Thursday, April 26, 2007

المعامله

انا عمرى ما اتكلمت عن ديانه و لا عن مسلم و مسيحى
انا بحترمهم جدا
امبارح و انا بتفرج على الجزيرة لفت نظرى خبر معين
و هو ان اول مرة فى دبى يعملوا كتدرائية
و الموضوع عادى يعنى
بس الى لفت نظرى انهم كانوا بيعملوا لقاء مع الانبا شنودة
و اتكلم على اننا اخوات و مجهود مشكور من دبى الى عملت الكتدرائية دى
و فى الاخر قال كلمه حلوة
ان اكرمكم عند الله اتقاكم
عجبتنى بصراحة و قلت ان الراجل دة بجد بينادى بالاخوة بين الطائفتين
انه يستشهد يعنى بايه من القران الكريم
بس بعدها على طول قال ان الدين عند الله و سكت ثوانى و اببتسم و قال المعامله
: ان الدين عند الله المعامله؟؟؟؟؟؟؟؟؟؟؟؟
لا ان الدين عند الله الاسلام
مش كدة بردة يا اخوانا و لا ايه
احتمال اكون مكبرة الموضوع او فهمته بطريقة معينه
بس مجرد انه يقول ان الدين عند الله المعامله مش صح
المعامله صح بس لو الكلام عادى بيتوضح بيه فكرة معينه
انما الايه بتقول الدين عند الله الاسلام
والى خلاه يقول ان اكرمكم عند الله اتقاكم مكنش يقول الى بعدها و الدين عند الله المعامله
انا مش هفترض سوء النيه
و اقول عنه انه بيحاول يوقع الضغينه و الكلام الفارغ دة
بس على الاقل يعنى ميحرفش الكلم
هل دى آيه عند الاقباط؟؟؟؟؟؟؟؟
و لا ايه بالظبط و لا كان كل قصدة انه بيبن اننا اخوة و خلاص و جت معاه كدة
ارجو الافادة
صح و لا انا غلطانه
لو حد عندة تفسير يا ريت يتكلم و لو انا فهمة غلط يصححلى و اكيد اتمنى انى اكون غلط

20 comments:

Mohamed A. Ghaffar said...

اخينا ده مبتجيش معاه حاجه كده ، وما فعله لم يكن الا ضربه معول اخرى فى طريق الهدم

وقانا الله شره

الحصان الأسود said...

مممممم

معتقدش ....اعتقد انة مكانش قصدة انة يستكمل الآية و ولكنة وجد نفسة في مأزق لأنة لو قال الدين عند الله الإسلام يبقى دة اعتراف ضمني مني منة بأنة لا وجود للمسيحية في ظل اعتراف ضمني منة بأن الإسلام هو الدين عند الله

وبالتالي مكانش قدامة الا ان يقول اي كلمة تانية يصحح بيها موقفة

مجرد رأي شخصي والله أعلم

مصر هى أمى said...

رانيا

طبعا الدين عند الله الاسلام لكن مكنش ينفع انه يقولها

حسام مراد said...

طبعا ومن كلام ان الدين عند الله الاسلام
بس هوه هايقولها ازاى وما اعتقدش نه مش قصده يقولها
سلامااااااااااات

Rania said...

انا متهيئلى كدة بردة
انا اعرف انه يعنى ادم مش عايز يكمل حاجة معينه مكنش استشهد من الاول بالقران و فعلا لو كان كملها كان هيبقى اعترف و صريح
بس ليه ؟ يعمل كدة اصلا؟؟؟؟

hapasa said...

أنا قرأت البوست بتاعك كذا بمرة علشان أفهم الموقف الى صرح من خلال الأنبا شنودة هذا التصريح لقيت ان أول مرة بتتبنى كاتدرائية فى دبي، وقال فعلا تعليق جميل وذكر آية ان أكرمكم عند الله أتقاكم، وده ممكن يكون مرتبط بالموضوع، لكن إنه يذكر إن الدين عند الله الإسلام أنا مش لاقيله علاقة بالموضوع نفسه ولا بالآية الى ذكرها فى الأول
أعلم إن الأنبا شنودة، حافظ للقرآن ودارس جيد له وعارف تكملة الآية كويس يعنى مش اتلخبط فى الآيايت وجت معاه كده
وزي ما انتقى أكرمكم عند الله اتقاكم كان ممكن أن ينتقى آية أخرى أي أخرى مثلا قل يا أهل الكتاب تعالو إلى كلمة سواء بيننا وبينكم، ده أوقع وهو اكيد عالم بها فيهى فى سورة آل عمران ثالث صورة فى المصحف وأكيد يعرفها جيدا

