرد زى كل مرة
بيقولوا ان الحكم مش نهائى و فى استئناف
ربنا يستر
بس بجد مبسوطة و قوى
مبروك يا مصر

Friday, November 7, 2008

فكر جديد


انه حقا لفكر جديد الذى تكلم عنه الرئيس مبارك فى خطابه الاخير لمؤتمر الحزب الوطنى الذى يراسه
و كما يبدو سيرئاسه للابد الابدين ,
فكانت كلماته كلها تدور حول فكر جديد و اسلوب جديد
. ما هذا الفكر الجديد الذى يتحدث عنه الرئيس ,
هل كان الفكر يتناول ما حدث لمقر حزب الغد ان تُتخذ البلطجة و اشعال النيران كفكر جديد للتوصل لحلول عادله
, و بعد هذا نرفع رايه القانون و نشكو الظلم .. كمثل الذى " ضربنى و بكى" , هل هذا هو الفكر الجديد
هل الفكر الجديد الان ان يُخرج الشباب السنتهم للقانون
بعد ان تم الحكم على شاب بالسجن ثلاثه سنوات فى قضيه تحرش
كانهم غير آبين بهذا الحكم و مازالت تتوالى قضايا التحرش و القتل , و مازالت الضحايا تتساقط
... هل هذا فكر جديدا يُطبق الان فى مصر البلطجة و الفساد و الاسفاف
يا له من فكر جديدا حقا ايها الرئيس
مبارك عليك الفكر و مبارك عليك و علينا كل هذا الدمار الذى تعيشه مصر .

Tuesday, October 21, 2008

احمر و ابيض .... مفيش اسود

احمر و ابيض .... مفيش اسود
امممممممممممممم
تقريبا هما مش حاسين بالاسود ده
فيلم هابط و لا بلاش اقول هابط اصلى متفرجتش عليه
محبتش بصراحة اتفرج عليه و بعدين اصرف فلوس على العلاج
بس اكيد شوفنا كلنا الاغانى بتاعه اهيف فيلم تقريبا
فى تاريخ الكورة المصريه ... اقصد تاريخ السينما المصريه
و يقولك احمر و ابيض
احمر لونه بلون الدم و الابيض قلب ابيض زى الفل
و اختزلوا كلمه مصرى فى اللونين دول و الكورة و بس
بس هقول ايه
منتهى الاستخفاف بعقل مشاهدين و بعقل شعب بحاله
اكن كل المصريين دلوقت خلاص نسيت كل حاجة و نسيت كل المشاكل
و مش بتفكر غير فى زكى جمعه ؟
مين زكى جمعه دة
او تامر حسنى الى جاب الكورة فوق العرضه
و اهى كلها اسماء ربنا
انا شكلى هعمل جلسات علاج طبيعى خلاص يا اخوانا
مش هقول حاجة تانيه غير ان الموضوع ناقص اللون الاسود و يبقى علم مصر بجد
و هتلاقى اللون الاسود بقى هو كل حاجة بتحصل دلوقت عندنا
و بقت مصر مش احمر و ابيض و بس
و بقت اسود كمان
و اخيرا هى دى مصر يا عبله

Saturday, October 11, 2008

واجبات مؤجله




عارفه انى اتاخرت اوى فى عمل واجبات تدوينيه عليا
جالى تاج وواجب تدوينى

من goodman
romantic
و متى اللقاء

هما الاتنين حلوين و عارفه ان تقريبا كل المدونين خلاص جاوبواعليهم

تقريبا ماعدا العبد لله
نبدا

بدأت تدون من امتي ؟ و دخلت العالم ده ازاي ؟
من سنه و نص تقريبا و اول من عرفنى موضوع المدونات مدون اسمه قاسم افندى

ايه كان انطباعك في البداية ؟
عجبتنى الفكرة اوى اوى و لقتنى بتشدلها و بطلع كتيييييير اوى من جوايا


مين اكتر واحد بتهتم بتعليقه علي بوستك الجديد ؟
كل الناس الى بيعلقوا عندى اكيد بهتم بتعليقاتهم و اوى

ايه أهم حاجة اتعلمتها من عالم التدوين ؟
اتعلمت يعنى ايه حريه - الحريه الحقيقه

و فهمت حاجات مكنتش واخدة بالى منها
التدوين بجد بقى شىء مهم جدا فى حياتى


ايه أكتر حاجة كرهتها ؟
كرهت الناس اللى بتستخدم الحريه غلط و فكراها انها اما تغلط فى الكلام و تخدش الحياء

يبقى دى الحريه ,,
و كرهت كمان كميه التناقض اللى موجودة فى البشر
فى كلام يتكتب و تصدقه لانه طالع من القلب و بصدق
و تلاقى كلام يتكتب مرسوم و بيدل على تناقض صاحبه

حاسس ان التدوين له تأثير ؟
ايوة طبعا و جدا و خالص
لانك حر بتكتب الى فى قلبك و اللى حاسس بيه و الدليل
ان كلمه "مدونين" بقى لها تأثير شديد دلوقت فى البلد


تهدى التاج لمين ؟

اعتقد ان معدتش فيه غيرى

و اهو خلاص عملته


*****************************************

الواجب التدوينى التانى


.قوانين الواجب

:1. اذكر اسم من طلب منك حل هذا الواجب .

2. اذكر القوانين المتعلقة بهذا الواجب

.3. تحدث عن ستة أسرار قد لا يكتشفها من يقابلك للمرة الأولى.

4. حول هذا الواجب إلى ستة مدونين ، وأذكر أسماءهم مع روابط مدوناتهم في موضوعك.

5. اترك تعليقا في مدونة من حولت الواجب عليهم ، ليعلموا عن هذا الواجب


متى اللقاء

السر الاول: اى حد يشوفنى يفتكرنى تنكه ليه و ازى , معرفش
مع انى عمرى ما كنت مغرورة او حتى خنيقه فى الكلام


السر التانى: شريره شوية
مع انى على العكس تماما


السر التالت :الناس فكرانى ان قراراتى بتكون سريعه
مع انى مترددة جدا و بفكر فى الحاجة مليون مرة


السر الرابع : ديما الناس بتاخد كلامى بمعنى مختلف
مع ان كلامى بيكون واضح جدا
عامه قلت ان اكيد العيب منى و اخد كورس فى مهارت الاتصال
احتمال اتفهم صح يا اخوانا


السر الخامس: ناس كتير اوى و منهم قريبين ليا فاكرنى
انى اما بتكلم على مستقبلى او حتى طموحى انى بق و بس بمعنى كلام بدون افعال , انما عامه
انا ديما كل كلمه بقولها بسعى فى تحقيقها و الموضوع عندى مش كلام و بس
بس الموضوع بيكون مسأله وقت

السر السادس :ببيع بسرعه اوى مع انى عمرى ما بعت حد و بحب اصحابى اوى
و الحمدلله لسه مستندلتش مع حد
مع انه ممكن يحصل معدتش فى حاجة مضمونه
:)


بهدى التاج ده ل








اكيد هاروح ابلغهم


Wednesday, October 8, 2008

عفوا رئاسيا


تتبعت باهتمام الحكم الصادر ضد ابراهيم عيسى و من معه من رؤساء التحرير الذى تمت ادانتهم بنشر اشاعات مغرضه عن صحة الرئيس , و لست هنا للاتكلم بهذا الصدد , فقد تحدثنا كثيرا عن حريه الصحافه و حريه الصحافيين و ان من حقهم تتبع الاخبار و ايضا معرفه الشائعات الكاذبه و الاخبار الحقيقه و هذه هى مهمه الصحفى فى المقام الاول.

