Tuesday, April 3, 2007

هوس النت

هوس النت
بصراحة كدة و الشهادة لله
انا مهووسة بموضوع النت دة
لسعت بجد
و اعتقد انه بقى مرض العصر
فعلا سلاح ذو حدين
بس الكمبيوتر كجهاز بقى من الحاجات الاساسية فعلا فى العالم دلوقت
انا مبعملش ابحاث. انا براقب نفسى و لقيت الموضوع زاد و رخم قوى
انا واحدة بصحى من نومى اول حاجة اعملها يعنى بعد الصلاة وكدة
اشوف ايملى
و اشوف البورصه و اخبارها
و محدش يسئلنى ليه؟
سيبونى انسى
ربنا الرزاق:((
باروح شغلى ولو فى اى وقت فاضى
اشوف ايملى و اخبار الدنيا على الجزيزة و العربية
و من الطبيعى انه بيتحرق دمك
ما علينا مش موضوعنا,,,
بعدها اروح البيت اشوف الايميل احتمال تكون فى حاجة جديدة دة
:))غير الشغل الى بعمله عليه
و السيرش و الاغانى و الابحاث و الذى منه
الواحد بيتعب يا خوناااااااااااااا
النت اخد من حياتى ووقتى كتير قوى
بس المشكله انى مش مضايقة و لا زهقانه
و هو دة الى هيجننى
المهم اخيرا و ليس بأخر
هذه بعض الحالات المماثله ,,,,,مش انا لوحدى الى مهووسة بالنت
طلع فى ناس كتيرررررررر





25 comments:

REEMOO said...

فعلا ده بقى مرض العصر
انا كمان من الناس اللى مدمنه انترنت
لدرجه انى ببقى زعلانه اوى انى داخله انام واسيب الجهاز
مش عارفه بس لو فى طريقه اخده معايا فى الحلم :)
بس فعلا بجد لو اضطريت انى اخرج او الشغل او مشاوار مهم وكده ببقى مضايقه فعلا انى هبعد عن النت شويه
ولو فى زياره مثلا عند حد ولا كده
وعنده كمبيوتر ممكن استاذن منه اشوف حاجه فى الجهاز
لولو مش عنده نت ببقى هعيط واقعد اقنعه بضروره النت علشان لما اجى المره الجايه ابقى اتابع برده :)
موضوعك بجد جميل
حاسه انك بتتكلمى عنى
تحياتى

تامر نبيل said...

هو مرض ومش مرض

وكل واحد واستخدامة

وكمان الموضوع عايز تنظيم عشان ماياثر علينا

حلوة حكاية الرجل اللى عايز يشوف الاميل قبل ما يتعدم
ههههههه

تحياتى

Abd El Rahman said...

:D

وربنا تلاقيكي هتموتي ع البورصة وفلوسها ... ارحمي نفسك يا بنتي الكفن ملوش جيوب

A.SAMIR said...

طبعا بوست تحفة يا رانيا كالعادة
النت.....هو في زي النت؟!!!هو انا خلفت الا النت؟
النت دة يااخوانا حاجة كدة نقدر نقول انها احدى الحسنات القليلة جدا للرئيس القائد باني البنية الاساسية.
انا برضة بحب اختلس كل شوية شوية وقت اشوف الميل في جديد ولا لا؟
المصيبة بقى اني اشتريت موبايل اكتشفت انه فيه وايرلس لان....فبقيت بدخل ع النت من الكومبيوتر..ولو الكومبيوتر مقفول بقيت بخش من الموبايل....خلااااااااااص
بقيت محاصر نتيا ومفيش قدامي غير الاستسلام

hamasat said...

