Thursday, May 3, 2007

اهرام - اخبار- جمهورية

زمان كنت ديما بشوف ناس بتعدى بعجله كدة
و يقولك اهرام- اخبار- جمهورية
على راى ماجدة فى الفيلم بتاعها الى انا مش فكرة اسمه
ما علينا
اتعودت و انا صغيرة اسمع الراجل و الى كان اسمه عم احمد
ينادى و يقول اهرام- اخبار- جمهورية و الناس تروح تشترى منه
او حتى يبصوا من البلكونه و هو يبعتلهم الجرنال
دلوقت اختلف الموضوع دة
يعنى الراجل بقى بيحط الجرايد يا على الارض يا فى كشك
و الناس بتروح تشترى منه
دة غير المجلات الاباحية و الى بتتباع باسعار رخيصة جدااااااا
قال يعنى تشجيعا للشباب
بس الى لاحظته فى الاونه الاخيرة و الى هو سبب انى بكتب دلوقت
ان معتش حد بيشترى الجرنال
كل الناس قاعدين مش بيعملوا حاجة و الجرايد زى ما هى
يعنى و لا الاهرم و لا الاخبار و لا الجمهورية دلوقت حد بيعبرهم غير قله قليله مندثة بين الجماهير
و دة الى عرفنى ليه كانوا عايزين يغلوا سعر الجرنال
اكيد طبعا علشان الخسارة الكبيرة الى بيتعرضولها كل يوم
المهم لفت نظرى انهاردة موقف غريب
انهاردة رايحة الشغل عادى يعنى و لقيت عربية نص نقل
على سطحها جرايد كتير قوى و مجلات
و اسمع بقى يا سيدى
الو الو الو 1 -2- 3
ايوة اقرا الحادثة الشهيرة الى كانت فى بلد فلان
و اقرا احداث مثيرة فى الحياه السياسية
و اقرا كمان زواج السيد جمال مبارك
و اقرا فى هذا العدد الخاص
زوجة تقتل زوجها و تلقى به فى المصرف
و ايضا فى هذا العدد
اشهر ابشع الجرايم التى حدثت فى الاونه الاخيرة
العثور على جثة مجهوله مفصوله الراس و العثور على هذة الرأس فى ميكروباص
الكشف عن اقوى شبكة للمش عارف ايه؟
يا نهار ازرق
ايه دة؟؟؟؟؟؟؟؟؟
طبعا انا ماشية مش هقدر اوصف حاله الاشمئزاز الى كانت عندى
و عند الناس الى هما راييحن و جايين
و الى بردة كانت الساعة تقريبا 9صباحا
يعنى اصتباحة عسل العسل
هى دى المواضيع الى ممكن تخلى الناس تشترى الجرنال؟
و كمان بالطريقة الاستفزازية دى؟
تفتكروا الدعاية دى هى الى هتخلى الناس ترجع تانى تشترى الجرايد و المجلات؟
و لا المواضيع الى مكتوبه فى الجرايد هى الى هتخليهم يرجعوا يشتروها تانى؟
فى رايى الشخصى
و لانى كنت شايفة منظر الناس انهاردة معتقدش ان الطريقة دى هتنفع
و لا ايييييييه؟؟؟؟؟؟؟؟؟

32 comments:

عمار جرار said...

هاي رانيا ازيك..؟
اكيد راح يجي حد يخترع طريقة جيدة لجذب الناس لشراء الجرايد والمجلات
فمثلا عندك الواد اللي اسمه سعد الصغنن (الصغير) اخترع طريقة تخلي الناس تشتري الفاكهة بطريقة مشجعة وهي انه غنى اغنية بصوته وقال :"العنب العنب العنب.." وعلشان يقوي الدعاية بتاعته جاب الراقصة "دينا" في الكليب الفكهاني ده وبالطريقة دي بقت الناس تحب العنب !!
نفس الشئ يمكن حنسمع اغنية بصوت شعبوله يقول :"اسمع اخر خبر.. اسمع اخر خبر.. وايييييييييييييييه "!! واحتمال يصور الاغنية ويجيب الراقصة "كوناليزا رايس" في الكليب بتاعه وتبقى اغنية منيلة
هههههه
تحياتي

•«ρяoιd»•™ said...

ما خلاص بقي

بقينا نقرأ الجرايد من علي النت

و كمان جاريد الحكومه اخبارها بقت معروفه من قبل ما تنزل

اللي هما اخبار اهرام جمهوريه يعني

ربنا يرحمنا يا رب

تحياتي

THE BIG LOSER said...

