لحد امتى هنفضل كدة
فساد و ظلم ناس بتموت و اطفال بتدمر لحد امتى؟ و الناس الى معندهاش ضميرهتفضل عايشة لحد امتى ؟
هتفضل هى الى واخدة حقها و لقيه الى بيغطى عليها و لحد امتى؟
هنعيش فى ذل و هوان لحد امتى؟ هيفضل ديما فى مؤامرات بين الحكومة
و بين الحرامية الكباروالنصابين
و هل الحكومة عارفة كدة؟ و بردة بتتعامل و بتعقد كمان صفقات
على حساب الشعب؟
معقوله ؟ امبارح شوفت برنامج 90 دقيقة ومع انى مش من المتابعين الجيدين له
بس بصراحة اتفاجات اما تقريبا جابوا 4 او 5 مشاكل كلهم اخطر من بعض
بدا بالتعديلات الدستوريه و الى اتعمل فيها استفتاء جماعى لكل مواد الدستور المراد تعيدلها
و رفض4اعضاء بس للموضوع و رفضهم مكنش لكل التعديلات و لكن رفضهم لمادتين او اكثر
و هم المادة 88 و المادة 179
والناس اشتكت قالت يا عالم ينفع كدة ؟ المفروض ان الاستفتاء يبقى لكل مادة على حدة
بينى و بينكوا ماهم عندهم حق بردة ما هى حاجة تغيظ مجلس كامل
يوافق على تعديل مواد عميانى
وموضوع تانى عن اب مكلوم ابنه ضاع من لبن مدعم فاسد نسبة الزرنيخ الى فيه اكتر بكتير
من النسبة المقررة فى وزراة الصحة
اب لا يساعه الى ان يدعو الله عز وجل ان ياخد حقه
فبكى وهو بيقول عايز العدل و اناشد الاب حسنى مبارك ان يقف بجوارى
طيب؟
باذن الله ربنا هيقف جنبك لان ربنا مش بيرضى بالظلم
و بعد كدة جت مشكله تانية مشكله التشخيص الخاطىء و ان فى اطباء كتير ومش معظمهم. بيغلطوا
فى تشخيص المرض مما يسبب فى ضياع المريض ان مكنش فى صحته هيبقى فى فلوسة
شكلنا هنرجع تانى لغلطات الاطباء ؟؟ ربنا يستر بقى. و
المستشفيات الخاصة الى بقت تجارة و مبقتش انسانيات
امممممممممممممممممم و شوفت ايه كمان يا رانيا؟
ايوة ايوة هيدلينا و الى عملته: اكياس الدم فاسدة و الافراج عن اصحاب الشركة بكافاله 100,000 جنيه
الى كانوا علشان طمعهم هيودوا ناس فى داهية.مش بقول الحرامية هى الى واخدة حقها قوى
و المصيبة كمان ان حوالى 35 من المشتغلين بالشركة سافروا فى اجازت ترفيهية
علشان يسكوتوا ويعدوا الصفقات الحلوة دى انما ,,,,
الشعب بقى فى داهية و الامراض الى ممكن ان تتفشى و صحة المصرى بقت للبيع دلوقت
و بينى و بينكواارفت ,غيرت القناه
بجد تقريبا انا حرمت اتفرج على البرنامج دة تانى اصلها مش ناقصة حرقة دم
لالالالا خلاص حرمت
اصل المشاكل بتزيد و الفساد بيزيد مش بيقل و معرفش هيفضل الموضوع دة لحد امتى؟
امتى حال البلد يتصلح امتى؟
امتى بقى نشوف الامن و الامان و الصراحة و الوضوح و العدل
العدل الى احنا عايزينه و بنطالب بيه
هنشوفه امتى؟ هنشوفه على حياه عبينا و لا الاجيال الجاية هى الى هتشوفه انا موافقة ,,,
موافقة على ان الاجيال الجاية هى الى تشوفه بس تشوفه
يبقى فى امل باذن الله ان الحال يتغير ,, يتغير للاحسن و تسود الديمقراطية
الى عن حق مش الى متفصله بالمقاس