حقيقي النت اصبحت تاخذ قدر كبير جدا من اوقاتنا ولكننا لا ننكر انها نعمة كبيرة جدا فعن طريقها اصبح العالم كله قريه صغيرة جداويمكنك في اي مكان بالعالم متابعة كل الاكتشافات الجديدةفي مختلف المجالات
بالنسبة لي النت الماء والهواء الان
عن طريقه اتواصل افضل واكثر ولفترات اطول مع الاهل وباتابع اخبار اولادي بالمدرسه من اول اللي بياكلوه في الكافتيريا مرورا بدرجاتهم علي الواجب اليومي بالمدرسه لانه يحدث يوميا في آخر اليوم الدراسي وبكدا باضمن مذاكرة اولادي ماشيه ازاي دي غير الايميلات الدوريه عن كل ما يحدث ويستجد بالمدرسه والتواصل مع المدرسين وهذا اهم جانب للنت معي
الايميلات الخاصه طبعا والبلوج بتاعي
فواتير بيتي كلها بادفعها عن طريق النت
والله فعلا الواحد بقي مدمن ليه وما يقدرش يستغني عنه
بس علي فكره اعتمادهم الكلي عليه هنا ليه عيوبه لما السيستم بيكون داون في اي مكان بيتشلوا وكل الاعمال بتوقف لحين اصلاحه

Mohamed A. Ghaffar said...

كل حاجه فى قانونها حلو

انا خايف النت فى حياتى يتجاوز قانونه

Rsaely said...

و الله يا رانيا دمك زي العسل .. و المواضيع اللى مختاراها حلوه قوى و الكاريكاتير أكثر من رائع..تحياتى


هانى شعلان

Rania said...

ريمو القمر
هتقوليلى انت الى بتقولى عنى مش انا الى بقول عنك ببقى هعيط لو الشغل زاد شوية و معرفتش ادخل نت من الشغل
ببقى هموت مرسيى يا قمر على زيارتك و على فكرة مدونتك تجنن:))

تامر نبيل
مرسيى على زيارتك و على تعليقك و النت بالشكل الى احنا فيه دة بقى مرض و عايزين نتعالج منه

Rania said...

عبد الرحمن جادو
فلوس ايه بس يا عمنا
سيبنى اشرب علشان انسى
ندخل البورصة اة
انما نكسب منها
حاشا و كلا
مش احنا احنا اشرف من كدة بكتير
:((

احمد سمير
مبروك على الويرلس يا عم
هتروح منه فين
,, خلاص بقى واقع

Rania said...

همسات بصراحة عندك حق فى كل الى قلتيه
فعلا لو الواحد حصله حاجة فى الكمبيوتر بتاعة و لا حتى النت فصل
بيبقى خلاص حاسس انه اتشل كل حاجة وقفت الوقت و الزمن

محمد عبد الغفار
حلو ان كل حاجة ماشية بقانون دى
دة ان كان يدل فانما يدل على انك انسان منظم فى حياتك
يا بختك
شرفتنا يا باشا:))

Rania said...

دكتور هانى يا مرحبا يا مرحبا
بجد مبسوطة قوى انك شرفتنى انهاردة
ربنا يخليك دة بس من زوقك
و طبعا ميمنعش انك عندك حق فى كل كلمه قلتها ,, انى فعلا عسل
:))))
يا رب يخليك

khaled said...

واالله دوستى على الوتر الحساس انا زيك كده اقوم الصبح اول حاجه اعمله افتح الكمبيوتر وبعدين اصلى اخد دش اى حاجه وارجع اعد عليه التهمه التهام
ولا بذاكر ولا عنت بروح كليه بقيت قاعد طول النهار قدام المنتديات والبلوجات وبورصه العملات لحد لما جيت فى فتره جالى اكتئاب وحزن وحسيت بوحده غبيه ساعيتها بقه اصدرت قرارا: العلاقات الاجتماعيه ليها الاولويه بجد والله ,دى المشكله الكبيره فى الكمبيوتر ولى يقدر يتغلب عليها يبقى راجل
معلش على الاطاله

REEMOO said...