حكاية ان الجرايد مابتقش تتقري فدا لوجود اكترمن سبب
النت
الستالايت وخصوصا الجزيرة
الاخبار اللى بقت شبة بعضها وكلها قتل ودم وزفت
محدش بقا يقرا جرايد
وفية اساليب كتير بتطلع عشان تسوق الجرايد
واذا كانت الجرايد الرسيمة مابتتبعش يبقي عاوزة الجرايد الصفرا تتباع
لازم يعملو اكتر من كدا كمان
جربي كدا تقعدى في المترو وتشوفي الجرايد الصفرا دى بتترمى على الرجلين ازاى وكانة بيقولك هتشتري يعني هتشتري ويا سلام لو قلت مش عاوزة بيبصلك بصة كانك مالكيش في الثقافة او الانحطاط اللى موجود في الزفت اللى بيبيعه
عادى بقا

زحل الفلكي said...

والله حكاية الجرائد اللي مش بتقرأ دي لسببين
اولهم انه نزل جرائد تانيه بتخاطب دماغ القارئ اللي عايز يقرأ حاجه كويسة
وعلشان كده الجرائد الحكومية مش بتبيع كويس
الحاجة التانيه النت منا خلاص بقيت بعرف اخبار الماتش وانزل الاجوال والاعادات واتفرج عليها واجيب التحليل والوصف التفصيلي
وكذلك الحال بالنسبة لكل الاخبار التانيه
علشان كده بدأنا نبعد عن الجرائد
لكن الجرائد بقا الاصول تشوفلها سكه تانيه تعرف توزع بيها
واللي يفكر مش حيغلب

masry said...

أعتقد سبب عزوف القراء عن شراء الجرائد الرسميه ثلاثة أسباب علي سبيل المثال لا الحصر
أولا: هذ ه الجرائد لا تعكس هموم الشعب هي بتتكلم عن شعب تاني أو مصر اخري فطبيعي أن يعزف الناس عنها
ثانيا:ظهور جرائد مستقله تنطق بلسان الشعب وتعكس همومه وطموحاته من ثم كان هذا من شانه سحب البساط من تحت أقدام الجرائد الرسميه
ثالثا:كثير من القراء أصبح يتابع الصحف والمجلات من علي شبكة المعلومات هذا فضلا عن سيل من القنوات الفضائيه
لا تترك شئ الا وطرحنه, ولا ننسي أيضا أن هناك شريحه كبيره من القراء وخاصة الشباب ميزانيتهم لا تتحمل صرف60 جنيه علي الاقل شهريا لشراء الصحف علي فرض أنه سوف يشتري جريدتين فقط في اليوم لكن لو فكر يشتري مجله او كتاب أعتقد أنك سوف تجديه واقفا علي باب المسجد ليس لللصلاة ولكن بيشحذ من خلق الله

Esmeralda said...

محدش بيقرا دلوقت يا رونى
الناس عارفه اللى فيها خلاص
اللى يعيدوه يزيدوه
و اللى عايز يقرا عايز ساسبينس

REEMOO said...

طيب تصدقى انى اعرف ناس بتشترى الجرايد علشان تقرى الحوادث وبس
فعلا فى ناس كده
وفى نوعيه بتستهويها الحوادث والقرف ده
له فى خلقه شؤون

Rania said...

عمار
ازيك انت فينك من زمان
هههههههه
شكلك متابعنا قوى و متابع الفن الاصيل بتعنا يا عمار
تحيتى لك و متغبش كدة تانى

proid
عندك حق النت بقى فيه كل حاجة
و الجرايد الحكومية بالاخص بقت على رايك معرفوه بتينلك ان مصر جنه و ان الحكومة بتكافح من اجل الشعب و مفيش مشاكل خالص
و و و و و
اتحفظم يعنى
شكرا لزيارتك

the big loser
تعرف انا مجربتش موضوع المترو دة محصلتش معايا يعنى
بس الى شوفته ان الناس بتدخل الاتوبيسات و تمسك الجرايد الصفرا و تقولك
يلا
شوف معايا
الممثله مش عارف ايه ظبطوها فين
و اقرا كمان
الممثل مسكوه فى المحل الفلانى
على ريك بقى عادى بقى
تحياتى

