Monday, April 30, 2007

تسقط الحرية

تسقط الحرية الى بالمنظر دة
بجد انا متغاظة و جدا
انا مش هتكلم فى موضوع جديد.... فى ناس كتير اتكلموا فيه
بس بجد متغاظة جدا
حرية ايه يا ناس؟ الى تخلى الناس تجرح مشاعر بعض و بقصد
حرية ايه دى؟ الى بتخلى الواحد يتكلم فى مواضيع بتمس الشريعة و الدين
و كمان المجتمع و استقراره؟
مجتمعنا وحش؟
ماشى الكلام
مجتمعنا فيه فساد كتير؟
ماشى بردة
انما مجتمعنا دة هيبقى زباله بجد لو فضلنا نقلل منه تحت مسمى الحرية
و يبقى الكلام فى كل حاجة مباح
هى دى الحرية الى احنا عايزنها؟
حرية ايه الى بيها ممكن نبيح المحظورات ؟
حرية ايه دى؟؟؟؟؟
حاجة تارف
انا مكنتش اعرف ايه موضوع المدونات النظيفة دى
لحد من 5 دقايق اما شوفت مدونه بجد مش هعرف ادخلها تانى لانها بتنادى بالحرية
و كمان بتنادى بان المجتمع متخلف
و تقريبا صاحب المدونه هو الوحيد الى مش متخلف فى المجتمع
فيينادى بجميع الحريات و بيعتبر نفسة راقى و مش زى بقية الشعب
فبيحب يتكلم فى كل حاجة و بيحب قوى يسمع راى البنات عن المواضيع المطروحة
تحت مسمى صحفى و بيحب يتكلم فى مواضيع تخص الشباب
انا من دلوقت سوف انادى بنعم للمدونات النظيفة و الخاليه من البذائات

Thursday, April 26, 2007

المعامله

انا عمرى ما اتكلمت عن ديانه و لا عن مسلم و مسيحى
انا بحترمهم جدا
امبارح و انا بتفرج على الجزيرة لفت نظرى خبر معين
و هو ان اول مرة فى دبى يعملوا كتدرائية
و الموضوع عادى يعنى
بس الى لفت نظرى انهم كانوا بيعملوا لقاء مع الانبا شنودة
و اتكلم على اننا اخوات و مجهود مشكور من دبى الى عملت الكتدرائية دى
و فى الاخر قال كلمه حلوة
ان اكرمكم عند الله اتقاكم
عجبتنى بصراحة و قلت ان الراجل دة بجد بينادى بالاخوة بين الطائفتين
انه يستشهد يعنى بايه من القران الكريم
بس بعدها على طول قال ان الدين عند الله و سكت ثوانى و اببتسم و قال المعامله
: ان الدين عند الله المعامله؟؟؟؟؟؟؟؟؟؟؟؟
لا ان الدين عند الله الاسلام
مش كدة بردة يا اخوانا و لا ايه
احتمال اكون مكبرة الموضوع او فهمته بطريقة معينه
بس مجرد انه يقول ان الدين عند الله المعامله مش صح
المعامله صح بس لو الكلام عادى بيتوضح بيه فكرة معينه
انما الايه بتقول الدين عند الله الاسلام
والى خلاه يقول ان اكرمكم عند الله اتقاكم مكنش يقول الى بعدها و الدين عند الله المعامله
انا مش هفترض سوء النيه
و اقول عنه انه بيحاول يوقع الضغينه و الكلام الفارغ دة
بس على الاقل يعنى ميحرفش الكلم
هل دى آيه عند الاقباط؟؟؟؟؟؟؟؟
و لا ايه بالظبط و لا كان كل قصدة انه بيبن اننا اخوة و خلاص و جت معاه كدة
ارجو الافادة
صح و لا انا غلطانه
لو حد عندة تفسير يا ريت يتكلم و لو انا فهمة غلط يصححلى و اكيد اتمنى انى اكون غلط