و لكن ما اثار اعجابى هو العفو الرئاسى الذى قام به الرئيس مبارك ليعفو عن ابراهيم عيسى , و كانه من قام بالتنازل عن حقه و التنازل عن ما تعرض له , و قام بهذا العفو .
لا انكر انه قد اعجبنى حقا هذا القرار , و لكن لماذا يحدث هذا الان , هل ادرك الرئيس ان مصر ليست فى وضع يتحمل العديد من الازمات . و ان المصريون فى حاله غضب عارمه لما يحدث الان و جاء ليلطف الامر قليلا . ام انه قد سامح هذا الشخص و قال " عفا الله عما سلف ",.و رفع يداه الى الله و قال حسبنا الله
هل هذا ما حدث حقا !! عفو رئاسى....و كأنه سامح من اخطا فى حقه وقال عنه كلام خطير و لا يمت للحقيقه بصله فقال انه مريض ,, يا لهول الكارثه .
تعجبت كثيرا فليس ابراهيم عيسى بطل كروى ليتدخل الرئيس بنفسه فى هذا الامر , و ربما كان العفو فقط جاء فى احياء ذكرى اكتوبر... ام كما قال انه لا داعى لان يكون فى خصومه مع احدا من افراد الشعب

..
اذا ماذا عن عفوك الرئاسى عن شعب مصر سيدى الرئيس . افراد الشعب..... البسطاء فكل فرد من الشعب الان عندما يتعرض لكارثه او يتعرض لازمة او يشاهد حريق اخر فى بلادنا ينظر الى السماء و لا يقول الا خمس كلمات متتابعه , ,فكان افراد الشعب جميعا فى خصومه مع الرئيس لما نشاهدة من مهازل الان سواء على الصعيد السياسى او الاجتماعى او الامنى , و كل شخص يحمله نتيجة ما يحدث ,ففى كل يوم ننتظر مأساه جديدة نترقبها فاى شىء الان ليس بالبعيد.

و يظل السؤال هل هذا العفو يشمل بقيه رؤساء التحرير الذين خاضوا فى حق الرئيس مبارك و قالوا كلام لا يحتمل ,, ام هو ابراهيم عيسى فقط ... هنيئا له بها فقط فاز بها حقا
هنيئا لك ابراهيم عيسى فقد نلت عفوا و مازالت الملايين من البشر فى انتظاره ,
وماذا عن ايمن نور , الم يحن الوقت لنيله عفو رئاسيا هو الاخر , ام لابد و ان يصبح القرار "امر " من اقوى قوى فى العالم ,, اعتقد انها سابقا لما تمر به الان من ازمه ماليه فادحة " واللهم لا شماته ".

ماذا ننتظر حتى يتم عمل قوانين تحفظ للجميع حقوقهم , و تعطى للجميع حريتهم الغائبه ,متى سنشعر بالامان ها هنا فى بلادنا و لا ننتظر امرا ماساويا جديدا كل صباح و عندما يقضى النهار نتنفس الصعداء .

سيدى ارئيس اعتقد انه ربما تراجع الامر قليلا و بما انك لا تريد خصومات مع افراد الشعب و اصدرت عفوا رئاسيا قد يحسب لك . اذا فلتشاهد ماذا يقول الشعب و بماذا يشعر الشعب ..حقا لا داعى لان تصبح فى خصومه مع 80 مليون شخص , اعتقد حينئذا سيكون الامر خطيرا جدا .




Saturday, August 9, 2008

الجرين كارد


ادهشتنى كميه الاعلانات الموجودة على صفحات الويب
عن الحصول على الجرين كارد و الاقامه فى الولايات المتحدة .
وللمره الثانيه ظللت افكر ماذا اذا ما حالفنى الحظ و سافرت الى هذه الدوله
ماذا لو سافرت و ماذا لو بدات هناك حياه جديدة ؟؟؟؟
و فكرت ان اقوم بتسجيل اسمى على سبيل تجربه كل جديد
فانا اعشق ان اعرف كل جديد
و فى كل مرة ارى الاعلان اجد ما يمنعنى من ان اقوم بالتسجيل
فينتابنى شعور غريب
هل ساشعر بالسعاده الحقيقة اننى فى امريكا
هل ساحقق كل احلامى لو سافرت الى هناك للعيش و الاقامه؟
هاتفت صديقة مقربه الى قلبى و كانت زميله دراسه ايضا
تعيش هناك مع زوجها
و تحدثت اليها ما رايك
اجابتنى فى سعاده نعم هيا تعالى الى هنا
هناك الكثير سافروا الى الولايات المتحده بهذه الطريقه
و لا تعيرى هما سوف تمكثى معى و ما الى ذلك من هذه الامور
قلت لها و ماذا ساعمل هناك
قالت لى اى شىء
مثلما يحدث هنا
يعملون فى اى وظيفه
و فى اى عمل
و قالت لى انتبهى امريكا ليست كمصر
فانها دوله تحب الجديه فى العمل و على قدر العمل ستجنى المال
فالمصريين هنا و بعض الجنسيات الاخرى يعملون لساعات طويله جدا
و يتعبون حقا لجنى الاموال
قلت لها اذا و لماذا اترك هنا لاعمل بهذه الدوله فى اى عمل
و ماالذى ساجنيه غير المال , هل فقط سيقال عنى اننى اعمل باعظم دوله فى العالم؟
اذا ما سيحدث لو عملت هنا فى موطنى فى اى عمل و ساجلب اموال ايضا
اليس افضل من ان اعمل بدوله اخرى و اعطى لها مجهودى
اليست مصرنا اولى بنا
الا يوجد بامريكا فساد؟
الا يوجد بها ارهاب ؟
الا يوجد بها قمع للحريات ؟

انهيت مكالمتى مع صديقتى و انا اقرب على البكاء
ليس بسبب الجرين كارد او بسبب حيرتى
و لكن لاننى قد قاربت على الدقيقه الخامسه و الثلاثون " مكالمه دوليه
و فى نفسى اقول بمقت " يحرق امريكا يا اخى"
" ,
و مع انهائى لمكالمتى مع صديقتى ..انهيت ايضا رغبتى فى التسجيل
للحصول على الجرين كارد

Thursday, August 7, 2008

برده تاج


التاج ده وصلنى من الاخ العزيز الفارس الملثم

و بعتذر يا محمد عن التاخير
التاج دة لذيذ و عجبنى بجد
استعنا بالله
لو اعطيتك 3 وردات من هم ال3 اشخاص الي هتديهم الورده؟

