Wednesday, April 30, 2008

الذ تاج من احلى شرين


التاج دة وصلى من شرين و بصراحة التاج لذيذ بجد
اتكلم عن نفسك فى عشر نقط
اولا
انسانه طموحة جدا و ساعات بشوف ان دة صح و ساعات بقول عليه غلط
بحب الشغل جدا جدا بحس انى جوايا طاقه كبيرة
لازم تستغل صح لانها ممكن تبقى بالنسبة ليا طاقه مدمرة
و على راى ماما
حاسة ان نهايتى مش هتبقى طبيعية
ثانيا
بحب الحب قوى مشاعر تضحية عطاء بلا حدود حاجات كتير
مهما كتبت عنها مش هعرف اوصفها
الذ حاجة ممكن اشوفها و انا ماشية
اتنين ماشيين مع بعض مسكين ايد بعض و باين عليهم الحب
و الحب اللى بحس بيه مش علشان مسكين ايدين بعضهم
بحسه اما الاقى الولد بياكل بعنيه البنت الى معاه
و بيبقى خايف عليها قوى و نفسه يخفيها من عيون الناس كلها
و البنت بلاقيها بتبصله بحب و امان و انها اكيد حاسة معاه بالحنان
يا بختهم
ثالثا
بحب البحر قوى قوى
بحب اما اكون مضايقة اروح مكان فيه بحر و اقعد قدامه و اكلمه و افضل اتكلم و اتكلم
و اسيب دموعى هى كمان تتكلم لحد ما الاقى نفسى هديت
بحب فيه كل حاجة ثورته و هدوءه بحب امواجه اما تضرب الشاطىء بحب قوى منظره بليل
و ساعه الشروق
و خاصه ساعة الغروب
بيهز فيا مشاعر غريبة
بس بجد جميله قوى
رابعا
اعترف انى ساعات بسيب حقى
يمكن اكون بتكسف اطلبه
و يمكن كمان اكون مش محتاجاه و اسيبه بمزاجى
انما الى يغظنى قوى ان الى قدامك يتعود منك على كدة
او انه يحس بالانتصار انه اخد منى حاجة هو متهئيله انها غصب عنى
خامسا
ديما بحب ادى الامان لاى بنى ادم معايا
حتى لو عرفته لمرة واحدة
بحب ديما احسسه بالامان مش لاكتر من انى اصلا كدة
بحس ان اى حد اعرفه و معايا بقى مسؤول منى و لازم احميه من اى حاجة
او من اى موقف يتعرضله
بحس ان دة واجب عليا
و دى حاجاة تخنق , عارفه
سادسا
بموت فى حاجة اسمها مصر
بعشق ترابها بجد
بحب نيلها و جوها و نسيمها و بحرها
بحب كل حاجة فيها
و يا رب تبقى احسن بلد فى الدنيا
و هفضل وراها مش هسيبها
سابعا
بحب ديما اطور من نفسى
و بحب ديما اتعلم كل يوم جديد
و بسعد قوى اما بحس انى اتغيرت عن السنه الى قبلها
او انى بقيت اعقل من قبل كدة
بحب ديما ابص لفوق
و بحب ديما انى احلم و الاحسن و الى بعتبره ميزة و غيرى بيعتبره عيب
انى بحاول على قد ما اقدر احقق احلامى حتى لو كانت مستحيله
بحاول و ساعات بقدر و ساعات ربنا مبيردش
بس برجع احاول تانى
ساعات كتير بفشل فى حاجات
بس بحب ديما ارجع و اقعد مع نفسى و احاسبها و اشوف فين غلطاتى
و اظبط نفسى و استعد من تانى للمواجهة
