Friday, June 8, 2007

عن عمل المرأة قالوا

عن عمل المرأة قالوا
بردة رساله وصلت من المجموعة الى بحبها جدا
الفاجومى
و كانت بتتكلم عن عمل المرأه بصراحة و كانت بتشرح ازى ان عمل المراه هادم للبيت
بصراحة فكرت مع نفسى فى الموضوع دة و قلت
هل فعلا عمل المراه دة بيضيع الاولاد و بيهدم البيت؟؟؟؟؟
لقيتنى بطلع مميزات و عيوب للموضوع
و بما انى مش عارفة اشرحها كلها فى المجموعة و محدش فاهم وجه نظرى بالظبط
فقلت اكتبها و اشرحها فى مدونتى و اعمل الى انا عايزاه
:))
الموضوع فعلا له مميزات و عيوب بس الموضوع مش متوقف على
ان المراة لو اشتغلت يبقى خلاص بيتها اتهدم و عيالها ضاعوا
الموضوع بس محتاج تنظيم فى الوقت مش اكتر
و دة الى ممكن يفرق سيدة عن اخرى
انا لو بشتغل و محددة وقت معين لشغلى و برجع اشوف طلبات بيتى و بعديها طلبات زوجى
و اولادى يبقى خلاص فين المشكله؟؟؟؟؟
و فى امهات قاعدة فى البيت و عيالها ضايعة و بردة فى امهات برة البيت و عيالها طالعة من المتوفوقين
بش مش هتكلم على موضوع بره البيت دة لان فعلا الام مش لازم تبقى بره البيت كتير
يعنى لو ساعات العمل العادية و بترجع تشوف حالها يبقى خلاص
اعتقد ان معظمنا امهاتنا بيشتغلوا و اتربينا بردة احسن تربية
الام مهمة جدا فى البيت ’’ايوة طيب ماهو الاب كمان مهم و جداااااااا
انما يقولولك الام لازم تذاكر لعيالها و لو اشتغلت مش بتبقى فاضية
لا اله الا الله
طب ماهو طيعى انها تذاكرلهم
الام بتشتغل او مش بتشتغل بتقعد تذاكر و طبعا بجانب الدروس و محدش بقى يقولى
ان الام لو قعدت يبقى مش لازم الدروس
احنا بنبص للموضوع من بعيد ليه
انا عن تجربة شخصية
مامتى بتتشغل من بعد الجواز و جابتنى انا و اخواتى و عمرى ما حسيت بموضوع
انها مقصرة معايا بتشوف طلباتنا كلها و بنخرج و نروح هنا و هناك
و دة كان بيغظنى كانت بترجع من شغلها الاقيها مش بتقعد بتعمل دة و دة و دة
و فى الاخر بتقولى يلا هاتى كتابك و بما انى مكنتش بحب المذاكرة
كنت بقولها انتى مش بتشتغلى مش خلاص
يا ستى هنبقى اذاكر لوحدى
الاقيها جابت العصايه و تقعد تذاكرلى
قهر يعنى
ما علينا متفكرونيش بذكريات مؤلمة
:((
و اعتقد ان الموضوع مش عند مامتى و بس,, امهات كتير كدة
و بردة من ناحية تانية مش هنكر ان فى امهات فى طبعها الاهمال و السبب دة مش لانها بتشتغل
لانها هى كدة اصلا
بيقولولك المرأه العامله و الشيطان
و انها بتتعرض للمضايقات فى العمل
مين قال يا جماعة ان المرأه العامله بتتضايق و بتتعرض لمثل هذة المضايقات؟؟؟؟
و بعدين الشغل هو السبب؟؟؟
يعنى كل التحرشات الى بتحصل بتحصل للستات او الفتيات الى بيتشغلوا بس؟؟
طيب و البنات الى مش بيشتغلوا ؟
طيب و الستات الى راحة تجيب حاجات بيتها مش بتتعرض بقى ولا ايه؟؟؟؟؟؟؟؟
و بعدين قلتها قبل كدة ان المرأة بتحب تحقق ذاتها
و بتحب تبقى راضية عن نفسها لو كانت راضية عن نفسها هتنفع بيتها و اولادها و جوزها
و لو مكنتش راضية عن نفسها و اتسجنت و بقى عندها وقت فراغ هيعيش الزوج و الاولاد فى نكد ازلى
طب ليه نخلى طاقة الست المدفونه دى تطلع فى التفنن فى النكد و الرخامه
و الرغى فى التليفون و المجايب فى سيرة دى و دى
طيب ما نخليها تتطلع فى حاجة مفيدة تستفيد هى منها و اودلاها كمان و بيتها و زوجها
و اكيد شرط مهم انها متقصرش مع اى حاجات من الى قلتها من شوية
نديها الفرصة
و اخيرا يا ريت بلاش نقول زوجات الصحابه و اهل البيت
جميل طبعا الاستشهاد بيهم
بس فى ناس بتشتهد بالحاجات الى على مزاجها و بس
كل زمن مختلف دة اولا
ثانيا احنا مش مثاليين يعنى قوى علشان نتمثل بقول الرسول و نقول سنه و لازم و حرام
و طبعا لازم نحاول نكون نصة او نعمل على الاقل زيه
بس يعنى اعتقد
اعتقد ان معظم الرجاله الى بيتكلموا عن الرسول دول اساسا مش بيعملوا زيه
و بقول معظم و مش بعمم
بس بيخدوا الى هما عايزينه و يسييبوه الباقى
اديكوا مثال
واحد بيأكل بايه بياكل الرز بايده و تسأله ليه بتعمل كدة ؟؟؟
يقولك اصل الرسول كان بيعمل كدة
الرسول كان بياكل بايده
طيب ماهو علشان مكنش فى معلقه
ثانيا هل انت اصلا بتعمل زى الرسول بتصوم ؟ بتصلى السنن؟ بتتحدث بمثل طريقتة ؟
معتقدش
يا ريت كل واحد يفكر بوجهة نظر موضوعية
و لا ايييييييييه؟
و يكون عادل
انا ممكن اشرط على مراتى انها ان اشتغلت متقصرش فى بيتها و ان قصرت اقولها اقعدى فى البيت
اظن دة حل عادل يخلينى احقق ذاتى و كمان مقصرش مع الى معايا
تقريبا خلصت الى كنت عايزة اقولها و عموما لو افتكرت حاجة تانية هبقى اكتبها
:))