مش هعرف اقول اسماء
بس وردة لصديقه وقفت معايا فى وقت الشده
و ورده لواحد يحبنى بجد و يكون حنين
و هدى وردة لبنوته جميله خلت حياتى اكيد احلى

لو اعطيتك ورقه فيها 3 سطور تكتب الي انت عايزه تكتب ايه؟

اكتب
ان دوام الحال من المحال .. و محدش بياخد كل الى هو عايزه من الدنيا
اكيد لازم حاجة تنقص لحكمه يعرفها ربنا بس
.... ممكن ده يوجعك بس متعرفش الخير فين
صعب انك تعامل كل واحد على قد معاملته
. امنت انى لازم اتعامل باللى يرضينى و يريحنى حتى لو فى ناس متستهلش
عمرك ما هتعرف تقسى على ناس حبيتهم بجد ....حتى لو حاولت


ماهو هدفك في الحياه؟
ابدا حياه جديده
ان شاء الله بكره هيكون احسن من النهارده؟هل تصدق هذه العباره؟

طبعاااااااا
على فكرة الجمله دى مصبرانى على كتير قوى
:)

اجمل مقوله سمعتها في حياتك ايه؟

عجبنى كتيييييييير قوى
بس اكتر مقوله عجبتنى الى قالها الفارس الملثم
لن تمتهن الا اذا تلهفت
لن تحتقر الا اذا توسلت
لن تموت الا اذا انبطحت ارضا وزحفت

من المغني الي بتحبه اوي واحلي اغنيه ليه ايه؟

مفيش حد معين
اى صوت يكون بجد حلو و كلمات جميله و لحن رائع

غزه تمثل ايه في حياتك؟

كابوس الامه العربيه
اللى بيحصل فيها هيفضل وصمه عار تلاحق العرب
و تفكرهم بضعفهم

اعطي لانتمائك لوطنك درجه بالمئه؟

ميه فى الميه
مصر عشقى الاول و الاخير

لو تزوجت وانجبت بنتين وولدين اسمهم هيكون ايه؟

ايه السؤال الغريب ده
مريم

عمرك غشيت في امتحان وانت صغير؟

ياااااه اهو السؤال ده اغرب من اللى فات
طبيعى جداا كنت بغش و كتير قوى
و سبحان الله كان لازم الى يغششنى هو الى يتكشف
و انا طبعا استندل ولا اكنى اعرف حاجة

قول 3 صفات ب3 كلمات اوصف بيهم شخصيتي؟
طيبه ....... رومانسيه قوى ..... طموحه الى حد الجنون

لو مرتبك كان كتير يكفي اجيب اغلي هديه اجيب لكل فرد في عيلتك ايه؟

لو ربنا ادانى و حد طلب حته من السما
من غير ما افكر اكيد هيحصل

برده بكلمه واحده ايه الصفه الي عاوزها في شريك حياتي؟

حنين قوى
ايه المجال الي غير دراستك وشايفه نفسي فيه اوي حتي لو كان الرسم علي الحيطه؟
دلوقت الصحافه
من سنتين كنت هقول غير كده

طب دلوقتي حالا ايه المكان الي نفسك تكون فيه ؟

عند البحر



*************************
مش هقول اسماء اهدى ليها التاج ده
انما اى حد يحب يجاوبه يجاوبه
الدعوة عامه

:)

Sunday, July 27, 2008

العدل يا رب


اصبح دم المصريون بلا ثمن
اصبحنا لا نساوى شىء
بعد تبرئه الظالم و سحق المظلوم
بعد رد كرامه الجانى و لوم المطحون
اصبحنا بلا هويه هنا فى بلادنا
يا الهى
ادعو لك بان ترفع رايه الحق دائما
و تزهق كل باطل
ادعوك ان تعطى لكل ذى حق حقه
و تبعد عنا كل ظلم و هوان
ادعوك بان تحمى مصر و ابنائها من كل شر
ادعوك بان تعطى مصر العدل
العدل يا رب العالمين
العدل

حسبنا الله و نعم الوكيل

Wednesday, July 2, 2008

الحب الاعمى



اعجبتنى هذه السطور فقد جعلتنى اتسال
هل هناك حب اعمى و حب بصير
و ماذا لو كان الحب بصير ؟
و هل حقا الحب الاعمى يصاحبه.........؟؟؟؟؟
اردت مشاطرتكم هذه القصه الاكثر من رائعه
و بالطبع فهى منقوله و لكن لا ادرى من كتبها
و لكن فيها من الخيال و التشبيهات ما جعلها تعجبنى حق
ا

********************************
في قديم الزمان
حيث لم يكن على الأرض بشر بعد
كانت الفضائل والرذائل.. تطوف العالم معا
وتشعر بالملل الشديد
ذات يوم ... و حل لمشكلة الملل ..
اقترح الابداع لعبة .. وأسماها الإستغماية
أحب الجميع الفكرة
وصرخ الجنون : أريد أن أبدأ .. أريد أن أبدأ أنا من سيغمض عينيه .. و يبدأ العد
أنتم عليكم مباشرة الاختفاء ...و بدا
واحد ... اثنين ... ثلاثة ثم اتكأ بمرفقيه .. على شجرة ..
و بدأت الفضائل و الرذائل بالاختباء
وجدت الرقة مكانا لنفسها فوق القمر
و أخفت الخيانة نفسها في كومة قمامه
و ذهب الولع واختبأ .... بين الغيوم
و مضى الشوق الى باطن الأرض
قال الكذب بصوت عال سأخفي نفسي تحت الحجارة ... ثم توجه لقعر البحيرة
و استمر الجنون : تسعة و سبعون ... ثمانون ... واحد وثمانون
خلال ذلك أتمت كل الفضائل والرذائل تخفيها ...
ماعدا الحب !!كعادته ... لم يكن صاحب قرار ... و بالتالي لم يقرر أين يختفى
و هذا غير مفاجيء لأحد…. . و هذا .فنحن نعلم كم هو صعب اخفاء الحب
تابع الجنون : خمسه وتسعون....... ستة وتسعون
و عندما وصل الجنون في تعداده الى : المائة
قفزالحب وسط أجمة من الورد ... و اختفى بداخلها
فتح الجنون عينيه ... وبدأ البحث صائحا أنا آت اليكم ... أنا آت اليكم...
كان الكسل أول من اكشف لأنه لم يبذل أي جهد في إخفاء نفسه
ثم ظهرت الرقّة المختفية في القمر
و بعدها .. خرج الكذب من قاع البحيرة مقطوع النفس
و اشار على الشوق ان يرجع من باطن الأرض
وجدهم الجنون جميعا ... واحدا بعد الآخر ماعدا الحب
!!كاد يصاب بالأحباط واليأس ... في بحثه عن الحب
الى ان اقترب منه الحسد وهمس في أذنه ,,الحب مختفي في شجيرة الورد
التقط الجنون شوكة خشبية أشبه بالرمح
و بدأ في طعن شجيرة الورد بشكل طائش... ... ليخرج منها الحب
و لم يتوقف الا عندما سمع صوت بكاء يمزق القلوب
ظهرالحب ... و هو يحجب عينيه بيديه و الدم يقطر من بين أصابعه
صاح الجنون نادما : يا الهي ماذا فعلت !؟
ماذا أفعل كي أصلح غلطتي بعد أن أفقدتك البصر
اجابه الحب لن تستطيع إعادة النظر لي
لكن لازال هناك ما تستطيع فعله لأجلي ...... كن انت دليلي
ومنذ ذلك اليوم
اصبح
الحب الأعمى ... يصاحبه الجنون