أما حكاية السبب، فممكن يكون بيضرب ويلاقى يشد ويرخى قال ان أكرمك عند الله أتقاكم ، بس برده انتم عليانا احنا يعنى ناهيين المسألة ومش قابليين للحوار بدليل إن عندكم آية حاسة موضوع الدين والحوار مع الآخر وذكر إن الدين عند الله وطبعا كان لازم يسكت مش غحراج ليه على قد هو كان يعتقد إنه إحراج لينا
وفى الآخر العملية مش ناقصة كلام زي ده

سعد أشد السعادة بزيارة المدونة وهى مدونة متألقة فعلا ومحترمة، وأحييكى على التناول الموضوعى الذى لا يستفذ لا مسلم ولا مسيحى بجد الى بيفرق التناول
لكى منى كل التحية

A.SAMIR said...

ماهو مش معقول يعني يا رانيا الراجل اللي هو البابا هيقول ان الدين عند الله الاسلام
تيجي ازاي دي؟هي ممكن تحصل بس لو بعدها قال اشهد ان لا اله الا الله وان محمد رسول الله
عموما طبعا النية دي محلها القلب بس انا رأيي ان الراجل كان يقصد يقول ان المعاملة هي اللي بتحدد تدين الفرد بمعنى ان ممكن ناس كتير مسلمين واخلاقياتها ومعاملاتها لا ترقى للتدين وممكن تلاقي كمان مسيحيين مالهمش علاقة بتعاليم المسيحية
كان بيقصد يقول ان المعاملة بتعكس الدين بصرف النظر اي دين
تحياتي ليكي
معنتيش تتفرجي ع الجزيرة تاني....بلا وجع دماغ

REEMOO said...

رونى انا كمان اعتقد انه مش كان فى نيته اى إساءه
هو بس تلاقيه ابتدى الايه ومعرفش يكمل علشان طبعا مش ينفع يقول ان الدين عن الله الاسلام
وكمان هو على التليفزيون
يعنى مش هينفع طبعا انه يصرح اعلاميا او يسئ لاى ديانه اى كانت
الناس دى دايما بتراعى كلامها اعلاميا
اكيد انتى فاهمه
ده رأيى الشخصى
وممكن يكون غلط او صح
بس الله اعلم بالنوايا

عمر الشرقاوى said...

عزيزتى هذه سياسه يتبعها الاقباط لمخاطبه الاخر من برنامجهم او من منهجهم للوصل الى عقولهم وتبسيط الامور وخلط الحابل بالنابل سياسه من زمان ايام مكرم عبيد لما كان بيدافع عن واحد ويستشهد بايات من القران فالقاضى قاله انت مومن بالكلام ده فرد عليه قالوا انا مومن باللى انت عايزه والحقيقه مش فاكر الحوار صح بس هو ده المعنى

Rania said...

hapasa
مرسيى جدا لزوقك
و شرفتنى هنا
و ممكن فعلا يكون كلامك صح
انا الى استغربتله بشدة انه بياخد من القران اصلا
تحياتى

احمد سمير
اكيد عمرة ما هيقولها بس بردة يا احمد اشمعنى استشهد بالايه دى بالاخص
؟
و ليه اصلا
كان ممكن يوصل المعنى الى هو عايزة بطريقة تانية و انت عارف كدة
صح ما علينا ربك اعلم بالنفوس
و هحاول متفرجش تانى
تحياتى

ريمو القمر ازيك يا سكر
بردة يا ريمو انا مش فهماه غلط بس يعنى كنت احبذ انه يتكلم عموما و مش يقرب من كلام ربنا بس

عمر الشرقاوى
سعدت بزيارتك
و كلامك منطقى كتير
بس مكدبش عليك زعلت قوى من الكلام دة مش لاكتر من انه اتقال فى قناه اخبارية و كمان قدام ناس كتير زى ما يكون متعمد و الله اعلم

رينـــــــــــا said...