و ارجع احاول من تانى و عادة بنجح و الحمدلله
الحمدلله مؤمنه انى اقدر اعمل اى حاجة فى الدنيا لو انا عايزة اعملها
بحس انى قدراتى ملهاش حدود و بحمد ربنا
ثامنا
ساعات بحس ان الصدق فىكل حاجة مش بيجب غير مشاكل بالنسبة ليا
لانى اتاكدت ان المجتمع الى احنا فيه فعلا بيصدر اوامر على البنت او الست
و بيحطلها حدود ظالمه و بيقولها متعديهاش
كنت ساعات كتير بضطر اخبى الحقيقة علشان
زى ما بيقولوا امشى حالى دة على المستوى الشخصى بس
و طبعا دة بيرجع ان الكل فاكرنى مجنونه
انما الحمدلله خلاص اتعودت انى بقول الى انا عايزاه
و اى حد يكلمنى اقوله انا كدة رانيا طبيعتها كدة
غير كدة بقول كلمه الحق فى اى موضوع و بحاول ابقى محايده بقدر الامكان
و بحب ديما لو اقدر اعمل حاجة تساعد فى اى موضوع او قضية او اى شىء
بعملها و اقول الحق و لا يهمنى
و ساعات بقول كلام رخم بيطلع منى كدة
بس و الله مش ببقى قصدة
بس الى قدامى اكيد بيضايق و اكيد لو مش عارف طبيعتى
و بحاول احاسب على كل كلمه تطلع منى و ربنا المعين
تاسعا
بعترف انى عصبية
بس عصبيتى دى زادت قوى فى الاوقات الاخيره من مواقف اتعرضتها
و كانت فى منتهى القسوة
بحاول اغير من نفسى
بحاول ابحث عن المثاليه
عارفة انى مش هوصلها بس على الاقل اكون قربت منها
بفكر كتييير جدا طول ليلى و نهارى بفكر فى حياتى
و ازى انى ممكن متحوجش لاى حد فى يوم بحب اعمل حسابى علشان
اما اتحط فى اى موقف اعرف اتصرف فيه
طبعا كل شىء بتاع ربنا
بس برتاح اما بعمل حسابى لاى ظرف مفاجىء او اى حاجة تحصل
ومشكلتى الاساسية و فى ناس بتعتبرها ضعف انى بفكر بقلبى كتير قوى
بفكر بعواطفى و دى مشكله فى الزمن الى احنا فيه دلوقت
و طبعا دة اثر كتير عليا فى حياتى الشخصية و العمليه
و اتظلمت كتير بسبب ده
عاشرا
بعتبر نفسى انسانه كويسة مش وحشة و حتى لو كنت عملت غلطات
مفيش انسان معصوم من الغلط و بعتبر نفسى مجنونه فى مشاعرى
طيبة و ممكن اكون بعرف اظهر الحب و الحنان الى جوايا
مش بعرف ابخل بيهم على اى حد اعزه او احبه
بعتبر نفسى بعرف افكر كويس و مع ان الكل بيقف ضدى فى افكارى او فى تصرفاتى
فدة انا بعتبره انى ماشية صح
مع العلم انى بفكر فى كل اعتراض بيتوجهلى و بحاول افكر فيه بالمنطق
عارفة انى رغيت و كتير
بس لو كان اتقلى اكتبى عشرين نقطة كنت كتبت اكتر
لسه فى حاجات كتير عايزة اكتبها عن نفسى
اختار خمسة و اديلهم التاج
يا مراكبى
عمار جرار
احمد سمير
قلب ينبض لله
ا ب ج د
لازم تبلغيهم
اكيد هيحصل
و مش ناوية ارجع التاج
للى بعتهولى تانى
طبيعى يعنى

