Wednesday, September 19, 2007

فكرت فيها

انهاردة كان عندى امتحان ترجمة
روحته و انا بصراحة مليش نفس و لا حتى مزاج انى اترجم
و التكييف هنجنى, اصلى بتعب منه
المهم الامتحان كان طبعا شامل سياسة و اقتصاد و ترفيه و رياضة و الذى منه
بصراحة الامتحان دة كان عايزله كوبايه نسكافية جامدة
المهم
دة مش الموضوع الى عايزة اتكلم عليه
المهم فى الوقت الى كنت مهنجة فيه
و انا بترجم و عايزة اخلص, بقى دة غير
انى بقيت عايزة اضرب نفسى شوز و لا مؤاخذة انى روحته انهاردة
لقيت الترجمة السياسية
مقال للاستاذ بصراحة مش فاكرة اسمه تقريبا رفعت رشاد
المهم
كان المقال عنوانه رآى
رايه هو عن ثقافة الانتخابات فى الحزب الوطنى
و لقيت يا اخونا عنيا فتحت و مركزة مع المقال كلمه كلمه
بصراحة كلامه فكرت فيه و يعنى حسيت انه فى شىء من الصح
مش كله طبعا
المقال بيتكلم على ان الحزب الوطنى هو الحزب الوحيد الى بيعمل انتخابات
بينادى بالديمقراطية و بيعمل الانتخابات
بعيد بقى عن ان الانتخابات مزورة او حتى معروف نتيجتها مسبقا
الراجل اتكلم على ان الاحزاب التانية او المعارضة
الى ديما بتنادى بالديمقراطية
كلهم ناس قاعدين و متثبتين فى كراسيهم محدش عايز يسيب كرسيه لاحد القيادات الشابه
الى ممكن فعلا تدخل نظام و ثقافة جديدة للاحزاب
كل واحد عايز نفسة و بس
و بيكمل الاخ فى المقال ان الحزب الوطنى هو الحزب الوحيد الى دلوقت بينادى بثقافة الانتخابات
و بيضيف ان ممكن تبقى دى خطوة على طريق الديمقراطية الحقيقة
على طول يا اخونا جه فى دماغى الى حصل من فترة فى الحزب الناصرى
من خناقات و تزوير و اختفاء لكشوفات
فاكرين؟؟؟؟؟؟؟؟؟؟؟؟؟
فى مرة اتكلمت مع صديق من الحزب الناصرى محامى هو
قلتله انت فى حزبك بتنادى بايه؟
قالى بصى يا رون
احنا لو مسكنا البلد هنخليها زى ايام عبد الناصر هندى لكل واحد حقة
و هتعم الديمقراطية و الكلام الحلو الى كلنا عارفينه
رديت عليه على طول و قلتله
امال ايه بيحصل عندكوا دة فى الحزب؟
انا طبعا مش ضد الحزب
بس الى حصل و اختفاء كشوفات و خناقات مرشحين مع مرشحين
ضايقنى قوى
قلته يا متر انتوا لسه ممسكتوش الحكم و بتعملوا كدة فى بعض اومال اما تبسكوة هتعملوا ايييييييييه؟
دة كله بصراحة جه فى دماغى فى الامتحان
بتاع انهاردة
قلت احتمال فكرة او ثقافة الانتخاب دى فعلا فى المستقبل تعمل حاجة
تخلى الكل عندة استعداد للتطور و للديمقراطية الحقيقة
الى هى مش كلمه و بس
كل واحد بينادى بالديمقراطية يا ريت يراجع نفسة الاول طبعا بتكلم على الكل
هل هو ديمقراطى فعلا هل هو عندة استعداد انه فعلا يطور نفسة من اجل وطنه بجد؟
المهم
طبعا الوقت عدى و لا خلصت الامتحان و لا بتاع
و كل عام و انت بخير
:((

8 comments:

Anonymous said...

