Wednesday, June 27, 2007

تاج و امرى لله

التاج دة جايلى من زمان من احمد سمير
و دة تانى تاج يجيلى منه و مش عارفة اهرب طبعا
استعنا على الشقى بالله
انت مين؟
ايه الاسئلة الغريبة دى؟
انا رانيا -مصرية ومحاضرة لغة انجليزية
مين اكتر 6 اشخاص بتحبهم؟
امممممممم
بصراحة هما 5
اختى و مريم
:))
انت سعيد؟
الحمدلله على كل شىء
مفيش حياه بتخلو من المشاكل
و اهى الحياه ماشية و حمدين ربنا على كل شىء
لو اجتمعت انا وحسني مبارك في غرفة واحدة؟
فى الحقيقة يعنى هقوله
اتق الله لكى يجعل لك مخرجا
لو معاك مليون ونص جنيه......تعمل بيهم ايه؟
امممممممممممممممممممممممممم
سؤال صعب
هشترى عربية و هعمل شركة كبيرة قوى قوى
و اوظف كل الشباب الى مش لاقى شغل دة
بس على الله يرضوا لاحسن الموضة الايام دى
ان الشباب قاعد فى بيته و بيبطر على الشغل الايام دى
و عجبى
بتحب مصر؟
قوى قوى
و نفسى تبقى احلى و اجمل و احسن و اامن بلد فى الدنيا كلها
بتحب البنات؟
مش عارفة السؤال دة ليا كبنت و لا اية النظام
بس انا هستعبط و هقول
طبيعى بحب البناويت
:))
انت مسلم؟
الحمدلله
ليه؟
هو ايه الى ليه؟
عارف اما كبرت شوية يعنى سالت نفسى هو ليه طلعت مسلمه
يعنى السن الى كل واحد بيقول انا طلعت كدة ليه؟
بس بعدها بتحمد ربنا انك طلعت مسلم و انك من امه محمد صلى الله عليه و سلم
مين اكتر شخصية ما تقدرش تستغنى عنها في حياتك؟وليه؟
الصراحة مفيش
كشخصية يعنى و قدوة و الموضوع دة بجد فعلا مفيش
اما لو اتكلمنا على ناس غاليين فى حياتى فعلا مقدرش استغنى عنهم هيبقى فى طبعا
ايه اكتر موقف محرج اتعرضت ليه في حياتك؟واتصرفت ازاي؟
كان عندى تقريبا 17 سنه
و كان فى فالنادى حفله شم النسيم
طبعا روحت متأنتكة و عامله البدع و عايشة بقى
و فى عز انتكتى اتكعبلت ووقعت و لقيت شاب هو الى شلنى كنت فى غاية الاحراج
دة غير التريقات الى سمعتها من صحباتى و من الشباب الى كان موجود
و لسه لحد دلوقت كل ما افتكر هتحرج جداااااااااااا
ايه الأمنية اللي بتدعي ربنا دايما انه يحققها لك؟
الستر
انه ديما يسترنى مش عايزة اكتر من كدة
تمرر التاج دة لمين؟
بصراحة مش ناوية اممرره لحد
كفاية الى بيحصل فيا
هعمله كمان فى الناس حرام
:))

Saturday, June 23, 2007

عايزة احكيلكوا على حاجة

انى قابلت واحدة كنت بعزها قوى

قابلتها من يومين كدة ,,طبعا انا كنت بعزها من قبل ما اشوفها بس اما شفتها حبتها بجد

بنت لذيذة فعلا و صافية و امورة قوى

البنت دى هى ريمو

قابلت ريمو و قضينا وقت لذيذ مع بعض هو ايوة كنا فى الشمس الحارقة

و تقريبا اتحرقت يعنى

:((

بس اهى عدت و بجد انبسطت قوى اما شفتها

على فكرة انا اول مرة اصلا افكر اقابل بنت

ما علينا ما علينا

بس اهى حصلت و محدش يفهمنى غلط

:)))