31 comments:

Desert cat said...

انتى انسانة رومانسية جدا
ووفية ومخلصة وقلبك مليان بالخير
دمتى بكل خير يا جميلة

AHMED SAMIR said...

يعني ينفع كدة؟
تورطيني التوريطة دي
انا شايف التاج دة من زمان في مدونات كتيرة وكان شعاري يا واد طنش خالص
بس بما ان الفرمان صدر يبقى وجب التنفيذ
علم وينفذ يا فندم
بس تعرفي يا رانيا
تاج صعب جدا...والاصعب هي اجابتك..رائعة بجد
بحييكي عليها
تحياتي واحتراماتي

مـحـمـد مـفـيـد said...

تحيه لكي ولهذا التاج
الذي جعلنا نبحر في اعماقك ونري اشياء ونعرف اجزاء منكي لم نكن نعرفها

khobayb said...

إجابات جميلة

ربنا يكرمك وينفع بيكي

وكويس إنك قلتي عن النقطة دي :

"ساعات بحس ان الصدق فى كل حاجة مش بيجب غير مشاكل بالنسبة ليا"

إنك اتعودتي تكوني صريحة

وتأكدي إنه لو بدا إنه بيجيب مشكلات دلوقتي ..

هيظهر إنه الأفضل ..

على الأقل من حيث الراحة النفسية

سنووايت said...

التاج دا لف بجد علي كل المدونات لدرجة ان لما اتبعتلي ما كنتش عارفة ابعته لمين :)
بس هو جميل لانه ادانا فرصة نعرف بعض اكتر
اجاباتك تلقائية وحسيت فيها بالصدق
اوي

كله جميل ما عدا العصبية بس كويس انك حاسة بكدة وحاولي دايما تفكري ان مافيش حاجة تستاهل مهما كانت انك تتعصبي علشانها

يارب دايما تحققي كل اللي عايزاه

Wish I were a Butterfly ... said...

إجاباتك على التاج جميلة أوي
بس فيه مشكلة كبيرة أوي بالنسبة لي !!! دة بجد
حاسة إني أنا اللي بتكلم مش انت!! بجد زيادة أوي
:)
و كل نقطة أحسها أكتر من الأول، بس يمكن أنا اوحش منك شوية في موضوع إنك عايزة تتحسني و تطوري نفسك و كدة... أنا تقريبا وقعت في النقطة دي خالص الحمدلله
بجد من زمان قلتلك إني حاسة مدوناتك شبهي أوي، بس التاج دة....زياااادة :)
إجاباتك جميلة و صادقة أوي يا رانيا
تحياتي

ابن رشد said...

جميل اوي التاج دة بيعرفنا على اخواتنا بسرعة جدا
بس بجد انتي حد كويس جدا

تحياتي

Unknown said...

بقى 10 نقاط تكلمتي بيها عن نفسك، ومفيش ولا نص نقطة عن عمار جرار؟!! لألأ يا رونة ملكيش حق !
هههههه
دي اول مرة يتمررلي حاجة اسمها تاج، وده من ايه لامؤاخذة؟ بس اللي فهمته انه حاجة زي الاستمارة بنحط فيها معلوماتنا بطريقة عفوية..
اجابتك حلوة قوي.. بس انا مش عارف اكتب ايه ولا ايه.. وابتدي منين.. يا ريت تملّيني من عندك.. هههههههه
سلام

Unknown said...

أجاباتك تلقائية و صريحة

صوت من مصر said...

التاج ده فضح مصر كلها
بس توريطه فى الجول يا رانيا ؟

Anonymous said...

اشكرك رانيا انك عرفتينا علي جوانب كتيره من حياتك
و قربتينا اكتر منك

شخصيه جميله و رقيقه
دايما بقول ان البني ادم صعب يتكلم عن نفسه لكن اجاباتك تقلائيه و قريبه من القلب

شكرا و تحياتي

الفارس الملثم said...

جميلة اوي اجاباتك يا رانيا , ويمكن بعضها بيلمس شئ جوايا , زي حبك للبحر وحبك للحب في حد ذاته بمعني انك تشعري بغبطة لما تلاقي اتنين بيحبوا بعض بجد ..

اتمني لكي السعادة وتحقيق كل ما تتمنيه

تحياتي
محمد

walaa said...

اجابتك جميله على التاج
العصبيه يارب تتحلصى منها بس على فكره سريع النرفزه بيبقى قلبه ابيض
انا كمان بحب البحر زيك هو انت اسكندرانيه ولا ايه

جميل قوى ان الواحد يتطور من نفسه ويحاول يعمل الاحلى فعلا دى ميزه مش عيب
الصدق جميل بس الناس هيه اللى بقت بتحب الف والدوران
انا كمان بحب ان اكون مباشره العيب مش فيك
لالالا فى اللى حواليك
تحياتى ولاء

جيفارا المصري said...

