Saturday, May 26, 2007

المصرى الاصيل

كنت قريت من يومين رساله مبعوتالى على مجموعة
بتتكلم عن المصرى
و المصرين اهما حيويه و عزم و همة
لحد اخر الاغنية
ضحكت فى سرى و فضلت افكر واقول هل فعلا كلام الزميل الفاضل
صاحب الرساله صح؟؟
ان المصرى ماهما حصل بيحب اخوة و هيفضل المصرى شهم و اصيل وعندة مروؤة؟؟؟؟؟؟؟؟
بصراحة مصدقتش قلت بردة احتمال كان زمان
انما دلوقتى مبقاش كدة خالص
المهم فى يوميها بردة دخلت مدونه ظريفة قوى و صاحبها الزميل الفاضل
كان بيتكلم على سعر المصرى و انه تقريبا رخص الايام دى
رخص من ايه؟
من ظلم الحكومة ليه ؟
و صعوبه المعيشة ؟
اذا كان احنا ظالمين نفسنا ,الحكومة مش هتظلمنا
اذا كان احنا وحشين مع بعضنا هى مش هتبقى وحشة معانا
المهم نجى للرساله
الرساله كانت بتتكلم عن الشهامة و المرؤة
شهامه و مرؤة ايه؟؟؟؟؟؟؟؟؟
الى تخلى الناس مش تساعد بعض و لا بيعبروا بعض وقت الشدة
هقول حاجة انا الاسبوع الى فات كنت فى القاهرة كل يوم بروح
و تقريبا كل يوم و انا راجعة بشوف حوادث كتيرة قوى
و الغريبة ان محدش بيسعف ان الكل واقف يتفرج
و الطريق مقفول و غير كدة اما الاسعاف بتيجى و بتشد حيلها
محدش بيرضى يخليها تمر علشان تلحق الناس
محدش بيوسعلها السكة
محدش فى دماغة ان فى ناس بتموت و ناس احتمال تموت فى العربية دى
و كل الى فى دماغهم انهم يتسابقوا على الطريق و بس
هل احنا كدة كويسيين مع بعضنا؟؟؟؟؟؟؟؟؟
اما واحدة تكون ماشية فى الشارع مع خطيبها قدام نادى
و يطلع عليهم 10 شباب عايزين يخدوا البنت من خطيبها
و الخطيب يصرخ و يروح للحراس على باب النادى و يقولوهم خدوا البنتين عندكوا
يطلع مدير النادى و يقول اسف فى اوامر بتقول اما يكون فى خناقة مندخلش حد و لا نطلع حد؟
و فى الاخر الخطيب و البنت انضربوا من 10 شباب و الناس واقفة تتفرج و محدش لحقهم
احنا كدة حلوين مع بعض ؟ بننصف بعض؟؟؟؟؟؟؟؟
اما اكون راكبه موصله و الاقى واحدة محتاسة باطفالها و شنط كتيرة
و محدش معبر
و اقوم انا البنت علشان اساعدها و محدش من الرجاله الى قعدين واخد باله
او بمعنى اصح واخدين بالهم و بيستعبطوا
ازى نطلب الانصاف و احنا اصلا مش كويسيين مع بعض و لا بننصف بعض
طيب ما طبيعى ان المصرى يرخص ادم احنا مع بعض ظلمة
ماطبيعى اننا نلاقى الاقوى منا و يظلمنا اكتر و اكتر
احتمال يكون الموضوع معروف بس بجد
افتكرت دة كله من الرساله الى كانت مبعوته
و لسه لحد دلوقت بتوصف المصرى انه شهم و اصيل و بيساعد المحتاج
حاجة تضحك بجد

17 comments:

Reemo said...

بصى يا رونى
أنا معاكى ان فى ناس كتير مش شهمه
وفى أكتر مش بيتحركو لمساعده الغير
بس أنتى واحده من الناس
ومصريه برده
ولما لقيتى حد محتاج اتحركتى علشان تساعديه
وفى زيك كتير
جايز مش كتير أوى بس موجودين
بلاش تبصى للموضوع من ناحيه تشاؤميه كده
أنا عارفه ان فاقد الشئ لا يعيطه
بس احنا لسنا مش فقدناه تماما
لسنا فيه انتى وغيرك اللى لسه جواكو شهامه وحب مساعده
فطول مانتو موجودين أكيد هنزعل لما يكون المصرى رخيص
لانكم مصرين برده
تحياتى ومحبتى

Anonymous said...

