Monday, May 14, 2007

لفت نظرى

انا دلوقت هتكلم عن موقف غريب مش هقول اتعرضتله
بس هقول لفت نظرى بس
و حبيت ارغى و اتكلم عنه
انا الايام دى مشغوله فى موضوع ليا مهم ادعولى ان ربنا يتمه على خير
و بيتطلب انى يعنى اسافر و بتاع فى مدن و قرى و يعنى
المهم
مش هطول
و انا راكبه ميكروباص و مسافرة بلد معينه
اصل انا اموت فى الميكروباصات و المواصلات العامة
بحب اعيش مع الشعب يعنى و مليش فى الرفاهية و........
ما علينا يا جماعة حد يفوقنى اما ابعد عن الموضوع :)))
المهم
الميكروباص عطل
قلت يا سلالالام؟
ربنا يستر
المهم عطل فى منطقة جنب ترعة فضلت ابص على الترعة و الى بيحصل فيها
و ان لسه فى ناس بترمى و بتغسل حاجات فيها
بصراحة كنت هجيب الى فى بطنى
المهم
الى لفت نظرى راجل قاعد على الترعة على كرسى
و ماسك جوزة و شغال
وووووووووووووف
وووووووووووووووف
و جنبه عيل صغير تقريبا ابنه
و مش لابس غير قميص
و بيقوله
ما تجيب بوجق يا ابااااااااا
اباااااااااااااا
ما تجيب بجق يا اباااااااااا
انا سمعته و فطست على نفسى من الضحك
حته عيل تقريبا مش يجيب 8 سنين
و بيقول كدة لا بوه
المهم
الراجل بيقول غور يا
ابن .......
يا ابا هات بجق يا اباااااااااااااااااااا
اما اما اما
ابويا مش عايز يجيبلى بجق
و ابص على الام الاقيها قعدة على الترعة بردة بس تحت شجرة
و بتقوله يا ابو محماااااااااا
ابو محماااااااااااااااااااا
ما تدى الواد بجق
اسكتى يا وليه يا بنت .......................
يا نهار
انا طبعا شوفت الموقف و بلا تعليق بس تقريبا الراجل لاحظ ان فى واحدة بتبصله فحب
كمان يتمنظر
و شغال ووووووووووووف
هى دى بقى القدوة الحسنه
هل بالتعليم وحدة هنعرف نربى الاطفال و لا بردة الاساس هو البيت
المفروض عيل زى دة
هيطلع فى الدنيا عارف ايه؟
غير الجوزة و السب و اللعن
ما هو خلاص اتعلم و اتربى على ان هى دى الرجوله
و هيطلع نسخة تانية من ابوه
و هيطلعلنا جيل بسم الله ما شاء الله
تحفة فنيه
و بعد المشهد العجيب دة لقيته بيزعق و بيقول خناقة
و لقيت اربع رجاله و معاهم نبابيت و بيجروا
و الى يضحك ان كان فى ورا الاربعة
عيلين صغيرين معاهم عصيان صغيرة و بيجرى وراهم
:))))
بصراحة هى دى الرجوله و الا فلا

16 comments:

Reemo said...

أولا ربنا يحققلك كل اللى بتتمنيه ويوفقك يارب
ثانيا وحشانى بجد جدا
انا سيبتلك اوف لاين كتير ابقى طمنينى عليكى
ثالثا بقى بخصوص موضوع القدوه فللأسف ناس كتير بتبقى منحرفه وفى نفس الوقت عايزه ولادها يطلعو كويسين
طيب ازاى انا معرفش
اذا كان رب البيت بالدف ضارب فشيمه اهل البيت.....
المشكله ان الوعى بقى قليل جدا عند الناس دى ولو كلمتى حد فيهم يقولك احنا طلعنا ولقينا اهالينا كده
مش عارفه ممكن الحل معاهم يبقى ايه
بس ربنا يستر علىالجيل اللى جاى
طمنينى علكى
محبتى

AHMED SAMIR said...

يعني تغيبي كل دة وترجعي بالجوزة وهات بوج يابا
يا نهار ابيض
انتي بقيتي بيئة كدة ليه يا رانيا
فين الجيتار؟
تخيلي بقى المنظر اللي انتى بتحكيه دة وكمان ماسكة جيتار وواقفة جنبهم
هيبقى مروستان بجد
ربنا يوفقك بس انتى اكيد هتشوفي في رحلاتك للقرى والمدن والحاجات دي حاجات جامدة جدااا
ياريت تعملي كتاب عن ادب الرحلات وتبقى تحكيلنا اللي شفتيه
باي
ماتجيبي بوج

Anonymous said...

يخرب عقلك ، ضحكت جامد من هات بوج دي ولابس قميص بس

حلو البوست ده يا رانيا

احمد عزام said...

هاي رانيا
تعرفي لو كنتي نزلتي وكلمتي الراجل ده وقلتي له انه كده يعتبر قدوه سيئه للولد وان الولد كده هيبقي عضو هدام وغير مفيد في المجتمع.....كنت بجد هلاقي فرصه كويسه اني اضحك عليكي
بجد دي مشكله مجتمع جاهل وغير واعي وبيتباهي بجهله وبيستمتع بيه
تفتكري ممكن نعمل احنا ايه؟

Rania Lelah said...

