Monday, July 23, 2007

فى حاجة غلط؟



محمد منير مطرب فعلا جامد
وصوته مليان مشاعر و احساس
و منكرش ان له اغانى بجد بحبها جدااااااااااا
بس يعنى اما اسمع ان شارع الاوبرا مليان لعينه ناس والناس مش عارفة تمشى هناك
و ان فى تقريبا حوالى 22 الف مواطن ريحين حفلته
مش دى بردة حاجة تغيظ؟؟؟؟؟؟؟؟؟
من فترة لقيت فى التليفزيون
بيحكوا و بيتحاكوا على حفله محمد منير
و ان فى 22 الف شاب راحوا الحفله
و ايه تشوفهم فى التليفزيون فى لقائات
الى يقولك اةةةةةةة محمد منير الملك
و الى يقولك مفيش حفله بفوتها لمحمد منير
ومفيش زيه و هو و هو و هو و هو
هو ايه يا خويا دة؟
انا مش بتكلم على منير كمطرب بس بتكلم على
يعنى اما 22الف شاب يروحوا الحفله
دة انا لو قلت يا ناس فى بكرة ندوة ثقافية عمر ما العدد دة هيجى
و لا قلت فى حمله تبرع و لا بتاع
دة حتى مشفناش العدد دة فى اى مظاهرة ليه؟
الا هو الموضوع عادى وانا الى عامله من الحبة قبه؟؟؟؟؟
و لا فعلا فى حاجة غلط؟؟؟؟؟؟؟؟؟

12 comments:

اسكندراني اوي said...

لا مافيش حاجه غلط
بس انتي مش واخده بالك
اصل منير دا له افضال على شباب كتير اوي
وبعدين انتي عارف شبابنا ماشاء الله عليه كل مشاكله اتحلت يبقى ليه بقى مايرحش يفك دماغه ويفرفش

maro said...

العيب مش فينا كا شباب انا مش بدافع عنهم بس برده ما هما عارف لو مشيوا فى مظاهرة مش هيناموا فى بيتهم
و لو راحوا الحفلة التلفزيون و الاعلام هيصور
يبئه برده معاهم حق انهم مش يمشوا فى المظاهره
لانهم عارفين ان الحكومه بتعمل اللى هى عوزاه

Rania said...

اسكندرانى قوى
كلامك عين العقل
كان تايه الكلام عنى فين؟؟؟؟؟؟
تحياتى و يا رب ترجع لاهلك بالسلامة
و البلوج بتاعك فوق الهايل
:))

maro
اسمك عزيز علياااااا
الموضوع مش موضوع مظاهرة بس يا مارو
الموضوع ان الاهتمنام البالغ دة و الفلوس الى بتدفع دى يعنى
مستخسراها تبقى فى حفله لمغنى
بعيد بقى عن ان يكون المجهود فى مظاهرة او حتى فى ندوة ثقافية او تبرع بالدم
و لا اييييييه؟
شرفتنى زيارتك

غمض عينيك said...

انتي عارفة انا استغربت اوي بردو من الرقم.....22 الف واحد كتير اوي بردو
هو منير مطرب ممتاز اه بس الرقم كبير اوي على حفلة


تحياتي ليكي
محمد سمير

kareem said...

هاااااااى
متشكر على زيارتك ليه و معلش اتاخرت في زيارتي ليكي

اما بالنسبة للموضوع بتاع الحفلة فعاوز اقولك حاجه , ان كل شىء دلوقتى بقا يتعمل زيادة عن اللزوم
يعنى لو تهريج و كوميدا و تهيس دلوقتى بقا اوفر قوي , و لو تدين و تزمت برضة بقا اوفر قوي
متهيالي مبقاش فيه وسطية دلوقتى و اكيد ده شىء مش صحي ابدا

بس اكيد فيه مشكلة بيعاني منها الناس هنا و خصوصا الشباب

ربنا يستر علينا

تحياتي
كريم عزمي

Mohie said...

بدايه احييك على البلوج الرائعه دى واحب اقول راييى ان الشباب حاليا بقى بيهتم بالحاجات السهله بمعنى انه مابقاش يعمل حاجه غير يا اما يتابع اخبار الممثلين والمغنيين ويتابع كل الافلام ويحضر كل الحفلات يا اما يتجه للكوره ويتابع الماتشات والدوريات المختلفه هو ده مش غلط بس عييب لما تكون حياتنا دى اهم حاجه فينا....؟

MOHIE said...