25 comments:

khaled said...

الانسان بيكتسب مكانته من دوره فى المجتمع
واعتقد الانسان الى ما بيشتغلش سواء ذكر او انثى مش هيبقى له مكانه
ولو ركذنا على المرأه هنلاقى ان مهما كان
الرجل ملتزم ومتدين وزوجته لا تعمل
يظل نظره الرجل اليها على اد دورها

انا احيي المرأه العامله وده لا يختلف مع ديننا فى شىء لو كان شغلها كويس ومحتلام

واعتقد كل الى خايف ان عمل المراه سوف يؤدى الى انحرافات فى المجتمع يبقى المجتمع ده اصلا مريض

غمض عينيك said...

هو في ناس لغايه دلوقتي بتقول ان الشغل للمراه غلط؟
في نماذج كتير ناجحة اوي في شغلها وبيتها اكتر من الرجالة نفسهم
بس هي الفكرة صح ازاي انها تنظم وقتها وترتب اولوياتها بحيث لا حد يحس بتقصير من ناحيتها ولا هي نفسها تحس انها بتهلك نفسها بين مسؤليات الشغل والبيت

تحياتي ليكي

محمد سمير

محمد عبد الغفار said...

الحل الأخير ده منتهى الظلم

الموضوع ببساطه انه شروه على بعضها مجمل عيوب ومجمل مميزات

ان كان همك الأسره فالمعادله خاسره

وان كان همك المال والفرد فالمعادله رابحه

قاسم أفندي said...

شوفي يارانيا
انا مقتنع بحرية المرأة في العمل يعني لو عايزة تشتغل هي حرة ولو مش عايزة برضه هي حرة
بس الاخوة اللي بيحرموا عمل المرأة المفروض بقي يلبوا كل طلباتها ويجيبولها خدامة كمان
مش عارف ازاي في ناس لسه بتفكر كده النهاردة
علي فكرة زوجات كثير من الصحابة كانو بيشتغلوا
هي السيدة خديجة مش كانت كانت بتشتغل بالتجارة برضه؟

kmam said...

رانيا
اؤيد ما ذهب اليه الاخ قاسم افندي ، و هو ان الامر خاضع لحرية المرأه و مدي تناسب اختيارها مع حياتها و حياة اسرتها ، تماما كما ان الرجل لو عرض عليه عمل يهدد كيان اسرته فانه سيرفضه ، فالمرأه اذا ارادت ان تعمل فعليها الا تعمل عملا يهدد كيان اسرتها
تحياتي لك و ان كنت اخشي عليك ما سوف تتعرضين له نتيجة نشرك لرأيك الذي لم تستطيعي نشره في مجموعة الفاجومي ، فغالبا سيعتبر هذا تجريحا و تشهيرا بسمعة المجموعه من وجهة نظر مشرفي المجموعه (حصلت قبل كده مع واحد صاحبنا) و لك الشكر علي اثارة موضوعات هامه

Rania Lelah said...