هاي رانيا..
ازيك؟ وازاي مصر؟
الصفات يا رانيا لا تنطبق على الشعوب وهذا خطأ نقع فيه دائما، حيث ان الشعب ليس كتلة واحدة بشخصية واحدة فنقول هذا شعب كريم وهذا شعب بخيل وهذا شعب خدوم او صبور او سنفور.
بل ان كل شعب فيه من ابنائه الخيّر والعاطل، فالصفات هي خاصية فردية لا جمعية فنقول هذا الشخص كريم وهذا رائع وهذا لئيم وحقود.
بس برضه بقول تحية لشعب مصر ذات الاغلبية الطيبة
وانا اكتر عاجباني فيكي انك شايلة هموم مصر والدنيا فوق دماغك، تنفعي تكوني مُصلحة اجتماعية كبيرة ههههه
تحياتي

محمد عبد الغفار said...

هو كان يقصد المصرى القديم (الفراعنه يعنى) انت بس اللى فهمتى غلط

AHMED SAMIR said...

رانيا:
ازيك وعاملة ايه؟
بوستاتك معدتش سهلة يا رانيا
ليا سؤال غلس شوية
هي ليه ريمووو دايما بتكون اول كومنت عندك؟
انت بتبلغيها ان انتي نزلتي بوست علشان تلحق وتدي الكومنت التمام؟
سامعك بتقولي وانت مالك...ماشي
المهم
بالنسبة بقى للموضوع الجامد بتاعك
بصي يا ستي انتي عارفة طبعا ان الشعب المصري تعداده كبير واكيد عارفة ان كل ما العدد زاد كل ما انواع وانماط البشر بتزيد برضة وبالتالي زي ما الخير بيظهر الشر واغلاسة والتصرفات الشاذة بتظهر برضة
وطبعا النوع التاني هو اللي بيلفت نظرنا في الزحمة لان تصرفاتهم هي اللي بتكون ملفتة بمعنى لنك مش معقول هتخدي بالك من ناس ماشية محترمة في الشارع لان دة العادي انما اكيد هيلفت نظرك خناقة مثلا
ارجو ان يمون المثال وضح الفكرة
وبعدين مانتي عارفة ان القاهرة مش كل مصر ولو عايزة تشوفي الشهامة والاصالة بجد والشباب اللي يفرح روحي الاقاليم هناك برضه في سخافات بس الاحترام اكتر بكتييير
تحياتي ليكي وكل بوست وانتي طيبة

Monzer said...

كيفك يا رانيا عاملة ايه
والله أنا سعيد ان البوست شد انتباهك
وفعلا صدفة غريبة
انت لو لاحظتى ان التعليقات الى جاتلى على المصرى تمنه كام هتلاحظى انهم بطريقة مباشرة أو غير مباشرة بتقول وبتأيد نفس كلامك ان احنا بنغلس على بعض، ومبانحترمش بعض لو لقينا حرامى وقفشناه هانضربه قبل مابنجيبله الباشاويش يضربه
يعنى احنا الى بنعذب بعض وبنهين بعض
تدخلى محل هاتنفعى المحل ده يغلبس عليكى ويلطعك
بأت كل المحلات زي عمرو فاندى وصيدناوى وقلة زوق كأنك داخلة تشحتى
الناس مابقتش طايقة بعضها
بس برده فيه اسثناءات وفيه ناس بتدخل فى النار، وأعتقد ان المصرى مابقاش زي الأول من التنبلة والخنقة والزهق وانا مالى واشمعنى والحاجات لخنيقة ده
تحياتى ليكى ولرأيك المحترم

احمد عزام said...

هاي رانيا
التحول الاجتماعي في مصر بداء من سنين .....واللي احنا بنتكلم عنه لما نقول المصري الشهم الجدع اين البلد.....ده كان مجتمعنا فعلا بس قبل التحول.......انا من سنين قلت يا جماعه احنا ماشيين في اتجاه امركه المجتمع المصري....وبحاول اصلح نفسي ويا ريت الكل يحاول يرجع للقيم الاصيله بتاعتنا .....وبلاش شغل الخواجات ده

غمض عينيك said...

رانيا ازيك
موضوع جميل وان كنت مختلف معاكي الى حد ما
انا متفق مع الميل اللي جالك ان المصري شهم واصيل وجدع وهو لسه كده فعلا
عارفة روحي الصعيد او الريف وهتلاقيهم..هتلاقي الشهامة والاصول وكل حاجة...بس هنا الناس دايرة في طاحونة بتاخد على دماغها من البلد والحكومة والشغل واي امين شرطة مالوش لازمة ده غير الحياه ومتطلبتاها اللي بتزيد يوم عن يوم لا لا لا دا الواحد بيبقى ماشي عايز حد عنده شهامة ويشيل شوية من الحمل اللي عليه
في الخليج المصريين مشهورين انهم بيأذوا بعض ويعملوا حركات مش ولابد مابينهم بس دا برده من اللي هما شايفينو هناك
حطي المصريين في مكان محترم ودولة محترمة وتحت نظام محترم وهتشوفي هيكونوا ازاي
اسف عالاطالة

تحياتي

Rania Lelah said...