Tuesday, April 24, 2007

اختار رقمك يا معلم

اختار رقمك يا معلم
بجد بجد لعبوها صح
حركة جامدة بجد و دعاية عن حق
انا طبعا هنا بتكلم عن الشبكة التالته للمحمول
و الى دلوقت منزله خاصية جديدة
انك ممكن تحجز رقم خطك و الى يعجبك عن طريق الموقع بتاعها
هأأأأأأأأو
هما عارفين ان الشعب المصرى يموت فى المنظرة و يموت فى الحاجة الغريبة
ابويا دخل عليا مرة و قالى بت يا رونا
قلتله اينعم يا ابتى
قالى واحد صحبى ورانى رساله عندة بيتقوله انه حجز رقم خط فى الشبكة التالته و ايه
كمان اختارة بنفسة و اختارة شبة رقمه الاولانى ما عدا رقم
بينى و بينكوا يعنى مع احترامى لابتى
بس مش عارفة بصتله بصة غريبة قوى
قالى بتبوصيلى كدة ليه يا بنت ال................ ما علينا ما علينا
المهم قلتله عادى
قالى ادخلى و شوفى الموضوع و احجزيلى خط
دخلت الموقع لقيت
فعلا الكلام الى بيقوله صح
قلت ابص لقيت ارقام و بيقولك اختار الرقم الى انت عايزة
و مقسمنهم ارقام فضى و ارقام ذهبى
تقريبا الذهبى ب 15 جنيه
و الفضى ب 10 جنيه
انا قلت خلينا فى الرخيص
و طبعا جة فى دماغى الاخ احمد سمير و الى اشترى خطة ب 1200
انا مش بقول كدة لا سمح الله لا علشان اغيظة ولا افرسة انا مش كدة
:))))
دخلت و اخترت رقم و لقيت الموضوع عادى انك بتحجز الرقم
و فى خلال 6 اسابيع بتروح تشتريه
بجد بجد عجبتنى الدعاية قوى فكرة جهنمية تحس انهم درسوا الشعب صح
عرفوا هو بينبهر بايه
و بينى و بينكوا الى غظنى الناس الى بتنبهر
و بتروح تغيظ بعضها انها خلاص حجزت رقم و الى على مزاجها
و يااااااااااااا يا ما نعيش يا ما نشوف و عجبى
و اخيرا و ليس باخر حبيت اهنىء ابتى و اقوله
مبروك الخط عليك يا ابتى

Wednesday, April 18, 2007

the way to success

iam back :))
sorry for being late but i was really busy
any way
all the suject which is the way to the success
or put away ur obstacles and
make ur way to success
is now on presentaions
see it
i hope u all like it and make use of it
like me
my best wishes to all of u

Wednesday, April 11, 2007

حطم قيودك و اصنع نجاحك




حطم قيودك و اصنع نجاحك
دة كان اسم برنامج تدريبى حضرته ممتاز و فوق الممتاز فى التنمية البشرية
بينى و بينكوا فى الاول مكنتش مقتنعة قوى بموضوع التنمية البشرية
او بمعنى اصح
محستش باهميته قوى
غير اما حضرت البرنامج دة
لقيته علم غريب بيعرض و بيشرح كل ما هو خاص بالذات البشرية
لقيته بيشرح كل جوانب الحياه و كل المواضيع.
البرنامج الى انا اخدته دة
كان بيشرح اهمية تحديد الاهداف فى حياتنا وطرق تحديدها على اسس
و اركان معينه منها بالترتيب الركن الروحانى و الشخصى و الصحى و العائلى
و الاجتماعى و الوظيفى و الترفيهى و اخيرا الجانب المادى و المالى
دى كلها اركان لازم و انت بتحدد اهدافك تبقى فى دماغك و تحددها على الاسس دى
و اتكلم على مهارات التحدى و ان مهما كانت تحدياتك انت بس الى تقدر تتغلب عليها وطبعا
كل حاجة باذن الله
كله نابع منك انت. من ذاتك انت.
وعرض بردة استراتيجية الهدف و العقل الواعى و غير الواعى
و كانت اول مرة اعرف اهميه العقل الاواعى فى حياتنا
دة هو اصلا كل حياتنا,, كل حاجة موجودة فى العقل الاواعى و هو بطبعته بيدى اوامر
للعقل الواعى فى اقل من الثانية
و بعد التحديد الخاص بالاهداف,, تيجى اهميه التخطيط
وانك استحاله هتعرف تحقق هدفك من غير تخطيط كويس.
واسس التخطيط بتقوم على الموضوعية و الشموليه و المرونه و الواقعية و التقدمية و التميز و التنبوء
طبعا و دة كان شامل ان اى حد يحب يفتح مشروع لازم يفكر بالطرق دى
بجد حبيبت قوى التنمية البشرية وسعت ادراكى و مفهومى للحياه
و غير كدة كمان عرفتنى انواع الشخصيات و كيفية التعامل معاها
بجد بحاول ديما اراقب الدورات دى و اى دورة فى اى موضوع بالنسبة للتنمية البشرية
هحاول باذن الله ان اتابعها وا حضرها
بجد مفيدة جداااااا
على فكرة المدرب كان الدكتور/ صفا مصطفى تلميذ نجيب
و ماشى على خطى الاستاذ ابراهيم الفقى
الى بدات اتابع كل برامجة و بردة استفيد منه
كويس ببعد شوية شوية عن النت يا خوانا
شكل كدة الطاقة الى عندى هتتوجه صح
ادعولى