خالد
كلامك عين العقل
يحميك لشبابك
:))

غمض عينيك

قلت كدة و الله لفيت ناس بترد عليا و بتقولى لا شغل الست غلط لحد دلوقت
مرسيى لزوقك

محمد عبد الغفار
عندك ظلم ممكن بالنسبة لناس تانية بتفكر ان شغل المراه عيب و حرام و لا يصح علشان التحرشات و الشيطان و كدة ممكن يقتنعوا بالحل دة

قاسم افندى
حلوة قوى موضوع الخدامه دى
بجد يا ترى ممكن ؟

خالد مصطفى
يا مرحبا يا مرحبا
المدونه نورت
و اكيد طبعا انتم السابقون
بس اعتقد ان الموضوع ممكن يعدى و يفوت
ربك يستر
تحياتى لك
و شرفتنى

كلام لوجيك said...

انا متفق معاكى فى كل كلامك
وانا من مؤيدي عمل المرأه اذا لزمها ذلك وايضا بحيث ان تراعى مسؤلياتها الاخري ولا تطغى مسألة على اخري

وعمر ما كان عمل المرأه فيه تدمير للأسرة او البيت

وبعدين يا جماعة فى اخر احصائية حكومية قالوا ان 30 % من بيوت مصر المرأة هى التى تقوم بالعمل والصرف عليها
ده غير طبعا الغالبية العظمى اللى بيساهموا مع الزوج فى الإعالة ومصاريف وتكاليف الحياة الباهظة

دمتم جميعا بخير

Reemo said...

أنا متقفه معاكى تماما فى كل حاجه قولتيها يا رونى
المشكله دايما فى عمل المرأه بيبقى فى تنظيم الوقت
ستات كتير بتشتغل ومش بتعرف تنظم وقتها وده بيأثر سلبا على بيتها وجوزها واولادها
وطبعا بما ان السيئه بتعم فبيبقى الانطباع المجمل عن عمل المرأه انه سئ
أنا رايى انا الست اللى متعرفش توفق بين الاتنين لازم تختار البيت
أما لو عرفت توفق وده على فكره نسبه مش كبيره يبقى عملها نوع من الارتقاء بنفسها أولا وبيتها وعائلتها ثانيا
أما بخصوص التحرش فزى مانتى قولتى فى كل مكان ومش مقتصرعلى المرأه العامله فقط
لا ده فى كل حاجه فى الشارع والمواصلات والكليات والسوق
يعنى الظاهره دى غير مرتبطه بعمل المرأه أصلا
أنا بأيدك فى الراى يا رونى واكبر دليل انى برده انا كمان ماما كانت بتشتغل وعرفت تربينا كويس وتهتم ببيتها وشغلها وتوفق بين الاتنين وعمرى محسيت انها قصرت فى حاجه
وبتمنى انى أكون زيها بصراحه
موضوعك بجد حلو أوى يا رونى
تستاهلى عليه بوسه :)))
محبتى

Anonymous said...

في حل..
لو المرأة تقعد في البيت تربي عيالها وتهتم بامور البيت بدل الشحططة بره
مقابل راتب شهري يدفعه لها الزوج !
مش كده احسن ؟
عدل ولا مش عدل؟

انا بخرف بقول ايه !؟

يا مراكبي said...

مشكلة الناس الللي بتتكلمي عنهم دول هي تعميم الأشياء وإطلاقها كده وخلاص

وده مش في الموضوع ده بس .. ده في كل أمور الحياة

لكل حالة لها ظروفها وخصوصيتها تماما .. لازم نفهم إن مش كل الستات طبعهم واحد .. ولا ظروف شغلهم واحدة .. ولا ظروف أسرهم وعائلاتهم متشابهه .. ولا ولا ولا

وبالتالي اللي ينفع نطبقه على حالة .. مش لازم ينطبق على التانية

احمد عزام said...

هاي رانيا
انا بصراحه شديده.......ضد عمل المراه....لان المخلوق الرقيق الحالم ...لايمكن يتكيف مع ظروف الشغل القاسيه.....ومن طبع المراه اثبات وتحقيق الذات......واعتقد ان الاعتناء بالزوج وتربيه الاولاد وتاسيس اسره ناجحه هو قمه النجاح وتحقيق الذات...واعتقد ان مش في ست تقدر تحقق المستحيل وتشتغل وتعمل بيت مثالي....لازم هيبقي في تقصير.....واعتقد ان الرجل مش يستحق التقصير في حقه.....ولا الشغل هيسمحوا بالتقصير فيه.....حليها بقي

Monzer said...