زحل الفلكى
صح كلامك بالنسبة للحل الاولانى
و طبعا مش كل الشعب بيعرف يدخل نت و يقرا الاخبار
انما كله يعرف فعلا يشترى الاخبار الى بتتكلم فى حقائق و مشاكل الشعب بجد
من غير و لا تزييف و لا مجامله للحكم
تحياتى

Rania said...

masry
صح و علشان نقرا حاجة كويسة دلوقت كلنا نقف قدام الجوامع
فعلا موضوضع الجرايد الى بتتكلم على مشاكل الشعب فعلا هى دى المتداوله الايام دى
الشعب بتاعنا معتش غبى عرف يفرق بين الزييف و الكذب و بين الجرايد الى بتتكلم على الشعب بجد و طوحاته و مشكله
على الاقل بتقول الحق
منور

esmeralda
فى و الله بيحبوا يقروا بس فعلا الجرايد الحكومية معنتش بتجيب همها لانها خلاص راحت عليها
و بالنسبة لموضوع الحوادث و الجرايم
ممكن فعلا تلاقى فئة معينه هى الى بتقراها
يا هتلاقيهم نفسهم ينفذوا جريمة و عايزين حالات مماثله :))
يا هتلاقيهم بيهربوا من الواقع
تحياتى لك
منورة

ريمو القمر
هههههههههه
طبعا يا ريمو هتقولى لى عليهم
بقولك العربية تقريبا كنت بتتك قوى على موضوع الحوادث و اشهرها و افظعها
عارفين ان فى نوعية من الناس هيستهويها فعلا الموضوع دة
حاجة بجد تارف
و نقول الجرايم انتشرت ليه؟؟
تحياتى لكى

A.SAMIR said...

طب والله دي ناس مبتكرة برافو عليهم
انا بقى بتاع الجرايد بتاعي الوضع عنده مختلف
بلاقي عنده زحمة كتيرة قوي ....وانا رايح اجيب الجرايد
اقول معقوووول الناس دي كلها هتشتري الجرايد النهاردة
اول ما اقرب بعرف الناس دي واقفة كدة ليه
اتاري الراجل بتاع الجرايد حاطط في الواجهة شوية جرايد موز موز موز زي الحادثة والافوكاتو والجريمة وماشابه وطبعا الناس الجرنالجية اللي زيي عارفين كويس ايه الجرايد دي وطبعا كلهم مبحلقين في الصفحات الاولى اللي بتحتوي على اشهى المقبلات والمشهيات والحلويات
واجي انا بقى وامثالي الغلابة اللي رايحين يشتروا المصري اليوم ولا الدستور تلاقيهم بيبصوا لنا كدة شذرا
ولسان حالهم بيقول
ايه الناس المعقدة دي
تحياتي ليكي يارانيا
بوست جميل كالعادة طبعا

صاحب البوابــة said...

أختي الغالية رانيا

تحياتي

بالفعل لم اعد اجد احدا يشتري جرائد الحكومة

او كما يطلق عليها استخفافا بعقولنا

الجرائد القومية

ان الزيف الاعلامي الذي كانوا يقدموه لنا قديما

قد انكشف غطاءه مؤخراً

تحياتي لمقالك الجميل

Mohamed A. Ghaffar said...

عفواً

ما زال قائد الدراجه موجود ، يمر على بيتى وعلى القهوه والجامع وان احتلف النداء ليصبح جرايييييييييييييد

Sharm said...

هو لسة في حد بيقراهم ؟؟

khaled said...

فعلا يارنيا الحال خلاص
احنا جبنا اخيرنا
الشعب مطحون يا جماعه الاعتماد هيبقى على الاجيال الجايه

يا مراكبي said...

لكل وقت وله أوان .. يعني ده مش عصر الجرايد خلاص .. ولازم تكون المادة المنشورة جاذبة للغاية علشان حد يعبرها ويشتريها

وياعالم هيبقى المستقبل فيه إيه ممكن يطلع لنا يخلينا نقول .. الإنترنت راحت عليه هو كمان

حسام مراد said...

الجرايد دى مبيعاتها قلت لاسباب كتيره واولها عدم احترامها لعقليه القارئ تقوله مصر فى نعيم وكلام خرط كتييييير كده
والجرايد هاتتباع بالخبر الصح اللى جوه بموضوعيه وحياده الجريده مش بالتهليل لها كده فى الشوارع

Rania said...