Sunday, June 29, 2008

الحياه بكى يا مصر



اين الامان بكى الان يا مصر

عندما يضيع الامان فى وطن تحبه بل تعشقه ..تصبح الحياه مستحيله , عندما تشعر بهذا الخوف و انت فى عقر دارك تصبح الحياه مستحيله , عندما نفقد اعز ما نملك وسط غابه الحياه من مال او اطفال او شرف او مبدىء , تصبح الحياه مستحيله ,, عندما نشاهد انفسنا تجر امام اعيننا نحو حفره من حفر النار و كانت مثل الجنه فى السراب , تصبح الحياه مستحيله
ها هى الحياه بك الان يا مصرنا

حياه اصبحت مستحيله

Saturday, May 24, 2008

تاج الاغلبيه الصامته

التاج ده من احمد سمير الاغلبيه الصامته
فبجد بشكره و بقوله لك يوم
:D
و نجاملك فى الافراح ان شاء الله

بسم الله
أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
الحلم الاول
كان نفسى اهتم اكتر بالرسم و الموسيقى كنت بحلم انى ابقى عازفة جيتار مشهورة او حتى رسامه
بس مشكلتى ان مكنش فى حد يشجعنى على ان انمى اى موهبه
يمكن ده مش مبرر برده بس اكيد تتمنى ان حد يبقى وراك و يشجعك
حلمى التانى
انا عملت خطوه فى حياتى و للاسف كنت مجبره عليها لو يرجع بيا الزمن مكنتش اعملها
او على الاقل كنت فكرت كويس قوى فيها
بس برده كل شىء بيد الله
الحلم التالت
كان نفسى قوى ادخل كليه سياحة و فنادق
لانى بمووت فى حاجة اسمها اثار و بالاخص الفرعونيه كان نفسى ابقى مرشدة سياحية
و مع ان الكل وعدنى انى هدخلها لو جبت مجموعها
بس ساعه الجد الكل نسى و قالولى البنت و مش البنت
المهم خلتنى ورا اخويا لحد ما دخلها هو
الحلم الرابع
لو رجع بيا الزمن شوية صغيرة كنت اخدت كورسات فى ادارة الاعمال
الحلم الخامس
انا بحب القراية قوى بس مجتش الفرصه انى اقرا كتير
و طبعا ظروف الحياه خلتنى كمان بعيدة الايام دى عن القرايه اصلا

**************
أذكر خمس أحلام على الاقل ..تخص مستقبلك
الحلم الاول
انى اصل الرحم اكتر من كده
انا الحمدلله بسال على كل قريبى بس ساعات بحس بردة انى مقصره
الحلم التانى
الستر من عند ربنا و مش يحوجنى لاى حد الا له بس
الحلم التالت
اسافر و الف العالم كله بحب السفر قووى
الحلم الرابع
انى ابقى احسن و انجح سيدة اعمال فى مصر قوولوا يا رب
الحلم الخامس
نفسى احس بالامان و الحنان فى حياتى و بس

*********
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
للاسف مفييييييييش

**********
أذكر شخصين على الأقل غير متواجدين فى حياتك حاليا
كنت تود وجودهم الان او فى حياة اولادك مستقبلا
خالى الله يرحمه كان بجد قدوه و مثل اعلى
كفايه انه كان محسسنى بالحمايه فى الزمن ده
و جدتى بردة الله يرحمها
كان نفسى تبقى موجودة كانت بتحبى قوى حب غير عادى كنت بحس الامان فى حضنها بجد


و الان اهدى هذا التاج الى
شرين
الفارس الملثم
اجندا حمرا
سنووايت

وووووووووبس

Thursday, May 15, 2008

انها مزهله

عجبتنى جمله فى فيلم عربى هايف
واحد بيقول انها مهزله التانى
رد عليه قاله بظرف ايوة بجد مزهله
بصراحة الكلمه دى لقتها متظبطة علينا
وعلى كل البلاد اللى جبينا
لقيت كل بلد فيها مهزله
لو اتكلمنا على لبنان و الامريكان و الفتنه الى فيها
وكل واحد ثاير و فاضى يقول دى بلدى و مش هطاطى
و ناس تموت ومنهم بتتبهدل
بردة مهزله
لو قلنا على دارفور و الناس الى بقت فيها بتفور
مش عارفين يبقوا مع الحكومة و لا مع الثوار المنبوذه
بردة مهزله
و لو اتكلمنا على حاكمنا و الى راح بمنتهى الحكمة
يبارك لناس يهودية عفنه يقولهم مبروك على عيد ميلاد بلد منكوب
بقى دول عاملين حداد
و دول فرحنين و عاملين حفله
ماهو محدش بقى عنده دم و لا فطنه
بردة مهزله
اما نروح بمنتهى الخفة ندفع فلوس
علشان نقابل بوش بوحشه
و نقوله سلامات يا راجل وحشنا
تبقى مهزله
اما الامريكان يبوظوا لبنان و يقضوا على العراق و كل الاوطان
و يروحوا يقولوا بمنتهى الامان
احنا مع اسرائيل و بكل الوجدان
و اللى هيعكر صفوها و يحاول يلعب بامنها هيبقى من الاعداء
و من قسوتنا مش هيبان و من جبروتنا مش هينام
و حماس و حزب الله فى يوم هما كمان
هيروحوا فى خبر كان
دى بردة مش تبقى مهزله
اما نزيد شوية فلوس و يفضل فينا بردة المتعوس متعوس
ماهم تانى خدوا الفلوس
بس بخفه ما ههم فعلا شوية سوس
بقى عندهم مزاج يضعفوا النفوس
دى بقى مهزله
و لسه مصممين مش مكسوفين بنحارب نفسنا
بدل ما نتجمع و نقوم نحارب و نثور و نكافح
لسه قاعدين
يعدى الزمن و هنفضل قاعدين
نتبهدل و نهبل
و لسه قاعدين
بذمتكوا انتوا دى مش مهزله
بجد بجد مزهله

Wednesday, May 7, 2008

نهايه


عاد الطير ادراجه عند الغروب
عاد بعد معركة مع الوجود
اراد الصحو من غفوته
علم ان السكات سجن عليل
لا يصمت فقط الا الذليل
اراد الانتصار فى المعركة
الا انه عاد يشكو النزيف
لكنه لم يندم على المحاوله
اراد القول كفى لا مزيد
من الذل و الظلم
اراد التحرر من العدو
علم ان العدو ليس من احتل تراب وطنه
لكنه من احتكر قوت يومه
اراد قهره و دفنه
اراد التحليق بعيدا فى سماء الحياه
اراد فك القيود
الا ان معركته لم تكن متكافئه
و الى متى ستكون هكذا
الم يحن الوقت لان يكون الطير كله مترابطا
ليستطع ان يقتل من تسبب فى غضبه
و جوعه و موته
فلا يوجد مفر غير ان يثور ثانيا
ربما ثالثا
ليعود فى الصباح رافعا راسه
ينتقم لنفسه
ليؤتى ثمار النصر و النجاح
فلكل ظلم نهايه
ستكون حقا هى النهايه


