Tuesday, February 27, 2007

الانترفيو

انا استاذة انترفيو من كتر ما رحت مقابلات عرفت ايه الى بيحصل و الموضوع بقى عندى ادمان
اشوف الاعلان من دول يركبنى عفريت اتصل و احدد ميعاد للانترفيو
شوفت كتير
ناس غريبة قوى تحسوا انهم يا جيبينك يتفرجوا عليك
يا جيبينك يرخموا و السلام
يا التالتله و الاكيدة يعجزوك
و فى الاخر اما تنجع فى ال3 عقبات دول يقولوك العمل من بكرة من 9 ل 12 بليل و 400 جنيه فى الشهر ,, تبقى خلاص هتشد فى شعرك.
اغرب انترفيو قابلته و فعلا حسسنى مش بالعجز حسسنى انى عايزة ارمى نفسى من اقرب بلكونه مع انى بخاف اتعور و خصوصا اننا فى الدور الرابع \ عالى يعنى
المكان : فيلا شيك قوى و فيها حاولى 14 انتريه واحد شاب يوقلك اتفضل اعمل استمارة التحاق طيب اقعد فين يقولك هنا
طبعا تبصله بصة غباء فين يعنى يبصلك بطريقة ايه انت مبتفهمش
بقولك هنا
و تبص على مطرح صباعة الى بيشاور بيه تلاقية بيشاور على ال14 انتريه
طبعا اول انطباع ظهر بانى غبية او متررددة او انى نظرى ضعيف
المهم
الاستاذة رانيا تتفضل
فين حضرتك
هناك يا فندم
اقوله فين؟
يبصله شذرا و يقولى هناك,,, و طبعا هناك بابين و الاتنين فيهم نور
ما علينا
اخبط على الباب و ادخل الباب مبيفتحش بسهوله,,, تفضل تزق فى الباب لحد ما تدخل و بردة مش يدخل غير نصك
طبعا الانطباع التانى غير انى غبية و مش بشوف انى عصبية و بتخانق مع دبان وشى
دخلت اذ بى افوجىء بحجرة اعتراف مش انترفيو
انين لبسين بدل و قاعدين على مكتب و يبصولك من فوق لتحت و سهارى تقريبا مفتوح اضاءة خافته جدااا و سيبين الكرسى بتاعك بعيد فى نص الحجرة - مكان غريب جدا - بجد انا قلقت و بان عليا الاضطراب ........... لقيت واحد بيقولى اهلا
اهلا يا فندم
اسمك؟
رانيا
التانى ايش لونك و هو بيبرقلى
قلتله اصفر
بصلى بارف قلتله عادى يا فندم كويسة
انت جاية ليه؟
اشتغل
تشتغلى ايه؟
قلتله علاقات عامة
قالى اممممممممممممممم تعرفى ايه عن العلاقات العامة؟
قلتله كذا و كذا و كذا
قالى بس دى مش علاقات عامة
قلتله امال دى ايه؟
قالى دى سكرتيرة
تعرفى ايه يا رانيا عن العلاقات العامة؟
قلتله كذا و كذا و كذا
التانى قالى بس دى مش علاقات عامة
قلتله امال دى طلعت ايه؟
يقولى تسويق
و فضلنا على كدة تقريبا نص ساعة
و فى الاخر طلعونى انى مكنتش بشتغل فيها و انى اجهل تمام ما هيه العلاقات العامة
اخدت كورسات؟
اقوله ايوة
التانى يقاطعنى و يقولى بتحبى الوان ايه؟
اقوله الازرق يقولى شوفتى اللون دةو انت داخله
اقوله ماخدتش بالى
الاول يقولى و ماخدتيش بالك ليه؟
اقوله الظروف بقى
الاول يقولى امممممممم تشتغلى فى التسويق؟
اقوله انا جاية للعلاقات العامة
يقولى ما انت مش عارفة يعنى ايه علاقات عامة
اقوله معلش هبقى اشيلها من السى فى
يقولى تشتغلى معانا مبيعات؟
اقوله مفيش مشاكل بس احتاج لدور تدربيبة
التانى يقولى انت بتقولى انك خريجة اداب انجليزى؟
بتعرفى تقرى انجليزى؟
قلتله يعنى
قالى نعم؟
قلتله بقول لحضرتك يعنى
قالى طيب لو قلتلك انك معانا فى الفريق من بكرة هتعملى ايه؟
قلتله اكيد هعمل كل خير مش جاية اعمل شر
طبعا انا قلت ماهى خسارنه خسارنه اطلع فيهم الى عملوله فيا
و فى الاخر لقيت الاتنين بيضحكوا و بيقولوا ايه يا رانيا حبينا نستفزك شوية
انت زعلت؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
طبعا كنت هتنقط بجد من الطريقة و الاسلوب و الاستفزاز دة
ليه بيحصل كل دة اما بنيجى نقدم على وظيفة هل بيختبروا الشخصية ؟
هل عايزين يشوفوا مقدار الثقة فى النفس ؟
لازم يحبسوا دمك و يربكوك و يخلوك تنفعل فعلا من غصب عن علشان كدة
ايه المشكله ا ما يختبروك فى الى انت جاى فيه بوضوح و بصراحة ليه يحاولا يشككوا فيك هو الشباب ناقص ارف الواحد اما بيصدق انه يلاقى وظيفة تليق بامكانياته العمليه علشان يروح يقدم و طول ماهو ماشى يدعى و يقول يا رب
ليه بنعمل فى بعض كدة ليه و علشان ايه؟
طب قول انا اساسا راحة فسحة
تجربة
انما بجد لو كان واحد معندوش شغل و نفسة يشتغل ليه التجارب و الاحباطات دى كلها
حاجة تزهق
و بقالى يومين مش بنام بفكر هل هيتصلوا بيا و لا لاء
معقوله لاء؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