ايه رأيك نختلف ونتخانق ونمسك فى خناق بعض والنا ستتلم علينا وتلمى عليا المدونين
انا مستعد وواكل لقميتن زيادة وانت باين عليك واكلة عشر لقم مشلقمة واحدة

طبعا ده مقدمة تنميك تنومي تغطاطيسى

الجد باه
ايه رأيك نبص للموضع من نظرة تانية خالص وهي ان الست الى بتشتغل ده واخدة مكان واحد متعلم ومؤهل زيها برده لو اشتغل هايعرف يفتح بيت لانه هو الى بيصرف وبيجب بلاوى زارقة من شبكة لمهر لشقة لمصاريف حياتية اخرى موجودة فى كل بيت
اما الست لو اشتغلت ففلوسها معلش باه على قلبها مش هاطلع مليم وتحطه فى البيت
برده مش هانقول هانكنس كلالستات منسوق العمل بس معلش فى بعض السيدات بيبقوا موجودين والله ديكور بيستغلوا وبيتعبوا مانكرش وبيطلع عينيهم الاتنين بس ممكن لو راجل يسد وممكن مايسدش مش عيب فيها بس علشان النقطة الى قلت عليها
بالتأكيد الست العاملةبتتعرض مشهانقول لتحرشات لا لمضايقات أكتر من الست الى قاعدة فى البيت حتى ولو عندها عربية
كده انا طولت جدااااا
وجزاكى الله خيرا

AHMED SAMIR said...

رانيا....ازيك عاملة ايه؟
بصي يا ستي انا هتكلم عن نفسي
انا شخصيا لا احترم المرأة غير العاملة والعكس تماما للمرأة العاملة بحس انها فعلا شخصية وعقل وروح عالية وثقة بالنفس والعكس تماما بالنسبة للمرأة الغير عاملة
مش متخيل اني اكون متزوج واحدة انا شغلتها في الحياة....قاعدة طول اليوم في البيت علشان تصدعني اخر اليوم من الفراغ القاتل اللي بتعانيه
ناهيك بقى عن ضحالة الثقافة وقلة المعلومات والصدى اللي ضرب في المخ
رانيا:
مش ممكن لحد دلوقتي في بنات بتتخرج من الجامعة وراسمة لحياتها انها تكون ست بيت
تحياتي يا رانيا
بوست هايل

قاسم أفندي said...

علي فكرة وعلي حد معلوماتي ان الزوج مكلف ان يجيب لمراته حد يخدمها (مش يخدم البيت لان خدمة البيت المفروض شرعا مسؤولية مشتركة) ده في حالة انه يكون قادر
اما في حالة انه مش قادر فالمفروض انهم الاتنين يساعدوا بعض في البيت واذا هي قامت بيه لوحدها فده يعتبر فضل وكرم منها
هذا والله أعلم
شوفتي انتوا مدلعين ازاي؟؟؟

Anonymous said...

والله يا جماعة الموضوع ده
صعيب (صعب +عصيب) لأنه في ألف رأي و رأي
أنا كنت ضد الشغل
مش عشان ولا سبب
بس عشان أنا عارفة قدراتي الصحية مش هتتحمل الارهاق اليومي بتاع الشغل و بعدين شغل البيت
لكن إذا ربنا سبحانه و تعالى هيقدرني
هشتغل ليه لأ
كمان في نقطة تانية مهمة
أصعب حاجة على المرأة إنها تطلب فلوس من زوجها
لأنه في الأول بيكون بالنسبة لها راجل غريب خاصة في أول سنة زواج
فتتكسف تاخد منه
و دي حقيقة واقعة يا جماعة أنا مش بقول كلام و بس
كمان أنا من بعد ما جربت الشغل الحقيقة..وأنا متحمسة ليه تاني بعد ما أتخرج
إن شاء الله
إحساس الواحد مننا بالقرش اللي في إيده
بيصرفه فين...؟
في إيه ؟
تعب فيه أد إيه
كل دي حاجات جميلة
بتسعد الانسان أكتر
و بس خلاص
أنا تعبت
منى المحمودي

Anonymous said...

اللي بيقول قال الله وقال الرسول, هل فعلا الله ورسوله حرم عمل المراه بالطبع لا طالما العمل شريف فلا غضاضه في عملها,يبدولي أننا سوف نبقي في هذه الحلقه المفرغه وننشغل بتوافه الامور هل الغني حرام ولا لا ,هل االحجاب فريضه ولا سنه وغيرها من الاسئله التي تخدرنا ونسي واقعنا كويس, في ديننا العظيم حاجه اسمها فقه الاولويات لكن للاسف ابتلينا بنوع من أنصاف المتدينين قال عنهم الشيخ محمد الغزالي "لو يستريح الدين من هؤلاء"

Anonymous said...