Wednesday, April 30, 2008

الذ تاج من احلى شرين


التاج دة وصلى من شرين و بصراحة التاج لذيذ بجد
اتكلم عن نفسك فى عشر نقط
اولا
انسانه طموحة جدا و ساعات بشوف ان دة صح و ساعات بقول عليه غلط
بحب الشغل جدا جدا بحس انى جوايا طاقه كبيرة
لازم تستغل صح لانها ممكن تبقى بالنسبة ليا طاقه مدمرة
و على راى ماما
حاسة ان نهايتى مش هتبقى طبيعية
ثانيا
بحب الحب قوى مشاعر تضحية عطاء بلا حدود حاجات كتير
مهما كتبت عنها مش هعرف اوصفها
الذ حاجة ممكن اشوفها و انا ماشية
اتنين ماشيين مع بعض مسكين ايد بعض و باين عليهم الحب
و الحب اللى بحس بيه مش علشان مسكين ايدين بعضهم
بحسه اما الاقى الولد بياكل بعنيه البنت الى معاه
و بيبقى خايف عليها قوى و نفسه يخفيها من عيون الناس كلها
و البنت بلاقيها بتبصله بحب و امان و انها اكيد حاسة معاه بالحنان
يا بختهم
ثالثا
بحب البحر قوى قوى
بحب اما اكون مضايقة اروح مكان فيه بحر و اقعد قدامه و اكلمه و افضل اتكلم و اتكلم
و اسيب دموعى هى كمان تتكلم لحد ما الاقى نفسى هديت
بحب فيه كل حاجة ثورته و هدوءه بحب امواجه اما تضرب الشاطىء بحب قوى منظره بليل
و ساعه الشروق
و خاصه ساعة الغروب
بيهز فيا مشاعر غريبة
بس بجد جميله قوى
رابعا
اعترف انى ساعات بسيب حقى
يمكن اكون بتكسف اطلبه
و يمكن كمان اكون مش محتاجاه و اسيبه بمزاجى
انما الى يغظنى قوى ان الى قدامك يتعود منك على كدة
او انه يحس بالانتصار انه اخد منى حاجة هو متهئيله انها غصب عنى
خامسا
ديما بحب ادى الامان لاى بنى ادم معايا
حتى لو عرفته لمرة واحدة
بحب ديما احسسه بالامان مش لاكتر من انى اصلا كدة
بحس ان اى حد اعرفه و معايا بقى مسؤول منى و لازم احميه من اى حاجة
او من اى موقف يتعرضله
بحس ان دة واجب عليا
و دى حاجاة تخنق , عارفه
سادسا
بموت فى حاجة اسمها مصر
بعشق ترابها بجد
بحب نيلها و جوها و نسيمها و بحرها
بحب كل حاجة فيها
و يا رب تبقى احسن بلد فى الدنيا
و هفضل وراها مش هسيبها
سابعا
بحب ديما اطور من نفسى
و بحب ديما اتعلم كل يوم جديد
و بسعد قوى اما بحس انى اتغيرت عن السنه الى قبلها
او انى بقيت اعقل من قبل كدة
بحب ديما ابص لفوق
و بحب ديما انى احلم و الاحسن و الى بعتبره ميزة و غيرى بيعتبره عيب
انى بحاول على قد ما اقدر احقق احلامى حتى لو كانت مستحيله
بحاول و ساعات بقدر و ساعات ربنا مبيردش
بس برجع احاول تانى
ساعات كتير بفشل فى حاجات
بس بحب ديما ارجع و اقعد مع نفسى و احاسبها و اشوف فين غلطاتى
و اظبط نفسى و استعد من تانى للمواجهة
و ارجع احاول من تانى و عادة بنجح و الحمدلله
الحمدلله مؤمنه انى اقدر اعمل اى حاجة فى الدنيا لو انا عايزة اعملها
بحس انى قدراتى ملهاش حدود و بحمد ربنا
ثامنا
ساعات بحس ان الصدق فىكل حاجة مش بيجب غير مشاكل بالنسبة ليا
لانى اتاكدت ان المجتمع الى احنا فيه فعلا بيصدر اوامر على البنت او الست
و بيحطلها حدود ظالمه و بيقولها متعديهاش
كنت ساعات كتير بضطر اخبى الحقيقة علشان
زى ما بيقولوا امشى حالى دة على المستوى الشخصى بس
و طبعا دة بيرجع ان الكل فاكرنى مجنونه
انما الحمدلله خلاص اتعودت انى بقول الى انا عايزاه
و اى حد يكلمنى اقوله انا كدة رانيا طبيعتها كدة
غير كدة بقول كلمه الحق فى اى موضوع و بحاول ابقى محايده بقدر الامكان
و بحب ديما لو اقدر اعمل حاجة تساعد فى اى موضوع او قضية او اى شىء
بعملها و اقول الحق و لا يهمنى
و ساعات بقول كلام رخم بيطلع منى كدة
بس و الله مش ببقى قصدة
بس الى قدامى اكيد بيضايق و اكيد لو مش عارف طبيعتى
و بحاول احاسب على كل كلمه تطلع منى و ربنا المعين
تاسعا
بعترف انى عصبية
بس عصبيتى دى زادت قوى فى الاوقات الاخيره من مواقف اتعرضتها
و كانت فى منتهى القسوة
بحاول اغير من نفسى
بحاول ابحث عن المثاليه
عارفة انى مش هوصلها بس على الاقل اكون قربت منها
بفكر كتييير جدا طول ليلى و نهارى بفكر فى حياتى
و ازى انى ممكن متحوجش لاى حد فى يوم بحب اعمل حسابى علشان
اما اتحط فى اى موقف اعرف اتصرف فيه
طبعا كل شىء بتاع ربنا
بس برتاح اما بعمل حسابى لاى ظرف مفاجىء او اى حاجة تحصل
ومشكلتى الاساسية و فى ناس بتعتبرها ضعف انى بفكر بقلبى كتير قوى
بفكر بعواطفى و دى مشكله فى الزمن الى احنا فيه دلوقت
و طبعا دة اثر كتير عليا فى حياتى الشخصية و العمليه
و اتظلمت كتير بسبب ده
عاشرا
بعتبر نفسى انسانه كويسة مش وحشة و حتى لو كنت عملت غلطات
مفيش انسان معصوم من الغلط و بعتبر نفسى مجنونه فى مشاعرى
طيبة و ممكن اكون بعرف اظهر الحب و الحنان الى جوايا
مش بعرف ابخل بيهم على اى حد اعزه او احبه
بعتبر نفسى بعرف افكر كويس و مع ان الكل بيقف ضدى فى افكارى او فى تصرفاتى
فدة انا بعتبره انى ماشية صح
مع العلم انى بفكر فى كل اعتراض بيتوجهلى و بحاول افكر فيه بالمنطق
عارفة انى رغيت و كتير
بس لو كان اتقلى اكتبى عشرين نقطة كنت كتبت اكتر
لسه فى حاجات كتير عايزة اكتبها عن نفسى
اختار خمسة و اديلهم التاج
يا مراكبى
عمار جرار
احمد سمير
قلب ينبض لله
ا ب ج د
لازم تبلغيهم
اكيد هيحصل
و مش ناوية ارجع التاج
للى بعتهولى تانى
طبيعى يعنى