3andy leky tag ya 2mr
eb2y shofeh fe a5r post :)

3lool said...

الحال من بعضه
الواحد فعلا بيقوم من النوم وصوباعه علي فتح الكمبيوتر وينام برده وايديه بتلعب علي الكيبورد

لذيذ كتير البوست والمدونه كلها

تحياتي

عمار جرار said...

اه والله انا حاسس انه قضيت 98.23% من حياتي قاعد عالنت، ما بين اخبار وثقافة ودردشة ومدونات وبورصة و.. و.. الخ.
بالاضافة الى الاعمال الاساسية وهي برامج الرسم الهندسي لتحضير مادة مشروع التخرج
وحاسس انه نظري بيضعف حبة حبة، والعمود الفقري بينحني حبة حبة،

وفي نفس الوقت احب جلوسي على النت لاني اعتبر النت هو ستوديو التحكم اللي بيجبلي العالم لحد عندي وهو الحضارة والرقي بالمستويات الثقافية والاجتماعية وحتى الاقتصادية..
وصدق المثل القائل: "يا طبطب ودلّع يا يقوللي انا تغيرت عليه"!

Rania said...

حاضر يا ريمو من عينيا الاتنين
ربنا يستر بقى دة انت حتى جايبة حته موضوع هيفكرنى بالذى مضى

علول
مرسيى على الكلمتين الحلوين دول
و مرسيى اكتر لزيارتك لمدونتى المتواضعة

Rania said...

عماد
ايه يا عم الامثال الجميله و الجامدة دى
مش بقولك انت موسوعة
بجد عجبنى المثل و على راى المثل القائل بردة اخاصمك اة اسيبك لا
:)))
هو قديم انما لسه شغال
تحياتى يا عماد

عمارررررررر جرار said...

عمارررررررررر وليس عماددددددد
هما شبه بعض بس مجرد اختلاف حرف السين !
فكرتيني بفريد شوقي لما قال زمان: "انا مش بتاعة الكلام ده، انا كنت طول عمري جامدة" !

Rania said...

هههههههههههههه
ماشى يا عمار
معلش اصلى تقلت فى العشا شوية و مش شايفة قدامى
نعتذر عن هذا العطل الفنى
اتفضل معايا؟
:)

الحصان الأسود said...

فعلا ظريفة الكاريكاتيرات اللي انتي حطاها

و فعلا النت بقى ادمان

وانا من مدمني النت ماقدرش ابعد عنة وممكن اقعد عالنت من الصبح لبليل اكل واشرب وانا عالكمبيوتر ولو فات كام ساعه النت واقع بابقى عامل زي مدمن الهيرويين اللي عاوز شمة

بس انا شايف ان دي ظاهرة صحية و ثقافية طالما ان الواحد بيقضي وقت النت في تصفح مواقع و اخبار ومدونات وحتى لو شات في كلام في موضوع جاد
وليس اتغلال النت في ما يخرج عن الاحترام والادب وتصفح مواقع ممنوعه او البحث عن علاقات مشبوهه

النت زي التليفزيون ممكن تستخدة فيما يفيد وممكن يبقى مفسدة

تحياتي

خالد وليس بخالد said...

حقيقي حقيقي مرض رهيب
وله أعراض وعلامات
التاريخ المرضي: اشترى المريض جهازه البنتيوم فور من 2 سنين وتطور به الامر الى عمل ايميل ودخول منتديات ومسنجر وشات..وانتهخى به الحال الى انشاء مكدونة

الاعراض التي تظهر على المريض
اولا : اثناء اليقظة : احساس بنوافذ مفتوحة..يصحبها صوت مراوح شغالة...وبعد ذلك يشعر المريض بظهور (بوب أب) نوافذ وهمية امام عينية ..نتيجة لوجود هلاوس بصرية
يتبعها شعور ب(refresh) يعني..
بعد شربه قليل من الماء ..او ان يسكبه عليه احدهم
قبل النوم..الشعور بالتهنيج الشديد..لدرجة انه يحدث له شت داون وهو على الجهاز..

