Sunday, July 8, 2007

الناس حصلها ايه؟

الناس حصلها ايه؟
بجد الايام دى ملحظة ان الناس غريبة
الناس لاسعت يا اخوانااا
7/7/2007
يوم مميز ناس كتير مستناياه علشان يكون يوم مميز و الكلام دة سمعناه قبل كدة زى 9/9/1999
و يوم 6/6/2006
انما يا اخواناااا يوصل بالناس انها تقول و تطلع اشاعة انه يوم القيامة بقى يوم 7 /7
اة و الله
اول امبارح كنت فى مشوار و راكبه ميكروباص و لقيت الناس بتتكلم و بتقول
شوفت الناس بتقول ايه الناس بتقول ان بكرة يوم القيامة الى هو يوم السبت يعنى
المهم
تابعت الموضوع و انتظرت الرد الى يرضينى على السخف الى بيتقال دة
المهم الرد كان
انه بيقوله لا يا عم الرسول قال انه هيكون يوم جمعة
فقاله صحيح عندك حق
انا طبعا سمعت و بضحك و بحاول ادارى
المهم
قاله خلاص يبقى ممكن الجمعة الجاية
انا بصيت على الراجل علشان اشوف اى رد فعل للهزار او للتريقة
انما كانوا بيتكلموا بجد
الناس لاسعت
******************************************************
حسنى عبد ربه
و بعدين فى الراجل دة
انا مش من عشاق الكورة بس من كتر اسمه ما اتعاد قدامى و انا متبعاه
الناس ايه الى حصلها بيعيطوا و بيزعقوا و محاصرين بيته ليه
شوفت برنامج
لقيت واحد بيصرخ و بيقول الاهلى عايز منا ايه؟
مش كفاية عليه الدورى و الكاس و و و و
يسبونا فى حالنا بقى
و بيعيييييط
هى الناس فضيت قوى كدة ؟ معتش فى حاجة تانية يعنى يفكروا فيها ؟ خلاص معتش فى مشاكل ؟
هو ايه يا خويا دة؟
بقى حديث المدينه عن حسنى و عن الاسماعيلى و عن الاهلى
الناس لاسعت
*********************************************************************
عجايب الدنيا السبعة و انت التامن عليهم
:))
طبعا دى اغنية لوحدة مش فاكرها
الا قولولى صحيح
انا امبارح متبعة النتيجة بس ملقتش اسم مصر و لا اسم الاهرامات
و لا اى سيرة لحضارة ال 7 الاف سنه
هو صحيح مصر طلعت من الموضوع يا اخونا
خلاص يعنى
معتش فى فرصة
يعنى مصر غاوية تتعب نفسها و خلاص
اما يجى واحد
و يحب يطلع مصر بصورة حلوة و يعمل حفله و هما يرفضوا
ليه كدة؟؟؟
ولو كانوا عملوا حفله للناس المتمنكنة التانية شخدلى بالك انت؟؟؟
اعتقد انهم كانوا وافقوا طبعاااا
امممممممممممممم
مش بقول الناس لاسعت
لا حول و لا قوة الا بالله
و شاااااااااااااايفك و الله شايفك
:))

11 comments:

Anonymous said...

واللة يا رانيا كلامك كلة حكم مش عرفة اتكلم فى انهى موضوع من الكوكتيل الحلو الى انتى عملاة دة بس متزعليش ان البلد معدش فيها عجايب لانة لسة فيها اكيد فكرى كدة هتلاقى هههههههههههه

Anonymous said...

بصراحه انتى اتاخرتى اوى
يعنى انتى اول ماتعرفى ان الناس لسعت الوقتى
بس هما عندهم حق
الرسول قال ان يوم القيامه هيبقى جمعه
نستنى كده الجمعه الجايه
اللهم لا تؤاخذنا بما يقول الجهلاء منا
وبالنسبه للكوره الناس مش فاضيه
لا الناس بتفضى نفسها حتى لو وراهم ايه
لان الكوره هاتاكلهم وتشربهم وتشوف مصالحهم
داحنا خيبتنا قويه اوى
تحياتى وسلام

Anonymous said...

هاي
فكرتيني بأغنية وائل كفوري:
برج فرنسا وسور الصين.. والجنينات العلقانة
والاهرام العليانين.. رمز الفن العمراني
عجايب هالدني قلال.. كانوا سبعة من اجيال
ولما ضحكتي وخصرك مال.. العجايب صاروا تمانة
:))

ودلوقتي البتراء الاردنية بقت اعجوبة
يعني سحبنا البساط من تحت رجليكو ههههههه
وحيبقى الاردن.."ابو الدنيا" هههههه
اصل ابو الهول زمانه دلوقتي جاي يقعد عندنا هههههه

وبعدين ايه حكاية يوم القيامة ده؟ قال جمعة وسبت ! اي التخاريف دي؟
اصلا يوم القيامة حيكون برمضان اللي بييجي بعديه العيد على طول هههههه

وزوروني كل سنة مرة..... تحياتي

اسكندراني في الغربة said...