Thursday, April 24, 2008

حاجة غلط

اكيد فى حاجة غلط يا اخوانا و الله
شوفت على القاهرة اليوم افراج اسراء عبد الفتاح
و طبعا زى اى واحدة فى مصر فرحت جداااااااا
و اكيد زى اى واحد فى مصر دمعت من المشهد المؤثر
ما علينا
العجيب
انها اتكلمت و فضلت تشكر قوى قوى فى المعامله اللى اتعاملتها جوه السجن
و الاكل الحلو و الشرب الاحلى و القرايه و كل الحاجات دى
و الغريب
انها قالت عرفت قد ايه انى مكنتش فاهمة و كان عدم تقدير منها
دعوتها للاضراب
يعنى الاضراب اللى كان وقفة بجد للشعب و اتحاد تقريبا لكل القوى الوطنيه
دلوقت بقى تصرف منها غير لائق و كان بسبب عدم فهم
معقوله
انا هنا مش هتكلم عليها
الله يكون فى عونها بجد
فى اللى شافته
بس الى بستغرب له دلوقت
ان فى حاجة غلط
اة و الله اكيد فى حاجة غلط
يا احنا فاهمين الحكومة و الداخليه غلط
و دى انا اشك فيها
يا هما بيعملوا غسيل مخ للناس الداخله عندهم
و الله اعلم
************************************************
تحديث
اشترك معانا فى حمله توقيعات المدونين لنصرة رسولنا الكريم
صلوات الله عليه و سلامه
اترك توقيعك فى مدونه قولا سديدا

Wednesday, April 16, 2008

العائد من الموت


نويت ان اكتب عن العائد من الموت
نعم لقد عاد الى الحياه رغيف الخبز ( تصفيق حاد) ,, فوجئت منذ يومين
بان كل المخابز لا يوجد امامها اى انسيا و ان العمال يجلسون يضحكون مع بعضهم البعض
و المفاجاه , مئات الاكياس البلاستيكيه على الارض مملؤءة بالخبز فى
انتظار من ياخذها , و قد قلت ان الامر فردى و مؤكد ان
هذا المخبز ( عليه وسطة ) ,,, ما دعونى للشك , ان كل
المخابز التى رايتها و اعنيها ان كل المخابز فارغة لا يوجد غير انسان
او طفل واحد فقط و قد ملات الابتسامه
وجهم ,, ابتسامه رضا و ظفر بهذا الرغيف
الذى اصبح فى وقت مثل الفراخ المشوية
المفاجاه الثانية كاد طفل صغير ان يخبطنى بعربته التى يمشى بها
و اعتقدت من النظرة الاولى انها عربه للتوصيل للمنازل
و كان المنظر الصاعقة
و الذى جعلنى افرك عيناى عدة مرات مكتوب على العربه عربه الخبز ,,خدمه
توصيل الخبز الى المنازل, ادرك ان البعض متوقع ان ساقول
اننى اسيتقظت من نومى بعد هذا ,و
لكننى اقسم بالله انه كان حقيقه , ( ناس بتبرق) ,, و كنت قد نويت تصوير العربه
الا ان الصبى ارمقنى بنظرة سخريه ( قال يعنى بعكسه) ,,, مضيت فى طريقى
و ( همووووت) كنت اتمنى تصويرها , و السؤال الان
هل عاد الخبز من الموت حقاا ام انه مازال فى مرحله ما قبل الموت .
هل قامت الحكومة حقا بعمل حلول جذرية لحل هذه الازمة ,, هل برنامج
مفيد و فوزى و الذى اهان فيه وكيل اول وزارة التضامن الاجتماعى
و جعل منه اضحكوكة الحلقة هى من كانت دافع لحل هذه الازمة
هل مقتل الشباب على منافذ المخابز من كان سببا فى رق قلب الحكومة
لحل الازمة , ام ان تهديد الرئيس مبارك
لنضيف ( طويل العمر يطول عمره و ينصره على من يعدية هاى هىء) , هو من حل هذه الازمة
السؤال الاهم
ان مدينتى فقط هى الاولى بين
مدن الجمهوية التى يوجد بها هذا الامر؟؟؟؟؟
و عجبــــــــــى

Sunday, April 13, 2008

شعب لا يستحق الديمقراطية

اعلم ان ما سأقوله الان مناقض تمام لما كنت اقوله من قبل
و لكن للاسف هذا الان ما يجول فى نفسى
بعد ان فؤجت بتصرفات غريبة من اناس كانوا فى قمه الوطنيه
و البحث فقط عن المصلحة العامة و ليس البحث عن الذات
و قد تعودت ان اسطر و اقول بكل حرية ما يجول فى خاطرى على الرغم من كم التناقضات
فهذه طبيعة البشر
نحن حقا لا نستحق الديمقراطية
نعم اعنيها و اعنى كل كلمه فيها ,نحن شعب لا يستحق الديمقراطية
بل ايضا ما يخجلنى ان اقول ان هناك اناس لا يفهمون شئيا عن الديمقراطية غير اسمها فقط ,, لا يفهمون
معناها ولا ما تؤديه من رساله ,ينادون بها و يهتفون باسمها
و هم فى منتهى الدكتاتورية فى التعامل مع بعضهم البعض
ما هى الديمقراطية ؟ ماهو معناها الحقيقى كيف يريد الشعب المصرى ديمقراطية صحيحة
ماذا سنصنع من اجل الحرية ايها الشعب المصرى
ليس الصراخ و الهتاف بنعم للديمقراطية هو الحل . اعتقدت و نحن نقف يدا واحدة ضد الظلم
و نقول لا فى صوت واحد اننا جديرين بهذا الحق نستحقه و نستحق ان نعيش الحرية التى نريدها .
كيف سنسترد حقوقنا المسلوبه و نحن نسلب حقوق غيرنا فى التعبير ,, كيف سنعيش عيشة هنيئة
و انت تحجر على اخاك فى المطالبه بحقوقه ,, اين ديمقراطيتك اخى فى التعامل مع اخاك ,,,اين ؟؟؟ للاسف
اصبت بالاحباط من اكتشافى ان هناك اناس يهتفون فقط , يهتفون من الخارج يصرخون من اجل الصراخ
و لكنهم فى الاصل فى منتهى الدكتاتورية, مازلنا نحتاج الى الكثير من التدريب على هذه الديمقراطية و الحرية المطلوبه, ليست الحرية فى اننى افرض رايى على غيرى
او الحرية ان اتطاول على اخى بالسباب لاظهر قوتى المدفونه , و اتظاهر باللباقة
و انا لسانى ينطق مهاترات و اسفاف
للاسف مازلنا نحتاج الى تعلم ما هيه ثقافة الديمقراطية. حتى نستطيع
ان نكون جديرين بها و بالعيش فيها .