ريمو حبيبتى
انا مش ببص بنظرة تشاؤمية يا ريمو
انا ببص بنظرة تعجبيبه يا قمر
ليه بنعمل كدة فى بعش اكيد مش بعمم بدليل انى بحاول اساعد و اكيد انت و ناس كتير على رايك
بس الواحد بيحس بالزعل اما يلاقى ناس محتاجة مساعدة و محدش معبر
انت لو مكانى و شوفتى اى موقف قدامك و لقيت ان معظم الناس بقوا اندال مش هتزعلى؟؟؟؟؟؟؟؟
تحياتى

عماررر جرار
انا كويسة و مصر كويسة :))
ايوة يا سيدى انا هعمل مصلحة للشئون قريب
منتظراك بقى
:))
انا معممتش انا بتكلم على صفة لقيتها منتشرة قوى قوى الايام دى
و اكيد كلامك صح
تحياتى و تحية من مصر للاردن

محمد عبد الغفار
حمدلله على السلامة و كويس انك بخير
تفتكر انا الى فهمت غلط؟
و ليكن انى فهمت غلط ,,,تفتكر المصريين و مش كلهم لسه فيهم الخير؟
تحياتى لك ليك وحشة

احمد سمير الباشا
اله و انت سمعتنى ازى يا احمد؟
انا حاسة انك حاطط جهاز تصنت بقى
:))))
لا يا سيدى مش بقولها بس من القلب للقلب بقى
بطل الحقد دة يا باااااااااى
و بالنسبة لكلامك
احتمال فعلا كل ما العدد بيزيد بس متنكرش ان الناس قلبها جمد و مبقاش فى رحمة بدليل سلسله الجرايم و الحوادث الى بتحصل كل يوم.. انا مش بتكلم على الكل بس لو بصيت بموضوعية هتلاقى المعظم بقى كدة و دى مشكله فى حد ذاتها
و بالنسبة بقى لاقاليم
شهامة ايه يا احمد الى بتتكلم عليها؟
انا من المنصورة
يعنى مش من القاهرة
عاصمة الجمال ما علينااا
:)))
و بلف و بروح هنا و هناك و تقريبا روحت محافظات مصر كلهاو مش شايفة الشهامة الى بتقول عليها دى بالعكس ساعات بلاقى من النداله الى يخليك تشعر بالغثيان
تحياتى و منور و يا ترى اخبار بوستاتك ايه مش هتحط الجرس بقى :)))
اةةةةةة
نسيت
مش هتقولى بقى ايه النظارات الحلوة دى
تحياتى

Rania Lelah said...

hapasa
بالظبط
هو دة الكلام المصرى معتش هو
يمكن من الزهق و الذل الى شايفة بس يا ترى هنفضل كدة لحد امتى
يعنى نبقى سلبيبن مع الاساس الى مطلع عينا و هنفضل نفترى على نفسنا و على بعضنا و خلاص ؟
طيب ماهو احنا لو اجتمعنا مع بعض و كان لسه فينا الخير اكيد باذن الله هنعمل حاجة
تحياتى و بجد بوستك عجبنى قوى

احمد عزام
هاى احمد
منور
امركة الشعب؟
تفتكر؟
احتمال بردة بس اكيد احنا كنا رمز الثقة و الشهامة و المروؤة
تحياتى

محمد سمير
انا الحمدلله كويسة ازيك انت؟
بص يا محمد
موضوع الريف و الصعيد دة
لو بردة دققت النظر مش هتلاقى موضوع الشهامة غير فئة قليله جدا احتمال حتى لا ترى بالعين المجردة
الريف دلوقت بقوا الئم مخاليق ربنا و بردة مش بعمم
بس لو لقيت اى حد من الريف ووقف جنبك
اكيد هيكون عايز حاجة و خدها منى انا ليا تجارب دة غير الى ممكن يحصلك من ورا ضهرك و اما تيجى تبصلهم هتلاقى ابتسامة من هنا لهنا
و يا جماعة مش بعمم انا لقيت ظاهرة غريبة و منتشرة جداااااا
موضوع بقى المصريين و الى بيعملوه بره
ايوة صح انا اعرف ناس فى الخارج محدش بيشتكى من حد غير اما يكون مصرى بيضربوا فى بعض من تحت لتحت و ساعات بتوصل بيهم انهم يحبوا يقطعوا عيش بعض
عارف احتمال على رايك لو اتحطوا فى نظام حكم محترم و كويس و عادل
يختلف الامر بس ميمنعنش ان بلدنا محترمة بس هى الظروف السودا الى فيها :((
بس تفتكر هيختلف كتييير
و لا الناس خلاص اتعودت على كدة
تحياتى

يا مراكبي said...