وانتى كنتى عايزاه يقول الدين عند الله الاسلام؟؟؟؟؟؟؟؟؟؟
على اساس انه مش كبيرهم
دا رد فعل طبيبعى يا امى
وبعدين مدققيش يعنى عادى
هى جت على ديه ومش هيحرفوها؟؟

Rania said...

رينا
لا مكنتش عايزاه يقول ان الدين عند الله الاسلام
انا مكنتش عايزاه يستشهد بايات اصلا
و لما استشهد يقول آ يه صح

BeLiEvEr said...

سؤال برئ بدل ما الناس عمالة تلسن على الأقباط و البابا بالكلام

هو الراجل قال إنة بيستشهد بالقرآن؟
ولا قال جملة كقول مأثور؟
يعنى قال "كما قال الله فى القرآن"؟

ما هو لو مقالش كده، يبقى من حقة إنه يقول الجملة زى ما هو عايز مدام مش قصدة إنه يقول آيه قرآنية بحذافيرها، يعنى الراجل بمنتهى البساطة خد معنى الآيه بالنسبة ليه و قالها. و إلا بقى كان بأها بالبسملة و نهاها بصدق الله العظيم


أنا شايف، إنك أديتى الموضوع زيادة عن حجمة

khaled said...

انا على فكره انا جيت وقريت الموضوع بس معلقتش مكنش عندى تعليق جايز عشان احنا
زيهم وبنستخدم نفس اسلحتهم فى التصليح بين المسلمين والمسحيين فعشان كده انا موش شايق انه غلطان


اه وبالنسبه للنيو لوك موش عارف حاسس ان الصوره دى احلى فيها قوه كده واصرار
وهدف نبيل يخلينى اموت شهيد وى ما امتش عادى

Rania said...

beliver
لا طبعا مقلش بسم الله مثلا و لا قال صدق الله
انمنا اعتقد انه قال آيه بحزافيرها
" ان اكرمك عند الله اتقاكم
و لا دى مش آيه بحزافيرها؟
واحنا حتى اما بنستشهد بآيه فى مواقف معينه ساعات مش بنقول بسم الله او حتى اما بنخلصها مش بنقول صدق الله العظيم
ماعلينا
حمدلله على السلامة
البحر اخباره ايه؟

خالد

مش عارفة ؟
يا جماعة اعتقد انى من خلال موضوعى انى مقلتش انه بيحاربنا و لا قلت انه بيحاول يوقع و يعمل فتنه طائفية
و لا قلت اى من الكلام العبيط دة
انا كل الى قلته انى سمعت كلام معين و حبيت اعرف يقصد ايه؟؟؟؟؟
و
و قلت انه فعلا لو كان بيستشد بالقرآن يبقى غلطان و ان كان مجرد موضوع و جه على باله الآيتين دول
يبقى خلاص بمعنى خانه اللفظ يعنى
تحياتى لك
مبروك على النيولوك يا خالد

masry said...

لا أعتقد انه كان يقصد أي شئ يسئ للاسلام

masry said...

يا ريت بلاش نقف بالمرصاد لكل كلمه تقال هنا او هناك يا ريت يكون فيه حسن نيه

Rania said...

امممممممممممم
مصرى
معتقدش انى وقفت بالمرصاد
انا اتكلمت بموضوعية و بنيه انى عايزة افهم
اطمن ما انا قلت قبل كدة
انا و لا هقول انه كان بيوقع و لا هقول انه عايز يعمل فتنة طائفية
بس فى الاول و فى الاخر
المفروض عدم الاستشهاد بالقران الكريم
اعتقد انى صح فى دى
تحياتى لك
و شرفتنا بزيارتك

HoNdA said...

انتى صح ع فكرة حاجة مستفزة جدا وهو مكنش ينفع يقول الاسلام لانه كده هيحس انه منظره سىء فمكنش يكون كده م الاول بقا ويقفل بقه

eldoctor said...

ليس معنى الاستشهاد بالاقوال انه يقر بصحتها .. .. انما عموما لا نصدق و لا نكذب هؤلاء الناس .. فلهم أجندة اخرى