Friday, April 6, 2007

تااااااج

تــــاج
طبعا التاج دة مبعوتلى من ريمو و طبعا زى العادة بتزنق انا فى مواضيع التاج دى
التاج المرة دى على موضوع الهوايات
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت
أثناء ممارستها
و طبعا هى قلبت عليا المواجع

الجيتار
هوايتى زمان كانت العزف على الجيتار
كنت ايام المراهقة بموت فى حاجة اسمها مصطفى قمر كنت بشوف الجيتار فى ايده بتجنن
اصريت انى اتعلمه
بعد كدة لقيت الموضوع اتغير طبعا عقلت و قلت ايه العبط الى كان الواحد فيه دة
انما عشقى للجيتار زاد قوى بس للاسف انى مكنش عندى الملكه
الى هى العزف السماعى كنت بستخدم نوته
كنت بقرا نوته كويس قوى طبعا غير اغانى مصطفى قمر الى كنت
حفظاها عن ظهر قلب
بعد كدة
لقتنى شغوفة قوى باغانى ام كلثوم و بعدها الموسيقى الغربية
love story -- god father-- romanza---romeo and gullite and so on

لانى كنت بستخدم احساسى مكنتش بعزف عليه و خلاص كنت بعزف

عليه بصوابعىو كمان باحساسى هيــــــه ايــــــام بقى كنت

بمسك جيتارى و بحلم و بعيش فى جو لذيذ قوى لوحدى و مع نفسى
بس للاسف مع مشاغل الحياه و الشغل
معتش بمسكه غير قليل قوى
و كمان ساعات كتير ببص عليه من بعيد و بس
الهوايه التانية :هى السفر

بحب السفر و خصوصا للبلاد الى فيها بحر و الى مش فيها بحر بردة مش بعتق

قلتلكوا عندى طاقة و مش عارفة اوجها صح بحب السفر جدا

و الخروج و المرواح هنا و هناك و مش بهمد
الله اكبر يعنى :))
الهوايه الى انا غرقانه فيها دلوقت الا و هى

النت زى ما انا اتكلمت عنه قبل كدة و الى شكله هيودينى فى داهية ربكوا ستار بقى
بس هى دى حكايتى مع الزمان


Tuesday, April 3, 2007

هوس النت

هوس النت
بصراحة كدة و الشهادة لله
انا مهووسة بموضوع النت دة
لسعت بجد
و اعتقد انه بقى مرض العصر
فعلا سلاح ذو حدين
بس الكمبيوتر كجهاز بقى من الحاجات الاساسية فعلا فى العالم دلوقت
انا مبعملش ابحاث. انا براقب نفسى و لقيت الموضوع زاد و رخم قوى
انا واحدة بصحى من نومى اول حاجة اعملها يعنى بعد الصلاة وكدة
اشوف ايملى
و اشوف البورصه و اخبارها
و محدش يسئلنى ليه؟
سيبونى انسى
ربنا الرزاق:((
باروح شغلى ولو فى اى وقت فاضى
اشوف ايملى و اخبار الدنيا على الجزيزة و العربية
و من الطبيعى انه بيتحرق دمك
ما علينا مش موضوعنا,,,
بعدها اروح البيت اشوف الايميل احتمال تكون فى حاجة جديدة دة
:))غير الشغل الى بعمله عليه
و السيرش و الاغانى و الابحاث و الذى منه
الواحد بيتعب يا خوناااااااااااااا
النت اخد من حياتى ووقتى كتير قوى
بس المشكله انى مش مضايقة و لا زهقانه
و هو دة الى هيجننى
المهم اخيرا و ليس بأخر
هذه بعض الحالات المماثله ,,,,,مش انا لوحدى الى مهووسة بالنت
طلع فى ناس كتيرررررررر