الذ حاجة ممكن اشوفها و انا ماشية اتنين ماشيين مع بعض مسكين ايد بعض و باين عليهم الحب و الحب اللى بحس بيه مش علشان مسكين ايدين بعضهمبحسه اما الاقى الولد بياكل بعنيه البنت الى معاه و بيبقى خايف عليها قوى و نفسه يخفيها من عيون الناس كلهاو البنت بلاقيها بتبصله بحب و امان و انها اكيد حاسة معاه بالحنانيا بختهم
__________________________________________________
عارفه انا اول مرة احس بطعم الحب الحقيقي كان مع لمسة ايد زي اللي بتحكي عنها ومن يوميها وانا غرقان في بحور الحب وبصراحة كدا لما بشوف اتنين ماسكين ايد بعض في الشارع وهايمانيين وبتكون حبيبيتي بعيد عني احساسي بيبقي وحش اوي وباحس بالأنانية
حاجة كده زي فلانزل الغيث بتاعة الشاعر اللي مش فاكر اسمه دلوقت
في الأغلب الحكاية دي بتكلفني مكالمة موبايل طويلة شوية


احساسك بالبحر وتفاعلك معاه جميل جدا
كتير جدا بيحصل معايا نفس الشيء لما بكون متضايق ومخنوق من الدنيا و اللي فيها مش بلاقي غير البحر افضفض له واحكي له و بكون واثق انه فاهمني وحاسس بيا


اجاباتك كلها جميلة وبتحكي عن روح جميلة ومشاعر انسانية غاية في الرقة و النبل

دمتي بخير

shreen said...

عارفة يا رانيا
اول احساس جالى وانا بقرا اجاباتك
قبل حتى ما اوصل للاخر

جه فى بالى انى عايزة احضنك جدا

انت بجد زى ما انا توقعت
انت انا تقريبا

ما عدا موضوع العصبية دة

انا كنت عصبية جدا جدا
وكنت من النوع اللى يمسك الحاجة يدشها على الارض

او اخبط الزجاج او المرايا بايدى من عصبيتى

تلاقيه وقع على الارض وايدى كلها دم

لحد ما وقعت مرة على الارض والدكتور جه
وقالى ممكن يجيلى انفجار فى المخ لو كان ضغطى عالى

وده ممكن يحصل لما اكبر شويه
فخفيت العصبيه لغايه ما بطلتها خالص

انت انسانة جميلة
روحك رائعة
وطيبة

وصريحة مع نفسك
بتعرفى تحبى وما اعتقدش ان عندك القدرة حتى على الكراهية

بحبك جدا
وحبك زاد بعد قرايتى لردودك

Rania Lelah said...

desert cat
اشكرك يا احلى قطة على اطرائك

تحياتى لرقتك
******************
a,samir
اى خدمة
التالج اصله لذيذ بجد
و بيخليك توقف مع نفسك وقفة صريحة شوية

مودتى

Rania Lelah said...

محمد مفيد
اسعدنى تعليقك يا محمد
و اشكرك على هذا الاطراء الجميل

تحياتى
************
خبيب
اكيد اكتشفت انه الافضل خصوصا اما تحاول انك متخفش من حد
و تجبر الى قدامك انه يتقبلك زى ما انت

و مش معنى ده ابدا انك تكابر فى الغلط
بس كل واحد فينا له شخصيته و طباعه الى مش هيعرف يغيرها و خوصوصا لو من وجه نظرك انها بتعتبر من مزاياك

تحياتى

Rania Lelah said...

سنووايت
اكيد لازم نعرف اجاباتك يا سنووايت
و موضوع العصبية
ساعات الموضوع بيخرج من ايدك
بس ارجع و اقول انى هحاول مع نفسى اكيد

تحياتى
***********
wish i was a butterfly
اشكرك يا الذ فراشة فى الدنيا
و اكيد حاجة تسعدنى اما الاقى حد زى
:)

مودتى

Rania Lelah said...

شمس الوناتى

اسعدتنى عودتك للتدوين يا شمس
و يا رب ديما
و اكيد نتمنى نعرف اجابتك انت كمان

لك كل التحيه

********************
عمار جرار
اكيد منتظرة اجابتك و بمجهودك الشخصى
:)

Rania Lelah said...

عاليا حليم
اشكرك على زيارتك و كلماتك الرقيقة دى
تحياتى
***********
صوت من مصر

من ناحية توريطة فهى توريطة
بس الذ توريطة

Rania Lelah said...

