Tuesday, October 21, 2008

احمر و ابيض .... مفيش اسود

احمر و ابيض .... مفيش اسود
امممممممممممممم
تقريبا هما مش حاسين بالاسود ده
فيلم هابط و لا بلاش اقول هابط اصلى متفرجتش عليه
محبتش بصراحة اتفرج عليه و بعدين اصرف فلوس على العلاج
بس اكيد شوفنا كلنا الاغانى بتاعه اهيف فيلم تقريبا
فى تاريخ الكورة المصريه ... اقصد تاريخ السينما المصريه
و يقولك احمر و ابيض
احمر لونه بلون الدم و الابيض قلب ابيض زى الفل
و اختزلوا كلمه مصرى فى اللونين دول و الكورة و بس
بس هقول ايه
منتهى الاستخفاف بعقل مشاهدين و بعقل شعب بحاله
اكن كل المصريين دلوقت خلاص نسيت كل حاجة و نسيت كل المشاكل
و مش بتفكر غير فى زكى جمعه ؟
مين زكى جمعه دة
او تامر حسنى الى جاب الكورة فوق العرضه
و اهى كلها اسماء ربنا
انا شكلى هعمل جلسات علاج طبيعى خلاص يا اخوانا
مش هقول حاجة تانيه غير ان الموضوع ناقص اللون الاسود و يبقى علم مصر بجد
و هتلاقى اللون الاسود بقى هو كل حاجة بتحصل دلوقت عندنا
و بقت مصر مش احمر و ابيض و بس
و بقت اسود كمان
و اخيرا هى دى مصر يا عبله

17 comments:

romansy said...

عبله
انتى جبتى الخلاصه
هى دى مصر
احمر
وايض
واسود
بس اقولك حاجه متشغليش دماغك كل يوم فيه حاجات زى دى كتير
اللى يعيش ياما يشوف الوان

كـــيــــــــارا said...

كبري دماغك من الافلام عشان مش تتشلي :)

الفارس الملثم said...

لو علي الهيافه مفيش اكتر من الافلام الهايفه عندنا , يمكن في شئ مهم في حكاية الفيلم , مش اننا عندنا منتج تافه ساب كل المشاكل والبلاوي اللي في البلد وعملنا فيلم عن الاهلي والزمالك واللعيبه اللي هم الكنز اللي فاضل لمصر بعد مالبلد كلها تتباع لكن اللي اثار انتباهي حكاية ان الفيلم نجح ودي وحدها تطرح عشرات من علامات الاستفهام

وزي ماقلتي هي دي مصر يا عبله شعب فيه الواحد ممكن ميكنش معاه حق العشا لكن لازم يكون عنده رصيد في موبيله

وعجبي

مـحـمـد مـفـيـد said...

عندك حق يا ام فاطمه

الازهرى said...

صديقتى العزيزة

اضم صوتى واتفق مع كيارا فى رأيها

واختلف مع الفارس لملثم بشده فى قوله

هي دي مصر


لان مصر هى نحن وليس البعض من مستخفى العقول
مصر اعظم من نختزلها فى مجرد بعض الافعال غير المسئولة

تحياتى دوما

أنا حر said...

حتى الاسود كمان بقى اللبس الاحتياطي للزمالك يعني مش هتعرفي تهربي في اي مكان
على فكرة احنا بقينا فعلا شعب هايف يعني بنحب الهيافة بس ده ملهوش اي علاقة بهيفاء وهبي لاني بحبها بصراحة
:)
تحياتي

يا مراكبي said...

طيب ما فيه أصفر وأخضر وأزرق .. لازم يعني تستني اللون الأسود؟ مش كفاية إن كل أيامنا بقت كحلي؟

زمان كانوا الحكام بيلبسوا أسود على فكرة

خواطر ليست عابرة said...

فعلا أكتر شيء يضايق الواحد ويشعره باغتراب في هذه البلد هو كون النجوم صاروا نجوم الكرة والـسينما
وقد خلت الساحة من الابداع والمبدعين في بقية المجالات
ولكن ما يؤلم أكثر هو كون هذا الشعب البئيس يتفاعل مع هؤلاء النجوم المزعومة.

مـــالك said...

العيب موش فيهم العيب في اللي خلوهم يظهروا على إنهم نجوم
هو لو مفيش حد بيبصلهم كانوا عملوا البتنجان ده
ما علينا أرجع وأقول زي ما في حلو في وحش
المهم انت عملت ايه وبتعمل ايه......
تحياتي على البوست ولما يبقى الوضع كده كبري دماغك
انا عن نفسي بسمع عن الافلام دي صدفة من أصحابي عشان مش بتفرج على التلفزيون عشان متشلش
فأما الزبد فيذهب جفاءا وأما ماينفع الناس فيمكث في الأرض

EMMY BABY said...

فعلا ما اكتر الهيافة

انا ببقى هتشل لما الاقى حد بيعيط ولا متنرفز ولا عصبى انا اقول مصيبة يطلع فى الاخر علشان دخل فينا جون

ربنا يهدى بجد

تحياتى

ايمى

son's egypt said...

السلام عليكم
الفن اصبح عملية تجارية وليس اكثر من ذلك
يعين مش مهم الناس اللي هي فيه المهم اي حاجة وخلاص

momken said...

انتى ايه الى خلاكى تشوفى الحجات دى ؟؟؟احسنلك حافظى على ضغط دمك

ومتنرفيش نفسك

تحياتى

blue-wave said...

هههههههههههههههههههه
صح والله
فعلا تهريج
ماهو دا تكمله لسلسلة الهيافه اللى شاغله حياتنا
تحياتى

HeBa said...

أنا كمان استرخمت الفيلم من غير ما اشوفه

أكيد ما خلصتش كل المشاكل وفضل بس الصراع الأبدي بين الأهلي والزمالك

هما بس افتكروا انهم هيكسبوا لهم قرشين في موسم العيد

دمت بخير

اقصوصه said...

اول مره اسمع عن هالفلم!!

طيب ما في بنفسجي؟

Desert cat said...

حبيبتى اى مصيبة دلوقتى ممكن تحصل فى مصر وتعدى وتمر مرور الكرام
دون حسيب او رقيب او اى حد يقولهم ربع التلاتة كام
والبركة فى تاتو وزكى جمعه
ا مين زكى جمعه صحيح
:)
محبتى يا رونا

صوت من مصر said...

مصر مش بالاوان
وبصراحه الله يكون فى عون عبله ؟

تحياتى لزيارتى لكن مش هغيب تانى على البلوج اوك ؟