Tuesday, June 19, 2007

نفسى افضفض
نفسى احكى و مش عارفة
حاسة باحساس غريب
تعبااااانه قوى و مش عارفة اتكلم
كل ما اجى اتكلم دمعتى تغلبنى
قلت اكتب اكيد الكتابه هتبقى اسهل من الكلام
معنتش بعرف احس
احساسى جمد
ايوة بجد جمد قوى
حزينه
حزينه قوى
مشاعر متناقضة بقت فيا
مش عارفة اسميها
بقالى فترة مش عارفة اعيش
مش عارفة اكل و لا اشرب معنتش عارفة اضحك
مش عارفة حتى اعيط
حسيت انى بقيت قاسية قوى
حاسة انى انا معنتش رانيا بتاعة زمان
جمدت كل حاجة فيا بقت جامدة من غير احساس
مخنووووووقة بطريقة فظيعة
مش عارفة اعمل ايه
بدعى ربنا يفرجها عليا و يزيح عنى الى انا فيه دة
بقيت بكرة نفسى بقيت مش حاسة انى استاهل اعيش من اصله
الى يقرا كلامى يدعيلى ان ربنا يفرجها عليا بس يدعى فى سرة انا شايله التعليقات

Friday, June 8, 2007

عن عمل المرأة قالوا

عن عمل المرأة قالوا
بردة رساله وصلت من المجموعة الى بحبها جدا
الفاجومى
و كانت بتتكلم عن عمل المرأه بصراحة و كانت بتشرح ازى ان عمل المراه هادم للبيت
بصراحة فكرت مع نفسى فى الموضوع دة و قلت
هل فعلا عمل المراه دة بيضيع الاولاد و بيهدم البيت؟؟؟؟؟
لقيتنى بطلع مميزات و عيوب للموضوع
و بما انى مش عارفة اشرحها كلها فى المجموعة و محدش فاهم وجه نظرى بالظبط
فقلت اكتبها و اشرحها فى مدونتى و اعمل الى انا عايزاه
:))
الموضوع فعلا له مميزات و عيوب بس الموضوع مش متوقف على
ان المراة لو اشتغلت يبقى خلاص بيتها اتهدم و عيالها ضاعوا
الموضوع بس محتاج تنظيم فى الوقت مش اكتر
و دة الى ممكن يفرق سيدة عن اخرى
انا لو بشتغل و محددة وقت معين لشغلى و برجع اشوف طلبات بيتى و بعديها طلبات زوجى
و اولادى يبقى خلاص فين المشكله؟؟؟؟؟
و فى امهات قاعدة فى البيت و عيالها ضايعة و بردة فى امهات برة البيت و عيالها طالعة من المتوفوقين
بش مش هتكلم على موضوع بره البيت دة لان فعلا الام مش لازم تبقى بره البيت كتير
يعنى لو ساعات العمل العادية و بترجع تشوف حالها يبقى خلاص
اعتقد ان معظمنا امهاتنا بيشتغلوا و اتربينا بردة احسن تربية
الام مهمة جدا فى البيت ’’ايوة طيب ماهو الاب كمان مهم و جداااااااا
انما يقولولك الام لازم تذاكر لعيالها و لو اشتغلت مش بتبقى فاضية
لا اله الا الله
طب ماهو طيعى انها تذاكرلهم
الام بتشتغل او مش بتشتغل بتقعد تذاكر و طبعا بجانب الدروس و محدش بقى يقولى
ان الام لو قعدت يبقى مش لازم الدروس
احنا بنبص للموضوع من بعيد ليه
انا عن تجربة شخصية
مامتى بتتشغل من بعد الجواز و جابتنى انا و اخواتى و عمرى ما حسيت بموضوع
انها مقصرة معايا بتشوف طلباتنا كلها و بنخرج و نروح هنا و هناك
و دة كان بيغظنى كانت بترجع من شغلها الاقيها مش بتقعد بتعمل دة و دة و دة
و فى الاخر بتقولى يلا هاتى كتابك و بما انى مكنتش بحب المذاكرة
كنت بقولها انتى مش بتشتغلى مش خلاص
يا ستى هنبقى اذاكر لوحدى
الاقيها جابت العصايه و تقعد تذاكرلى
قهر يعنى
ما علينا متفكرونيش بذكريات مؤلمة
:((
و اعتقد ان الموضوع مش عند مامتى و بس,, امهات كتير كدة
