رساله قصيرة
الى كل اللى بيهتفوا باسم محمد البرادعى
و بيحبوا مصر و عايزنها تتغير
و يعملوا اصلاح شامل و يغيروا الدستور
هايل
اقول لهم تعرفوا ايه عن البرادعى و تتوقعوا ايه
و هو فعلا امل مصر ؟
لا انا هشيل نفسى من مصر اللى بتتكلموا عنها دى
طيب ما انا لو نويت ارشح نفسى رئيسة
هقول انى هغير بردة
و حسن لو بقى رئيس هيقولك هغير
و لا حد بيغير و لا حد بيفتكر الكلام اللى بيقوله
و محسن هيغير بردة
مين محسن ده ؟؟!!
ما علينا
الامل فى الله اولا ثم فينا احنا يا شباب مصر
متتوقعوش تغيير غير منا احنا
احنا اللى هنرفع البلد دى و هنغير البلد دى
بايدنا احنا مش بايد حد
بجد حاجة بقت تصعب على الكافر
بقينا بنجرى ورا حد و خلاص اى حد منتظرين منه تغيير
جميل اوى بس انتوا فين من التغيير و هل فعلا هو هيغير
هيغير ايه حال البلد
طيب و حال ال80 مليون مصرى هيتغيروا ازى
و لا كمان هتنادوا بانه لازم يغير حال الشعب
فين ايمن نور ؟ اللى كنتوا عايزينه يغير البلد ؟
راحت عليه
فين علاء مبارك اللى فى شوية طلعوا رأى
و فكرة غريبة بانه هو احق من اخوة ؟؟!!!!
لا و الله ؟ شوف ازى؟
بقينا كل يوم بفكر و كل يوم بحال و اغنيه بنغنيها بينا و بين نفسها
بنكدب و بنصدق نفسنا
لحد ما نوقع من كتر الضحك على نفسنا
انا هنا بكتب فى مدونتى يعنى انا حرة فى اللى بكتبه
علشان محدش يقولى انى ضد الشرفاء و حقودة و غلاوية
و مبحبش التغيير
لا بحبه على فكرة
غيروا بقى