أنا مش هأعلق على موضوع إن المصريين بقى طبعهم الغالب هو عدم الشهامة وألا لأ لأن لا هو صح ولا هو غلط .. مافيش إحصائية بالموضوع ده

لكن الظاهر لينا والثابت حتى في كتب الدين والسيرة إن التدهور الأخلاقي ده بيزيد مع مرور الزمن .. وكل ومان بيكون أسوأ من اللي قبله في الأخلاق

لكن المهم هو: ليه بيحصل كده؟

الإجابة: الضغوط لا تفرز إلا أنانية وحقد وتنافر .. والحياة السهلة الكريمة لا تفرز إلا ناس عندها سلام نفسي وصفاء وحب للآخرين

أي خدمة

مصر هى أمى said...

كويس اوى ان فى توارد خواطر بينا علشان نكتب نفس البوست
يمكن علشان احنا الاتنين حاسين ان المصرى الاصيل اختفى اليومين دول

بصى انا حبيت مصر من كلام ابويا والناس الكبار عليها من عظمة وكبرياء وشموخ كانوا بيتكلموا على مصر بطريقة تخليكى تفتخرى بيها

لكن للاسف من ساعة اما الواحد وعى على الدنيا وهوا مش شايف غير حاجات زى الزفت فا ازاى افضل احبها

احب الحاضر المنيل ولا الذكريات اللى انا مشفتهاش

صاحب البوابــة said...

اعتقد ان المصريين يحتاجون لجراحة سريعة لإزالة السلبية التي زرعتها فيهم انظمة الإستبداد التي تحكمهم منذ زمن

تحياتي اختاة على هذا الموضوع الجميل

زحل الفلكي said...

تعرفي بالرغم من كل هذا
لكنك بتتكلمي عن القاهره

مش عارف ليه مش بعتبر القاهره هي مصر
بالرغم من انها فيها الكتلة السكانية الكبيره
وبالرغم انها العاصمة

لكن من امتا العاصمة بتعبر عن الدولة
انا سافرت كتير في مصر
ولقيت شهامة في اماكن كتير اوي

هنا في بورسعيد
في الاسكندرية
في الاقصر واسوان تلاقي اللي يساعدك
حتى في مرسي مطروح

يعني لسه فيه المصري الاصيل
هو تقريباً انقرض من اماكن في مصر نتيجة للمفرمة اللي الناس بقت عايشة فيها

لكن لسه موجود في اماكن كتير
موصلتهاش المفرمة دي

Rania Lelah said...

يا مراكبى
خدمة ايه بس
دة انت غرقتنى بجمايلك
ربنا يفتحها فى وشك
:))
تحياتى

مصر هى امى
اكيد فى توراد خواطر
بس مش عارفة انصحك بايه
تبقى مع الذكرايات و تبقى عايش فى وهم
و لا تبقى عايش فى واقع و خلاص
اقولك خليك مع الواقع
هو ايوة مؤلم بس على الاقل هنفكر فى حل
تحياتى لك

صاحب البوابه
اعتقد ان كلامك كله صح اخى العزيز و ربنا معانا

زحل الفلكى
يا هلا يا هلا
انا مش بتكلم عن القاهرة بالاخص
انا بتكلم عموما على اماكن كتير زرتها و رحتها و اعتقد ان المفرمة وصله للكل
و هتبلعنا فى مرة كلنا مع بعضنا لو مغيرناش من نفسنا و اتقينا ربنا فى بعض
تحياتى لك

تامر حسين said...

معلش بردو صوابعك مش زي بعضها
ولازم زي مبنزكر الوحش نزكر الحلو ولا انا غلطان
موضوع جميل وشائك
اتمني تزور مدونتي
تحياتي

شــــمـس الديـن said...

السلام عليكم و رحمة الله و بركاتة

اصيل !!!!

موضة قديمة
السلوك الشائع الان هو سلوك لازمة و سلوك لزحمة

احنا حقا لو تأملتي قليلا هتلاقي اخلاقياتنا ماشاء الله مش الشهامة بس

هو للامانة لسة فيه ناس كويسة بس للامانة بردوا ...الاغلبية ضايعة
خالص تحياتي

khaled said...

المصرى الاصيل ده كان ايام زمان دلوقتى
خلاص الموضوع انتهى
بجد احنا فى مرحله جديده ودى فى بوادرها