احمد سمير
ازيك
على رايك الناس الى بتشترى المصرى اليوم بيتقال عليها معقدة الايام دى
و لسه يا ما هنشوف
تحياتى

صاحب البوابه
اكيد
عارف انا ابتى تقريبا الوحيد الى بيشترى الجرايد دى بس مرة واحدة فى الاسبوع
و اما اسئله ليه؟
يقولى مفيش جديد
تحياتى لك و مرسيى على الزيارة

محمد عبد الغفار
اكيد دول احفاد عم احمد
الله يرحمك يا عم احمد

sharm
ايوة انا عن نفسى يعنى
كنت بدور على الوظايف الخاليه
ماهو معتش فى جديد غيرها
تحياتى

خالد
اجيال جاية ايه؟
امال احنا ايه يا خالد
معقوله هنستنى لحد الاجيال الجاية كمان
تفتكر مش هنعرف نعمل حاجة
؟
تحياتى

Rania said...

يا مراكبى
باشا
معتش فى مواضيع ومعتش فى حقائق و:))
النت كمان هتروح عليه
:((
محدش قالى الكلاب
الخونه
خيانه
خيانه
ايه رايك انفع امثل؟
تحياتى

Rania said...

حسام مراد
عندك حق طبعا
فى كل كلمه
ماهى لو بتحترم على رايك عقليه القارء مكنش حصل كل دة
نورت
تحياتى

مصراوي أوي said...

الاهرام والاخبار والجمهورية صوت الحكومة اللي ناس قرفت منه ومبقتش طايقاه


النوع الجديد ده بقي اللي بيلعب علي طبقة من الناس الغير مثقفة واللي مورهاش حاجة فبيحاولوا يجذبوهم باي وسيلة

محمد صلاح العزب said...

الموضوع جميل أوي يا رانيا أحييكي عليه
أنا كمان كنت مشغول بنفس الفكرة وكتبت مقال في الدستور من حوالي أسبوعين عنوانه
لماذا يضع بعض المواطنين أيديهم في جيوبهم ليخرجوا نقودا تعبوا في توفيرها من أجل شراء جريدة حكومية يعلمون أنها تضحك عليهم وتستخف بعقولهم
حوالين نفس الموضوع تقريبا
تحياتي

hapasa said...

أنا بصراحة ماقدرش أستغنى عن الأهرام وخصوصا بتاع يوم الجمعة ولا أخبار السبت
علشان باحتجهم علشان بأفرش عليهم الأكل بعد صلاة الجمعة ههههههههه
آه والله وبعد كده بديهم لابن البواب ويبيعهم بالكيلوا، وبعد كده أقفشه وأقسم معاه، آه ماحدش يعرف ضحك علينا أبدا
كلام بجد بأه
تخيلى تقرئى جريدة رئيس التحرير فيها أسامة سرايا، يقدر يتحكم يشيل أو يضيف من مقال الأستاذ العيم فهمى هويدى تخيلى ده أنا ممكن أقرأ حرف واحد
ممكن أقرا لناس أنا عارف انهم مطبلاطية امبارح مشم موافقين على التعديلات الريس راح المنوفيه وقال هاعدل رجعوا تانى يوم هما هما الناس بيطبلوا انت مع مين ولا مع ايه أعتقد هم حتى مطبلاطية بس مش شاطريين نشاز ع الآخر
وأصلا الجرنان مافهوش مكان إلا للاعلانات تهنئة عضو مجلس الشعب ووزير ايه والمحافظ الفلانى ورئيس مجلس الإدارة العلانى ده غير الريس
حتى ملحق السيارات المقالات الى فيبه عبارة عن إعلان ودعاية مش عارف محرك كام حصان ةجنوط ايه وكماليات ايه وصورة مدير المبيعات والتسويق وصورة للعربية وبخ
سعدت جدا بكلامك الجميل وشكرا جزيلا ليكى

may said...

هوا الجرايد معدتش عليها اقبال زي الاول الا قليل اوي ودخ لسلل النت طبعا
اللي بقت كل حاجه متاحه عليها ومن غير فلوس طبعا كل يوم
وكل واحد بيخترع حاجه يروج بيها بضاعته زي الجرايد الصفرا دي
اللي بتحط عنواين تجذب فضول الناس انها تقري بس اكيد ده طريقه منحله اوي

احمد عزام said...