ايه يا جماعة خير؟
دة انت بتعزونى بقى
واحد يقولى امسكى الجيتار و روحى اقفى جنبه
و التانى يقولى روحى قوليله و اتكلمى معاه على القوة الحسنه
طب ما انتوا عارفين النتيجة
و هى بكل بساطة هيغرقنى فى الترعة الى كان قاعد جنبها
مكنتش اعرف معزتى عندكوا :((((
و ريمو القمر
الجيل الجاى تقريبا خلاص اتعرف
كل ما تلاقى واحد بيعتبر الرجوله سيجارة و لا جوزة و لا حته تتخين صوت
مش هنلاقى رجاله بعد كدة بجد يا رمو
و مرسيى يا قمر
و انت و الله وحشانى جدااااااا
بس الموضوع انى معنتش بدخل على الmsn
كتير
و عبد الرحمن
مرسيى ليك

يا مراكبي said...

إنتي متأكدة من موضوع هات بجق ده؟ أنا على حسب معلوماتي .. الناس بتتعامل مع الجوزة بالنفس مش بالبجق

يعني الواحد يقول: هات نفس .. أو التاني يقول له: خد نفس .. مساء الخيييير

نرجو الإفادة لتثبيت المعلومة

Anonymous said...

هناك خلل في منظومة القيم

About Me said...

المهم....الميكروباص اتصللح ولا لأ....ياريت تطمنينا
:P

About Me said...
This comment has been removed by the author.
Anonymous said...

هههههههههههه
هاي رانيا
ضحكني الموضوع بس اذا عايزة تشوفي المصيبة على حقيقتها تعالي هنا في الاردن.
هنا البنات الشابات وبنسبة عالية نسبيا بيشربوا سجاير و جوزة (اللي احنا بنسميها الارجيلة) قدام النس عادي ويمكن كمان بيحششوا من ورانا!
يعني الموضوع عندنا مش مرتبط بالرجولة ابدا
اما الشباب.. يا عيني.. فان نسبة 55% من الشباب الاردني مدخنين
الموضوع له علاقة بالوضع التربوي والنفسي والاجتماعي والثقافي والاقتصادي المقرف بالبلد
وسلميلي عالبيتنجان..! :)

AHMED SAMIR said...

انا مررت ليكي تاج يا رانيا
تحياتي واحتراماتي

غمض عينيك said...

ازيك يارانيا ..دي اول زيارة للمدونة بتاعتك بس لسه عايز اكمل قراءة فيها
بس انا زعلان منك..قدوة ايه ورجولة ايه وتربية ايه...هو الرجل ده يعرف ايه في الدنيا غير الاكل والشيشة وشغل بدني وخلاص..وهو الواد هيتربى زي ماهو اتربى وهيكبر ويبقى زيه وهي دي الحياه بالنسبة له
هي دي حال ناس كتير في بلدنا جهل وفقر ومرض والله يكون في عونك يامصر
تحياتي ليكي واحترامي واس ع الاطالة

Rania Lelah said...

يا مراكبى
طبعا متاكدة
ماهو دلوقت بيقول هات بجق و بعدها بشوية هيقول هات نفس
مسااااااء الخير
:))
تحياتى

masry
اكيد و الخلل دة بيكبر شوية بشوية
و هيخلى عندنا جيل تانى غير متحمل المسؤليه و لا يعرف عنها اى حاجة
تحياتى

medo magdy
الميكروباص الحمدلله
تم
اتصلح و غادرنا ارض المعركة
:))
مرسيى لسؤالك

عمار
فينك يا باشا
و يا سيدى سلامك هيوصل اكيد
:))
اما بالنسبة لموضوع ان البنات بيحششوا
فحدث و لا حرج
و ربنا يسترها معانا
سلامى للاردن كلها

احمد سمير
ايوة شوفت التاج
:(((
هعمله و امرى الى الله
كدة بردة يا احمد
تمررلى التاج دة
فى اسئله غريبة يا اخى
تحياتى
و شكرا

Rania Lelah said...

محمد سمير

زعلان ليه بس
اولا مرحبا بك فى ارض اليس للعجائب
ثانيا
لو فعلا على رايك جيل طلع كامل طلع بالمنظر دة
هيبقى على مصر السلام
الى ضحكنى اكتر العيلين الى كانوا ماسكين عصيان و راييحين يتخنقوا
بيقلدوا الناس الى بتجرى و ماسكة نبابيت
شرفتنى

صاحب البوابه
فى الحقيقة انا لم اتشرف و اعرفه
و لم اسمع عنه من قبل
و لكنى سوف اقرا عنه و اعرفه
ما دام يجاهد فى سبيل الله ثم الحق
فانا
معه قلبا و قالباااااا
تحياتى
و الله موفق الجميع

زحل الفلكي said...

هات بج يابا

المفروض يقوله اسمها نفس يا ويلد

حسبي الله ونعم الوكيل في كل واحد كان سبب ان يحصل حاجه زي دي

تعرفي المفروض الناس المتعلمين اللي زي حالاتنا يشتركوا في جمعيات تعلم الناس دي
طلبة المدارس مثلا بتوع ثانوي ممكن في الاجازة الصيفية يروحوا ويعلموا الناس دي ويبقا عمل عام وحتعلموا كتير
لكن ياللا نفسي دي اللي موديانا في داهيه

لا والست تقوله متديله بج
لا حول ولا قوة الا بالله

Reemo said...

رونى
عندى ليكى تاج فى آخر بوست يا حبى
ابقى شوفيه:)