لك الله يا مصرنا

Monday, April 7, 2008

عن اضراب 6 /4



قد قالت كثير من القنوات التيلفزيونية ان الاضراب قد فشل ,و انه لم يحدث من الاصل و لكننى فى رايى الشخصى انه لم يفشل و ان عددا كبيرا قد اضرب ,و انه برغم كل هذه المحاولات الامنية لقمع غضب المصريين الا انها حقا خطوة فى طريق النجاح و طريق الحرية


مرفق فيديو لمظاهرات نقابه المحاميين و اعتذر عن ردائة الصورة
اول مرة ليا بقى :)
.

Tuesday, April 1, 2008

بهيه


انت يا ابنى انت و هى
قاعدين ليه دى الليله عرس بهيه
عروسة تمام من بتوع زمان
لسه شباب فيها حيوية
حاطة اسود و احمر و ابيض
متزينه لليله عرسها البنيه
حقها مش بهيه و طول عمرها سخيه
هتقوم تلبس فستانها الابيض
و تحط طرحتها و تقوم تنزل وسط ناسها و تتمخطر
ماهى بهيه و لازم هتطلع شقية
فى عيون كل الصبيه
يلا يا بنيه شدى حيلك
الكل مستنيكى تيجى بخيرك
و اوعى تيجى مرة و تبينى بخلك
دة الكرم اصلك و العطف منك
و الحنان فى حضنك و الحب فى دمك
يلا قومى بقى اتاخرنا
احنا وراكى هنبقى معاكى
اطمنى مش هتلاقى حد تانى يستناكى
هنحميكى و هندعى ليكى ربنا يخيلكى
دة انتى بهيه الصفية الى جوة قلبنا محميه
يلا قومى الزفة مستنيه قدومك
نفسها تزفك و و حواليها تلفك
دة انتى غاليه اوى و بنحبك اوى
و يلا يا قوى عينا على القوى
ساعدنا نحمى بهيه
من الى عايزين يقتلوها و منها يحرمونا
معقوله هنعرف نعيش من غيرك
معقوله هنحب غيرك
لا و الف لا منقدرش على الحياه كدة
بيكى و بينا و الا فلا
مش كدة بردة يا موهجه قلبنا

Wednesday, March 26, 2008

تاج مميز جدا


التاج دة وصلى من ولاء انا موجودة
و طبعا بشكرها على التمرير و تاج فعلا مميز جدا
بسـم الله نبتدى
لو سألك غير مسلم عن نبي الإسلام بماذا ستجيبه في سطور ؟
هقول رسول الله محمد صلوات الله عليه و سلامه
اخر المرسلين و شفيعنا يوم الدين
نبى الامه و حبيب الله
الصادق الامين
نبى الرحمة و الانسانية

اتيحت لك الفرصه لرؤيه رسول الله أى الاماكن تريد ان تقابله فيها ؟
كان نفسى اشوفه فى الاقصى
وادعو الله ان اشوفه فى الجنه يا رب
قولوا امين

وماذا ستقول له ؟
هعتذر له عن كل الى قاله الجهله فى حقة

و هطلب منه يسامحنا على تقصرنا حتى فى نصرته
و اكيد هطلب شفاعته يوم العرض على رب العالمين

كرر مقوله قالها النبى صلى الله عليه وسلم كنت تتمنى ان يقولها لك
مفيش مقوله معينه كنت اتنمى يقولهالى لان كان نفسى فى صحبته
كان نفسى اقعد معاه و اسمع كل كلامه و هو خارج منه

اذكر احب حديث من الرسول صلى الله عليه وسلم الى قلبك
قال الرسول الكريم صلوات الله عليه و سلامه
من راى احدا منكم منكرا فليغيره بيده فان لم يستطع فبلسانه
فان لم يستطع فقلبه وذلك اضعف الايمان

كيف تعرفت على سيرة سيدنا محمد؟
دراستى و دلوقت من المواقع اللى بتحكى عن سيرة اشرف خلق الله

اذكر خلق من اخلاق النبى صلى الله عليه وسلم واستشهد بموقف؟
التسامح
اشرف خلق الله كان رحيم و سمح و لذلك سمى نبى الرحمة المهداه للانسانية
عندما جاءوة اهل بنى قريش يطلبوا السماح
اخ كريم و ابن اخ كريم فقال لهم
اذهبوا فانتم الطلقاء

هل هناك تأثير لرسول الله صلي الله عليه وسلم على "شخصيتك أو حياتك
أو بيتك إذا كانت الإجابة نعم فاذكر مثالاً واحداً لكل منهم
اكيد فى شخصيتى
الرحمة والتسامح كمان

تمرر التاج لمين ؟؟؟؟؟
لكل واحد يحب يجاوب عليه
و يقول كلام فى حق احب خلق الله
سيدنا محمد عليه صلوات الله و سلامه


Saturday, March 15, 2008

بنــاء مواطن

الاهم من بناء المناطق هو بناء المواطن
و الاهم من بناء المواطن هو بناء الابناء
لان الابناء هم المستقبل

افتتح مقالى هذا بهذه الكلمات و التى اخذتها عن فيلم عربى ,
فهى حقا تعبر عن واقعية شديدة جدا .حيث الاهم من بناء المناطق هو بناء المواطن
و لكن!!!اين المواطن يا ساده؟ اين يوجد هذا المواطن ؟
مع وجود الفرق الشاسع بين الطبقات فى هذا البلد اين يوجد هذا المواطن
و الذى يتواجد المئات بل الالوف منهم فى العرى و عندما يحاولون التعبير عن هذا او التحدث بشان حقوقهم المسلوبه يهانون على قارعة الطريق فى اسلوب وحشى و همجى و لا فرق بين امرأه و رجل و لا طفل و لا شيخ .
اين هو بناء الابناء و نحن نرى كل يوم ما بين متطرف او من اصبح عضو جديد من اعضاء فرقة اطفال الشوارع او من هم يعيشون فى بذخ هائل و لا يعرفون ما قيمة وطن او الاحساس بما هيه مشاكل هذا الوطن
,, فنعم الابناء هم المستقبل.
و لكن بهذا الحال يؤسفنى القول بان المستقبل اصبح اسودا هكذا ,
انا لست متاشئمة و لكن اليست كل الظروف تقول ذلك ااذ ما تكلمنا عن الابناء و انهم المستقل فسوف يكون مستقبلا يعاننا الله عليه
اين هى التربية و اين الاخلاق التى نربى عليها ابنائنا , اين العدل؟ القابع فى هذا الوطن ,
اذا ما راينا سنجد نوعين , نوع تائه لا يستطيع تدبر قوت يومه و لا اشباع اقل اقل رغباته و الاخر يتلذذ فى متاع الدنيا غير آبه بما يحدث.ما هذا ؟
لقد نسيت ؟ اين هى بناء المناطق !!!!! نحن لدينا المئات بل الالوف من الناس فى العرى بلا سكن او مئوى , لدينا من العشوائيات الكثير و الكثير قنابل موقوته فى مصر تنتظر لحظة الانفجار و اذا ما انفجرت سوف نعيش ايام اعاننا الله على تحملها .
لما هذه الفجوة التى تفرق فيما بيننا و متى سوف نجد لها حل ؟ هل بعد ما تتكاثر اعداد الشباب العاطل ؟ ام عندما نجد افواج و افواج من اشخاص غريبة تتحول بعد ان كانت انسية فبفضل البطاله و اختفاء الطبقات الوسطى و بعض الفساد و الظلم و القهر تحولت و اصبحت شيطاين تعبث فى مصر .
كيف نقوم ببناء المناطق و هناك من يتحكم بتكويناتها و يحتكر اسياخها ؟ لماذا اصبح كل شىء فى مصر قابل للشراء البيع و الجديد هو الاحتكار؟
لما اصبح الشعب الان يتناسى كل مشاكله و لم يعد يأبوا غير ان حارس مرمى مصر هرب و لم يعد
او انه وصل الى ارض الوطن فى سلام و يسر ؟ لما قد نتناسى ما يحدث لنا و لم نحاول ان نجد له حلول , نبدا بانفسنا نبنى فعلا مواطنين . تبنى الدوله مواطنين لهم كرامتهم و من حقهم التعبير عن رايهم بشتى الطرق . و نحن نبى ابنائنا و نربيهم تربية حسنه و نغرس فيهم حب وطنهم و حب انفسهم و اهلهم حتى نستطيع ان نبنى مستقبل مشرق غدا و لا نقع فى براثن عنف و سطو على كل ما هو مرتبط بالقيم و المبادىء و المثل العليا. اعتقد اننا وقتها قد نتمكن من بناء مناطق و بناء مواطن و اخيرا بناء ابناء لمستقبل مشرق .