هاي رانيا
هو الموضوع جزئين
الاول ان بتاع الجرائد مازال موجود ويمر الدراجه ليلا ولحنل بنزل السبت المشهور بالحبل بتاعه ونجيب الجرنال
الثاني : الناس دلوقتي مش بقي يلفت نظرها غير الحوادث حتي لو كانت متفبركه ....فيقبلون عليها بنهم غريب ويقرؤها باستمتاع
اذكر مره كنت راكب مترو الانفاق وصعد بائع الجرائد وكان ينادي بحوادث غريبه والفاظ تخدش الحياء الا ان غالبيه ركاب المترو اشترو الجرنال
مره تانيه وكان الوقت متاخر جدا فوجئت بكل من حولي يقرؤن نفس الجرنال وكان الغلاف مغطي بصور فاضحه وعنوان كبير يقول....ولا بلاش
الغريب ان هذه الجرائد تصدر من قبرص وتطبع بمطابع كبري الجرائد القوميه تحت ستار حريه الصحافه
اعتذر عن الاطاله
تحياتي

إبـراهيم ... معـايــا said...

إزيك يا رانيـــا ........ ممممممممم


تقريبًا معنديش إضافات ، بس قلت أسلم ...


تحياااااااااتي

موضوع حلو

Medo Magdy said...

بيتهيألي مفيش حد عاقل ممكنن يشتري جرنان زي الجمهوريه أو الاهرام أو حتى الاخبار
دي جرايد مبتحترمش عقلية اللي بيقراها
لا دانا رأيي كمان ان احنا ننظم مقاطعه للجرايد دي لانها مبتحترمناش ومبتقدمش اي حاجه ممكن تفيدنا
وأظن البديل موجود ...زي الدستور والمصري اليوم

الشيطان يعظ said...

هاي دي تحفه قوي قوي
و معاكي حق قوي
قوي

sendbad said...

الناس ابتدات تفهم حاجة مهمة جدا ان الكلام اللي مكتوب في جرايد الحكومة كدب واللي مكتوب في جرايد المعارضة كدب رد علي كدب المشكلة ان اصحاب السلطة واصحاب الاقلام لسه فاكرة لحد دلوقتي ان الشعب غبي بيضحك عليه لاء ياجماعة احنا فاهمين بس المشكلة اننا ساكتين انما هايجي يوم ونتكلم

الحصان الأسود said...

انا بطلت اشتري جرايد من سنين لكذا سبب

اولا لتلافي مسببات حرق الدم

ثاتيا لأنة مافيش جديد و الاخبار زي ماهيه يعني لو جبتي جرنال من 25 سنة و قريتية مش حاتلاقي جديد في الاخبار اللي فية عن النهاردة
الفرق بس بينهم حايكون في الاعلانات


ثالثا توفيرا للثلاثين جنية شهريا لأنها بصراحه فلوس و رايحه في الارض

رابعا مافيش و قت و لا صبر للقراية

خامساً لأن الجرايد مش بتجيب الاخبار زي مانتي عاوزة تقريها و لا الحقائق التي تبحثين عنها و لو أردتي القرائة في الحقائق و الوقائع بوجهها الحقيقي و ليس كما يريدونك ان تقراية او تعرفية فعليكي بالبحث على الانترنت في مواقع الاخبار الدولية

تحياتي

HoNdA said...

بصى يابنتى اخبار كل يوم بقيت زى بعضها احصائيات للناس الى بتسرق وبتموت وكمان كل البيوت تقريبا بقه فيها وصله ده غير اننا شعب مبنحبش نقرا كتير وحتى لو حبينا نقرا فالنت موجود اما بالنسبة بقا للاسلوب ده فهو بيحصل كتير والى لفت نظرى انها ديما بتكون اخبار حوادث لان الشعب بيحب اللت والعجن والكلام فى المصايب بس طبعن ده فئه معينه الى بتنجذب ليه والهمنا الصبر يالله

Rania said...

hapasa
محمد صلاح العزب
مصرى اوى
هوندا
مى
احمد عزام
ابراهيم معايا
medo magdy
الشيطان يعظ
sindbad
الحصان الاسود
كلكم شرفتونى و طبعا كلامكوا كله صح الصح
ربكوا يسترها بقى وفى خلال عشر سنين منقلش كمان على المصرى اليوم و لا الدستور نفس الكلام
تحياتى ليكوا جميعااااااااااا

قاسم أفندي said...

شوفي يا رانيا
أسلوب الدعاية الرخيص ده موجود من زمان أوي ، بس الفرق أن زمان كان فيه الرديء والجيد وبنسبة تقريبا متساوية
دلوقتي تقريبا مفيش غير الرديء .. والجيد نسبته تقترب من الصفر
تحياتي وأشكرك