اجندا احمرا
اشكرك على كلماتك اختى الغاليه
و ممكن فعلا يكون صعب انه يتكلم عن نفسه و يعرف مميزاته و عيوبه
اما بالنسبة ليا
من زمان قوى و انا بقعد مع نفسى الى جوه
و اكتشفت تقريبا مزايا و عيوبى و اكيد بردة لسه فى حاجات مكتفتهاش
بس ممكن تقولى كل يوم بكتشتف حاجات

احترامى و تقديرى

****************
الفارس الملثم

اشكرك يا محمد
و لو اتكلمنا عن الاجابات
فكانت اجابتك عن التاج ده احسن بكتير
و يمكن برده قلت نفس كلامك
كلامك فيه كتير منى

تسلملى

Rania Lelah said...

walaa
للاسف مش اسكندرانيه
بس مسمنعش انى بعشق بردة اسكندرية
انما بموت فى حاجه اسمها بحر بجد

و موضوع الصدق
المشكله اللى كانت عندى ان الناس مكنتش بتصدقنى اما ابقى صادقة معاهم
و اول ما الف و ادور
على طول تصدقنى
فبصراحة
اختصرت الطريق
:)
و بتعالج دلوقت و تقريبا وصلت لفترة النقاهه

تسلميلى يا قمرايه
****************
جيفارا المصرى
اسعدتنى كلماتك جدا
و يا رب يديم عليك الحب و السعادة ديمااااااااا
مش متخيل ببقى سعيدة ازى
اما الاقى ان لسه فى ناس بتحب و بتعرف تحب حب بجد

ماشاء الله يعنى
:)
تحياتى لصراحتك

Rania Lelah said...

shreen

مش متخيله يا شرين كلامك عمل فيا ايه
انا كنت مخنوقة قوى اليومين الى فاتو
و اول ما قريت سطورك
بجد فرحتنى قوى
لقيت حد قريب من نفسى
تقريبا زى ما قلتى نفس الشخصية
لانى كنت متخيله و الناس كانت بتوصلى ان مفيش زيى

مفيش انسانه طبيعية تفكر زى او تعمل الى بعمله
و موضوع العصبية
كنت بدات اخف فعلا منها لانى بحاول
بجد اعالج عيوبى
بس المشكله ان دة انهار مع مواقف بجد زلزلتنى من جوه قوى
و بقيت تقريبا زى ما قلتى
ممكن من فرط عصبيتى اكسر اى حاجة و انا مش حاسه

بس اكيد هحاول اخفف منها

غاليتى
لك منى كل الحب و الود

Empress appy said...

هو التاج ده عامل زى المغص لف على كل المدونين زى اعترافات ليليه ليه كده هههههههههههههههه
بس انتى رقيقه قوى وواضح من بدرى

Abo 7anf said...

السلام عليكم
انتى شخصيتك جميله قوى
طيبه رقيقه
بتحبى الحواليكى
بتديهم الامان
مشاء الله

شهرزاد said...

بأهنيكي على صراحتك يا رانيا
أنتي عارفة في كتير من اجاباتك كتيرة شبهي
أنا بسبب التاج ده وانتشاره في المدونات
حسيت فعلا ان الناس في حاجات كتيرة بتشبه بعض أكتر ما بيختلفوا عن بعض

dr.Roufy said...

عارفة يارانيا
أنا باحب التاجات دي جدا
باحب اقراها عند اصدقائي المدونين لكن اجاوب انا لا
:)
فعلا بتديني فرصة استمتع بتفاصيل ودفقات شخصية جميلة من الى بيجاوبها
وانا استمتعت بالتاج دا وباجاباتك عليه

تحياتي

Rania Lelah said...

appy
هو فعلا قريب جدا من اعترافات ليله
فكرتينى بايام زمان

تحياتى
*************
Abo 7anf
اشكرك على هذه الكلمات

مودتى

Rania Lelah said...

شهرزاد
اسعدتنى زيارتك عزيزتى
و سانتظرك دوما

مودتى
**************
dr: roufy
افتقدت تعليقاتك عزيزتى
و اعتقد اننا ايضا نريد ان نعرف عنك المزيد

تحياتى

سندباد said...

زيارة اولي تحياتي علي
المدونة الرقيقة
خالص تقديري

أحمد بكر said...

بحب كل الى انتى قولتى عليه