7 comments:

Anonymous said...

انا فى رايى ان الانسان لازم يحاول يجتهد فى كل شى زى مانتى بتعملى كونك مش بتوفقى لازم تحولى وتحولى ولابد فى يوم ربنا هيفقك فى يوم من الايام فى انترفيو
بسى بعد كده ابقى علقى عليهم تعليقات من بتعاتك يمكن ساعتها ربنا يوفقك فى انترفيو من اللا بترحيهم

Anonymous said...

hi ron
انا تانى بس ربنا كبير ممكن يحصل ويتصلوا بيكى بس عجبنى اصرارك على انك تجربى حظك فى كل انتر فيو واستحملى اصل بتوع الانترفيو دول ينطبق عليهم مثل صحب المال قلبة تعبان لازم يعصوروكى ويحسسوكى انك غبية علشان يشوف لو شغلك هيعرف يستفيد منك اد اية الصبر

قاسم أفندي said...

رانيا
ازيك؟ اولا مبروك المدونة ويجعلها عتبة خير ولو انها ضلمة شوية لكن المرة الجاية انشالله ابقي عامل حسابي وجايب شمعة معايا
:))))
اسلوبك في الكتابة زي العسل
كنتي فين من زمان
أستمري أتنبألك بمستقبل باهر
ربنا يوفقك يارب

Rania Lelah said...

مروة مرسيى ليك طبعا لازم الاجتهاد بس الموضوع مبقاش اجتهاد عندى
بقى ادمان بس

Rania Lelah said...

مرميد يا قمر
مرسيى على الكلام الحلو مع انى مكنتش متوقعة دة منك
هههههههههههههههههه
اتغيرت كتير بس عارفة ؟ كدة احسن
ربك يسهل ادينا وراهم و هشوف يا انا يا هما
مرسيى يا قمر

Rania Lelah said...

استاذ\ ايمن
طبعا كنت انت اول من خلانى افكر فى الموضوع دة مرسيى ليك
و مرسيى على كلامك الجميل
و من ناحية هستمر قول يا رب

Anonymous said...

على فكرة ان نسيت اقول يا رووروووو للناس الى بتقرا موضوعك انك بقيتى استازة بجد فى الانترفيو بجد رانيا بتدى كورسات انترفيو دلوقت اى حد بيحب يعرف هيتصرف ازاى فىانترفيو بيجلها
ابتديت ارجع لطبعتى صح
ههههههههههههههههههه