رانيا

Tuesday, March 11, 2008

اين العقل

لماذا مع كل هذه القنوات الدينيه المنتشرة فى الفضائيات
و مازال الناس الى الان يسبون فى الاسلام و يعتبرونه دين الارهاب
لماذا
هل الاعلام هو السبب حقا , ربما يجدون العيب فى هذه القنوات
هل ما تبثه من مواد اعلاميه لا يكفى ان يجعل العالم كله يتاكد ان الاسلام دين السماحة و السلام
ام الامر اكبر من هذا بكثير
هل مع انتشار اعداد الداخلون الى دين الاسلام فى العالم هم من يجعلوهم يشعرون بهذا الحقد
هل سيرة اشرف الخلق عليه الصلاة و السلام
و تاريخ الاسلام كله
و قراننا العظيم
و الى الان
مازلوا يعتقدون باننا دين ارهاب و عنف و سفك دماء
بالنسبة للاعلام و القنوات الدينيه
ساتكلم عن نفسى و مع احترامى لكل من سيقف امامى و يقول انى مخطئة
فانا لا احب ان اشاهد هذه القنوات و هنا لست اعمم
و لكنى اقول ان معظم هذ القنوات لا تجذبنى انا شخصيا و انا مشاهدة مسلمه
ما بال الغير مسلمين فى انحاء العالم
معظمها قنوات تبعث عليا الممل و لا افهم منها الا اقل القليل
الم يحن الوقت لاعادة الصياغة ؟
و بث قنوات مثمرة شيقة تجذب المشاهد و تجعله ينغمس اكثر فى هذا الدين
كم منا يشاهد هذه القنوات لاكثر من ساعة
اعتقد اننا يجب ان نعيد صياغة كل شىء و ليس فقط الاعلام
لنعلم كيف ننصر ديننا
ما الذى يجعل واحدة كالتى تحدثت فى الجزيرة ان تقول مثل هذه الاقوال على الاسلام كدين
و على المسلم بانه رجل غير عاقل
لماذا ؟
كيف نحن غير عقلاء و اين هو العقل
اين هو العقل يا سادة
اين هو العقل

Sunday, March 2, 2008

اين انتم؟


مالى لا استطيع الكلام
و ان اعبر عن ما يدار فى خلدى
هل الكلام سيبلغ عنى قولى
او هل كلماتى
تستطيع ان تحد من عنفى
او تحكى عن حزنى
او تقول لما اشعر بهذا الألم يعتصف قلبى
او يخنق نفسى
لما نحن سكاتا راضيين واقعين تحت مذله و انكسار
لما نحن كمثل المتامرين عن بلد أصابها الأنهيار
لما نحن كعرب نجبر على هذا الظلام
الذى يخنق بلدا و من ثم يخنق الوئام
هل سنمتثل الى هذا السكات
الم يحن وقت القول بأنه لا انهزام
لكثرة مسلمه لا تقبل الهوان
و لا تقبل الذل و الموت على يد حطام
اين انتم يا عرب اردتم السلام
ايوجد سلام مع اناس ترقص طربا على جثث الأطفال
و النساء و الشيوخ الأبطال
ايوجد سلام مع يهود كفره ترفض الكلام
و ترفض وجود اللسان
و تتكلم بالبنادق و تدوس بالأقدام
على كل من قال لا للظلم و القهر و الهوان
اين انتم يا صنعه السلام
يا من تريدون وقفه للأمن و الأمان
اين انتم
و جثث الاطفال تقول هيا لا تدعونا نموت هباءا
لا تدعونا نظل عجازا
لا تبخلوا على بلدنا بالعطاء و النصر لو جاء
اين انتم يا عربا تريدون العيش فى تؤدة و هناءا
هل تستطيعون النوم ليلا و هناك يموتون كالطير المصاب
هل تستطيعون العيش فى سعادة
و ايديكم و افواهكم مكبله بمثل هذا السكات
اين انتم و الى متى يا عربا أشرافا
يا من كنتم تتحدون فى مثل هذه الأحوال
اهو كان كلام كان سرابا
اليست هذه أرضنا و ترابها زعفرانا
ارض مقدسة و مات عليها الأنبياء
أين أنتــم يا عـرب
أيــن انتـــم

Saturday, March 1, 2008

كلمات


غريبة انتى ايتها الدنيا
لا تقفى ابدا عند احد
فالذى يرحل فليرحل
لا يهمك
و الذى يتنظر منك وجها حسنا
سيظل ينتظر الى ابد الابدين
غريبة انتى حقا ايتها الدنيا


كلمات جالت بخاطرى

Tuesday, February 26, 2008

Party


Happy Bithday To My Blog

انهاردة عدت عليا سنه فى التدوين
اول مدونه دى بصراحة غيرت كتير فيا
اكشتفت حاجات مكنتش اعرفها فى نفسى
بقيت اقدر اعبر و اكتب كل الى جوايا
بقيت اقفل بابى و افتح مدونتى و اقعد عليها بالساعات
اكتب و اكتب
و اهو عدت عليا سنه هنا و انا فى المدونه دى و لا حسيت
كل سنه و انا طيبة
و كل سنه و هى طيبة
و كل سنه لمدوناتى التانية كمان و هما طيبين
:))

Otherfeelings

Thoughts
So let's celebrate

And


Have anice day

:))