و بردة من ناحية تانية مش هنكر ان فى امهات فى طبعها الاهمال و السبب دة مش لانها بتشتغل
لانها هى كدة اصلا
بيقولولك المرأه العامله و الشيطان
و انها بتتعرض للمضايقات فى العمل
مين قال يا جماعة ان المرأه العامله بتتضايق و بتتعرض لمثل هذة المضايقات؟؟؟؟
و بعدين الشغل هو السبب؟؟؟
يعنى كل التحرشات الى بتحصل بتحصل للستات او الفتيات الى بيتشغلوا بس؟؟
طيب و البنات الى مش بيشتغلوا ؟
طيب و الستات الى راحة تجيب حاجات بيتها مش بتتعرض بقى ولا ايه؟؟؟؟؟؟؟؟
و بعدين قلتها قبل كدة ان المرأة بتحب تحقق ذاتها
و بتحب تبقى راضية عن نفسها لو كانت راضية عن نفسها هتنفع بيتها و اولادها و جوزها
و لو مكنتش راضية عن نفسها و اتسجنت و بقى عندها وقت فراغ هيعيش الزوج و الاولاد فى نكد ازلى
طب ليه نخلى طاقة الست المدفونه دى تطلع فى التفنن فى النكد و الرخامه
و الرغى فى التليفون و المجايب فى سيرة دى و دى
طيب ما نخليها تتطلع فى حاجة مفيدة تستفيد هى منها و اودلاها كمان و بيتها و زوجها
و اكيد شرط مهم انها متقصرش مع اى حاجات من الى قلتها من شوية
نديها الفرصة
و اخيرا يا ريت بلاش نقول زوجات الصحابه و اهل البيت
جميل طبعا الاستشهاد بيهم
بس فى ناس بتشتهد بالحاجات الى على مزاجها و بس
كل زمن مختلف دة اولا
ثانيا احنا مش مثاليين يعنى قوى علشان نتمثل بقول الرسول و نقول سنه و لازم و حرام
و طبعا لازم نحاول نكون نصة او نعمل على الاقل زيه
بس يعنى اعتقد
اعتقد ان معظم الرجاله الى بيتكلموا عن الرسول دول اساسا مش بيعملوا زيه
و بقول معظم و مش بعمم
بس بيخدوا الى هما عايزينه و يسييبوه الباقى
اديكوا مثال
واحد بيأكل بايه بياكل الرز بايده و تسأله ليه بتعمل كدة ؟؟؟
يقولك اصل الرسول كان بيعمل كدة
الرسول كان بياكل بايده
طيب ماهو علشان مكنش فى معلقه
ثانيا هل انت اصلا بتعمل زى الرسول بتصوم ؟ بتصلى السنن؟ بتتحدث بمثل طريقتة ؟
معتقدش
يا ريت كل واحد يفكر بوجهة نظر موضوعية
و لا ايييييييييه؟
و يكون عادل
انا ممكن اشرط على مراتى انها ان اشتغلت متقصرش فى بيتها و ان قصرت اقولها اقعدى فى البيت
اظن دة حل عادل يخلينى احقق ذاتى و كمان مقصرش مع الى معايا
تقريبا خلصت الى كنت عايزة اقولها و عموما لو افتكرت حاجة تانية هبقى اكتبها
:))

Saturday, June 2, 2007

باركولى

باركولى
تم بحمد الله افتتاح مكتب
specialist
the way to success
اخيرا يا جماعة اخيرا و الحمدلله
فتحته
فتحت مكتبى اخيـــــرا
مكتب للغات و الترجمة
بعد ما كنت خلاص هفقد الامل
هو صحيح بعيد شوية ,بس ميهمش
اهم حاجة انه الحمدلله اتفتح
و بردة هارجع و اقول اطلبوا العلم و لو فى الصين
:)))
و انا اعتقد انى اقرب من الصين بشوية
و بمناسبة الافتتاح هضطر اعمل خصم لكل واحد تقريبا حوالى يعنى 3 %
يــلا ان شالله ما حد حوش
:(((
تحديث
المكتب بتاعى فى الغربية
و شهاداته معتمدة دلوقت و الحمدلله التليفون : 5720107/040
012/6300256
و الخصم بجد مش هزار و يزيد كمان و امرى الى الله
ولو اى حد عايز حاجة يبعتها على الميل
specialist_forus@yahoo.com
و اوعوا تفتكروا انى بعلن و لا حاجة
حاشا و كلا:)))