انا شايف انه لما تكون المراه ليها دور فعال ويكون لديها القدره على عمل شىء مفيد فيجب ان تعمل
اما لو حتقعد فى الوظيفه تقشر بطاطس يبقى بيتها احسن لها
وعلى فكره انا اول مره امر على البلوج ده وعجبنى

Monzer said...

آسف على التحليق خارج السرب
ولكن إيماننا بدفاعكم عنمبدال الحرية
ندعوكم للتضامن مع عمر الشرقواى المعتقل فى قسم طلخا

إثر قيامه بتغطية انتخابات مجلس الشورى
وجزاكم الله خيرا

Rania Lelah said...

كلام لوجيك
و الله كلامك منطقى
و شكرا على المرور و مرسى لزوقك

ريمو القمر مريسيى على البوسة يا قمرى و اكيد السيدات العاملات مش علشان عاملات يبقوا مهملين فى بيتهم و الذى منه
تحياتى يا قمرى

عمار جرار
دبست نفسك يا حلو بموضوع المرتب دة
انت لقطة يا بختها بيك
:))))

يا مراكبى
عين العقل و الله
بعض الناس بقوا واخدين كلام ربنا و الفتاوى موضة و حاجات بيرسموا بها
نسيوا ان لكل واحد نظام و ان الرجاله و الستات فيهم الوحش و فيهم الحلو و ان الشيطان معرض لكل واحد
مش للست العامله و بس
تحياتى

Rania Lelah said...

احمد عزام
الانثى كائن ايه؟
خير و الله ان لسه فى حد بيقول ككدة
تحقيق الذات انها تحس بانجازها و انها اتعلمت علشان تخلى الناس تستفاد
انت حر فى رايك
hapasa
لالالالالا
اوعى تفتكر انى بنوته يبقى هخاف متعرفنيش
المهم
ردا على تعليقك عايزة اقولك ان ربنا هو الرزاق
و محدش بياخد رزق حد
يعنى لو اشتغلت الست مش هتاخد رزق الولد الى معاه مؤهل
كل واحد بس يدور على شغل بضمير و مش يبقى عايز يشتغل مدير على طول
كل حاجة بمراحل
شرفت يا باشا

Rania Lelah said...

الباشا احمد سمير
المراه العامله مهمة جدا
بس بردة المراه الغير عامله
يعنى
لها اهميتها لان فى امهات معندههاش القدرة انها تمشى الاتنين مع بعض
فاكيد لها احترامها بردة
تحياتى


قاسم افندى
يا ريت نكون مدلعين كدة اقتراح حلو

منى
منورة يا سكر
كلامك مش غلط ماهو كل واحد ادرى بنفسة انا عن نفسى و الحمدلله اقدر على المجهودات دى و انت لا و غيرنا انا و انت بردة مش يقدر بس الاهم ان يبقى فى حرية
و احنا نشوف الى فى مصلحتنا و نبقى احرار
تحياتى

وحيد
متفقة معاك و ربنا يهدى الجميع

محمد جادو
ماهى دى قضية تانية ان الى بيشتغلوا يبقوا عندهم ضمير علشان على الاقل يبقوا يستهلوا المرتب بتعهم و مش الستات بس الرجاله كمان الى بتروح تمضى و تروح شغل تانى و ظز فى الناس الى عايزة مصالحها
موضوع خطيررررر
و مرسيى لمرورك
تحياتى

Rania Lelah said...

hapasa
قلبا و قالبا
وربك قادر
تحياتى

AHMED SAMIR said...

رانيا هانم:
دة وقت التاج
سيادتك ليكي تاج عندي
يرجى سرعة الاجابة
تحياااااااااااااااتي

Monzer said...

عمر خرج بالسلامة
وده اقتراح اتمنى ان ينال قبولكم
انا بدعوكم رسميا لحضور احتفالية مهرجان القلوب التى تستمر سبعة أيام
ويمكنكم اختيار اي يوم او أية اسمية وذلك لتحقيق مزيد من التواصل الانسانى بين المدونين ولمعرفة مزيد من التفاصيل
ادخل عندى
www.hapasa.blogspot.com

وجزاكم الله خيرا

غمض عينيك said...

انت فين يارانيا محدش شايفك ليه

طمنينا عليكي
محمد سمير