مستنيين يوم القيامة الجمعة او السبت و بنعيط علشان لاعب وعاوزة اسمنا ييجي في عجايب الدنيا

احنا بقينا شعب
expire

Rania Lelah said...

mermaid
هو فى بس عجايب مصر مش عجايب الدنيا
تحياتى

محمد جادو
الناس بجد بقت غريبة اما واحد يعيط و يكون راجل كبير و يقول ان الاعب خان بلدة و معجبينه و راح للاهلى
يبقى بجد يعنى حاله صعبة
منورنى

عمار جرار
بيعايرنا يا عمار :((
بقى فرحان فينا يعنى؟؟؟؟؟؟؟
ماشى ماشى
ابو الهول ايه الى جاى عندكوا
انتوا هتخدوه هو كمان
؟
ماشى يا عمار

اسكندرانى فى الغربة
انا قلت يعنى
احتومال يجى اسمنا
ما احنا بردة فينا العجب اهو يا اخونا
:))
تحياتى

nosha said...

والله يا رانيا أنا مش عارف أقولك إيه خلاص كل الناس دخلت في علم الغيب وبقوا كلهم رسل ربنا يهديهم ويعقلهم يارب

أما بالنسبة بقى للأهلي وحسني غبد ربه والإسماعيلي دي بقى قصة أندية وجمهور مع بعض ومتنسيش أن دي اللعبة
الشعبية الأولى في العالم

إنما عجائب الدنيا السبع اللي بيقولوا عليها بقت مليون ويمكن مليار كمان ومبقاش لينا نصيب فيها لأننا الغلابة المغلوب على أمرنا حتى في عجائب الدنيا

Amr Ahmed said...

انا سمعت حكاية يوم القيامة دي


الناس اتهبلت

اما بقي لحسني عبد ربه

الاهلي نادي بطولات

والعملية عرض وطلب

حلو البوست ده

مصر هى أمى said...

رانيا

بالنسبة لاول واحد
طبعا ده تخريف محدش فى الدنيا كلها يعرف امتى يوم القيامة ثم ان علامات القيامة الكيرى لسه مظهرتش علشان كان يوم
7/7 هوا يوم القيامة
---------------

حكاية حسنى عبد ربة
مش عارف الناس عاملة دوشة عليها ليه هوا يعنى كان احسن لاعب ولا حاجة لعيب واتنقل من نادى لنادى مش عارف ايه القضية بعنى
--------------------

بالنسبة لعجائب الدنيا
دا فشل جديد من فشل حكومتنا احنا مبقناش عارفيين ننجح فى اى حاجة
كل اللى فلحنا فيه ان فاروق حسنى طلع فى التلفزيون وضحك علينا وقال ان المسابقة ديه نصب ومش تبع اى هيئة دولية واتضح فى الاخر ان اليونسكو هيا اللى منظماها يعنى حتى الوزير مش عارف حاجة

ربنا يكون فى عون البلد ديه والله مش عارف هتلاقيها منين ولا منيين

يا مراكبي said...

حلو تعبير الناس لسعت ده ههههه

ده بقى يوريكي قد إيه إحنا عقولنا محصورة جوة دائرة قطرها قد إيه

مرة كنا ي محاضرة إنشلءات وبعدين حصلت هيصة جامدة قوي في المدرج ورا .. الدكتور سأل فيه إيه؟ طلع إن كان فيه عصفورة طايرة في المدرج

يوميها قلت حلو مستقبل البلد اللي فيه شبابها بيسيبوا المحاضرة المهمة دي والدنيا كلها علشان عصفورة

Rania Lelah said...

nosha
لا احنا مش غلابة
فشر احنا مساكين
:))
الموضوع ان هعندنا ناس بستذكى فاكرة نفسها عارفة كل حاجة فى الدنيا ولا هى و لا عارفة و لا حاجة
ربنا يرحمنا منهم بقى
تحياتى

عمرو احمد
شرفتنى بالزيارة
و طبيعى ان الناس تلسه بعد الى بيتعمل فيها دة
تحياتى

مصر هى امى
ياااااااه حمدلله على السلامة يا محمد
ليك وحشة فينك؟؟؟؟؟؟
الله يون فى عون البلد و الناس
و ربنا على الظالم

يا مراكبى
يا بشمهندس احمد انا بتكلم على الناس الاسعة موضوع العصفورة دى مش دليل يعنى على لسعان الناس و مستقبل البلد
اصلهاحصلت معايا
بس مطلعتش لاسعة قوى يعنى
الا قولى انت كنت دفعة كام
لا نكون كنا فى نفس المحاضرة
:))))
تحياتى

غمض عينيك said...

عادي عادي