بدايه احييك على البلوج الرائعه دى واحب اقول راييى ان الشباب حاليا بقى بيهتم بالحاجات السهله بمعنى انه مابقاش يعمل حاجه غير يا اما يتابع اخبار الممثلين والمغنيين ويتابع كل الافلام ويحضر كل الحفلات يا اما يتجه للكوره ويتابع الماتشات والدوريات المختلفه هو ده مش غلط بس عييب لما تكون حياتنا دى اهم حاجه فينا....؟

يا مراكبي said...

طبعا فيه حاجة غلط .. أنا برضه بحب أغاني منير جدا لكن تهافت الشباب بالشكل ده والعدد ده بيدل على حاجات كتير مش كويسه لأني متأكد إنهم لا يمكن يتجمعوا بالعدد ده ولا الإهتمام ده في أمور جادة أبدا .. للأسف

بحب السيما said...

برغم كل تحفظاتى على منير وشطحاته وغروره احيانا الاانه يظل حالة موسيقية اسعدنا حظنا ان نعاصره حيا
فمبالك بقى بحفلة لايف
جو صعب جدا يحسه غير اللى عايش فيه
وخصوصا لما يكون منير عالى ومظبط الاداء
انا واحد من ال 22 الف اللى انتى مضايقة منهم دول
ومش شايف ان الموضوع فيه غلط ولاحاجة بس انتى اللى مكبرة الموضوع حبتين

محمد ياسر said...

و انا واحد برضه كنت من ال22 الف دول بس مش ده المهم


الغريب انك جاية على منير اللى هو بيغنى بجد للناس مش بيغنى عليهم زى تامر وناس تانية كتير و بيحضروا ليه الاف برضه يعنى منير يعتبر مطرب مثقف و الكلمة دى متنفعش لاى مطرب تانى حاليا للاسف و كمان هو بيغنى للناس بكام يعنى شوفى باقى المطربين اللى حفلاتهم بيعملوها بالمئات من الجنيهات و فى اماكن مش لاى مستوى من الناس

و من جهة المظاهرات انا واحد كنت بحتمل ايجابتها لحد ما اكتشفت انها ملهاش اى لزمة و عن الندوات و الحاجات دى تأكدى ان عدد كبير من جمهور منير دماغه فى الندوات و فى الثقافة برضه و لاحظى ان الحاجات دى كمان مش منتشرة اصلا عايزة اللى ناس تدور عليها عشان توصل لندوة ولا حاجة

انا قلت رأيي و من حقك الاختلاف طبعا و اسف للاطالة

تحياتى وكل الود

Hashim said...

انا مش من هواة الحفلات عشان محدش يقول انى متحيز ل رأى او ل اخر بس اللى عاوز اقوله ان لكل منا اهتماماتة يعنى احنا علقنا على الحفلات و سبنا الاف اللى بيروحوا الاستاد و الاف اللى بيروحوا الاوبيرا او السينمات و المسارح القومية او غيرها. و حتى لو غلطوا كل دول ف اساسا احنا شعب يسودة حالة من الاحباط من الاسعار المولعه نار و صفر المونديال و التعليم و اقتصاد البلد اللى ف النازل ف ياريت نسيب الشعب ف حالة بجد كفاية اللى هوا فيه. نسيبوا يتنفس شويه عشان يعرف يعترض و يصحح الاوضاع اللى هوا فيها. و اسف لو طولت عليكوا

Anonymous said...

زى ما 22 الف واحد بيروحو حفله لمنير فى 10000000 واحد بيروح ماتشات النادى الاهلى و 22 الف بروحو لعمرو دياب
و 22 الف بيروحو يتبرعو بدهم
و 22 الف بيروحو ندوات ثقافيه
ما تقولش انا لو قولت فى ندوه ثقافيه حد هيجى
لا جرب اعمل ندوه ثقافيه
و سيب رايك لنفسك و سيب منير و الناس الى بتحبه معالان كل واحد حر فى نفسه