الاغراض اثناء النوم..ارتفاع في درجة حرارة الرامات (النفوخ يعني)
رعشة خقيقة تشبه شكشكة موتور البروسيسور
تكتكة في الاسنان..نتيجة احساس المريض بانه في مدونة في القطب الشمالي..وفي رواية اخرى...في القطب الجنوبي

موضوع كويس...وصور طيبة..
اتفضلي الصورة دي
مشابهة لما في موضوعك

http://muslimdoctor.blogspot.com/2007/03/blog-post_13.html

و د م ت م ب ع ا ف ي ة

Rania said...

الحصان الاسود
عندك حق انه بقى ادمان
ربنا يستر مرسيى على زيارتك لمدونتى المتواضعة و الجميله و الى تهوس دى:))

خالد و مش خالد
حقيقى مش عارفة اناديك بمين
ولو انت مش خالد اقولك يا ايه؟
الصورة تجنن
بجد
و بصراحة لو الاختراع دة اتنفذ هتكسب ملايين
و كنت عايزة استشير حضرتك بانى دائما ما اسمع اثناء نومى رنه الباظ
buzz
و ليس فقط اثناء نومى و لكن اثناء سيرى فى الشارع و ربما ايضا اثناء مشاهدتى للتلفاز
عندك حل؟
اوعى تقولى مفيش فايدة
يبقى انت اكيد فى مصر

:((

WHISKEY PUZZLER said...

screens dear, its screens who captured our eyes and ears,interrubted eyes our lives, computers plasma TVs mobile phones,

حصان بري said...

من جهلنا نخطىء و من اخطائنا نتعلم
حلوه قوي الكلمه دي
اول مره ادخلك وعجبي قوي مواضيعك كلها قريبه من تفكيرنا كلنا
فعلا النت اعظم اختراعات القرن العشرين
كانوا بيقولوا العالم اصبح قريه صغيره
مع النت اصبح العالم كله عندك في الاوده
انا برده كنت مريت بفتره ادمان النت
والحقيقه بتبقي بسبب اهمالنا لباقي هوايتنا
وخصوصا ان النت كهوايه مش محتاجه غير كوبايه نسكافيه وكرسي
النت كهوايه ممكن تبقي مفيده جدا اذا استخدمناها صح.
شفتي الكليب اللي فيه واحد قاعد قدام النت والشمس تشرق وتغرب عليه
تنواع الهوايات مفيد اكثر.
كتبتي في البوست اللي فوق انك عازفه جيتار من الدرجه الاولي واحساس وبتاع
ارجعي له
الكاريكاتيرات تحفه بجد.

اجندا حمرا said...

عزيزتي رانيا
اول مره ازور مدونتك و عجبتي اوي و بحييكي عليها و ياريت لو عندك وقت تزوري مدونتي و تقوليلي رأيك ايه
لما اتكلمت عن موضوع النت حست كأنك بتتكلمي عني بالظبط
لاني انا زيك تمام النت حياتي لما بيكون فيه مشكله عندي في النت ياداهيه دوي بيكون يوم اسود و بكون كئيبه موت و كل الي ي البيت بيحسوا بده اول مايشوفوني مكتئبه اول حاجه بيقولها اكيد فيه مشكله في النت
النت مهم و بيخالينا نتواصل مع بعضو نتكلم في بلوجاتنا و نسمع اغاني و نشوف افلام و نتعرف علي حاات م بنقدر نعرفها الا من خلال النت فمهم
بس لما بيزيد عن حده و يقلب بأدمان بتكون مشكله
بتهيئلي انا بقيت مدمنه نت بحاول اقلل شيه بشويه بس مش بقدر و يامسهل
المهم بشكرك علي موضوعك الجميل و بتمني ليكي التوفيق عزيزتي