انشالله عقبال ما تأسسي الحزب الرانيوي التقدمي التفزعي :))
يا ريت ثقافة الانتخابات الايجابية تعم عندنا في الاردن لان هنا الاختيار بيتم على اساس عشائري بحت بغض النظر عن الانتماء او الفكر او العقيدة..

غمض عينيك said...

مصر في دوامة
لا اللي ماسكينها عايزين يصلحوها
ولا اللي عايزين يمسكوها ينفعوا يصلحوها

كله بيدور على مصلحته وبسسسس

وبجد بجد اي واحد سياسي محترم مش هيربط نفسه باي حزب
احنا معندناش ثقافه حزبيه اساسا

ربنا يستر ع اللي جاي

تشيك كيير
محمد سمير

ذو النون المصري said...

لا اعتقد ان اي حزب مصري حاليا ممكن يكون فعلا مؤمن بالديمقراطيه الحقيقيه
هم يقولون ذلك الي ان يحكموا فقط
كل سنه و انتي طيبه
تحياتي

اسكندراني اوي said...

انا للاسف لا اتعاطى سياسه لا من قريب ولا من بعيد
فليس لي ان اعلق لا على انتخابات ولا غيره

لكن حعلق على الفكره نفسها
احيانا كتير بتيجي حاجات قدامنا تخلينا نفكر
قد يكون موقف او كلمه
او مقال في حالتك دي

فنقول ايه رب صدفه خير من الف ميعاد

لكي كل التحيه
وكل سنه وانتي طيبه

سكوت هنصوت said...

أولا

فداكي ميت إمتحان

ثانيا, طبعا كلام الأستاذ رشاد ده سم في العسل...يعني لا مؤاخذة إيه قيمة الإنتخابات لو هي مزورة, لا على الأقل الي ما بيعملوش خالص...عارفين انهم غلطانين, لكن الي بيزوروا دول...حجتهم جاهز و بجحا...

ثالثا بقى...انا نفسي اشوفك معانا في أبناء مصر

الموقع هو www.abna2masr.com

والميل بتاعي موجود في مدونتي...

ارجو انك تراسليني لو ليكي رغبة في الإنضمام

تحياتي

Rania Lelah said...

عمار جرار
الدول العربية كلها مفتقرة الى الديمقراطية يا عمار
ربنا يرحمنا

غمض عنيك
صح يا محمد
و انا بفكر لقيت ان فعلا مفيش حزب مناسب فى مصر ينفع يمسك البلد
كلهم مش مناسبين و طبعا على راسهم الفحزب الحاكم
شرفتنى

ذو النون المصرى
و انت طيب و رمضان كريم

اسكندرانى قوى
و انت طيب يا اغسكندرانى
ممكن طبعا
هو بصراحة مع انى مكنتش فايقة
بس المقال اخدنى قوى احتمال الفكرة نفسها
يعنى
ربنا يهدى
تحياتى

سكوت هنصور
اولا
يا رب يخليك
صح فداى ميت امتحان :))
ثانيا الفكرة مش فى المقال نفسة لا فى الفكرة الى هو قالها الانتخاب
هو قال ان الحزب بيعمل انتخابات حتى لو كانت مزورة انما فكرة الانتخاب ادم موجودة يبقى فى امل يبقى فى المستقبل ديمقراطية بجد
ثالثا بقى
انا بعت ايميل فعلا على ابناء مصر بس لسه مجاليش الرد لحد انهاردة
منذر كان بردة عامل اعلان عن الموقع و ربك يسهل اكيد هشترك فيه باذن الله
تحياتى و شرفتنى
و كل سنه و انت طيب

محمد عبد الغفار said...

منتفعين

مصطفي النجار said...

أسوء النفاق نفاق
الصفوة وعلي رأسهم
اساتذة الجامعات
بس عادي كفاية
علي الدين هلال
نبص عليه
ونعرف يعني ايه هو النفاق