Wednesday, April 11, 2007

حطم قيودك و اصنع نجاحك




حطم قيودك و اصنع نجاحك
دة كان اسم برنامج تدريبى حضرته ممتاز و فوق الممتاز فى التنمية البشرية
بينى و بينكوا فى الاول مكنتش مقتنعة قوى بموضوع التنمية البشرية
او بمعنى اصح
محستش باهميته قوى
غير اما حضرت البرنامج دة
لقيته علم غريب بيعرض و بيشرح كل ما هو خاص بالذات البشرية
لقيته بيشرح كل جوانب الحياه و كل المواضيع.
البرنامج الى انا اخدته دة
كان بيشرح اهمية تحديد الاهداف فى حياتنا وطرق تحديدها على اسس
و اركان معينه منها بالترتيب الركن الروحانى و الشخصى و الصحى و العائلى
و الاجتماعى و الوظيفى و الترفيهى و اخيرا الجانب المادى و المالى
دى كلها اركان لازم و انت بتحدد اهدافك تبقى فى دماغك و تحددها على الاسس دى
و اتكلم على مهارات التحدى و ان مهما كانت تحدياتك انت بس الى تقدر تتغلب عليها وطبعا
كل حاجة باذن الله
كله نابع منك انت. من ذاتك انت.
وعرض بردة استراتيجية الهدف و العقل الواعى و غير الواعى
و كانت اول مرة اعرف اهميه العقل الاواعى فى حياتنا
دة هو اصلا كل حياتنا,, كل حاجة موجودة فى العقل الاواعى و هو بطبعته بيدى اوامر
للعقل الواعى فى اقل من الثانية
و بعد التحديد الخاص بالاهداف,, تيجى اهميه التخطيط
وانك استحاله هتعرف تحقق هدفك من غير تخطيط كويس.
واسس التخطيط بتقوم على الموضوعية و الشموليه و المرونه و الواقعية و التقدمية و التميز و التنبوء
طبعا و دة كان شامل ان اى حد يحب يفتح مشروع لازم يفكر بالطرق دى
بجد حبيبت قوى التنمية البشرية وسعت ادراكى و مفهومى للحياه
و غير كدة كمان عرفتنى انواع الشخصيات و كيفية التعامل معاها
بجد بحاول ديما اراقب الدورات دى و اى دورة فى اى موضوع بالنسبة للتنمية البشرية
هحاول باذن الله ان اتابعها وا حضرها
بجد مفيدة جداااااا
على فكرة المدرب كان الدكتور/ صفا مصطفى تلميذ نجيب
و ماشى على خطى الاستاذ ابراهيم الفقى
الى بدات اتابع كل برامجة و بردة استفيد منه
كويس ببعد شوية شوية عن النت يا خوانا
شكل كدة الطاقة الى عندى هتتوجه صح
ادعولى

20 comments:

khaled said...

التنميه البشريه بجد حققت اهداف خياليه
قدامى وناس كتير انا اعرفهم اظبطو
ياريت كلنا نستفيد من الموضوع ده

AHMED SAMIR said...

ان شاء الله طاقتك تتوجه يا رانيا زي مانتي عايزة
الكورسات دي فعلا بتكون مفيدة وجميلة بس اهم منها هو تطبيقها ومراجعتها اول بأول
وبعدين تعالي هنا:
طاقة ايه وبتاع ايه؟فين الجيتـــــــــــــار يا هانم؟
احنا مش اتفقنا ان انتي هتبقي عمر خورشيد القرن ال21
وبعدين لو زهقانة من الجيتار....اطلعي البلكونة
هههههههههه
تحياتي ليكي يا رانيا

حصان بري said...

هههههه
من مدمنه نت لتنميه بشريه مره واحده
بيني وبينك انا برضه اول مره اسمع عن التنميه البشريه كنت بقول انا ماشي بدماغي ومش عاوز حد يقولي اعمل ايه وماعملش ايه.
بس بجد لقيت تنظيم الحياه والافكار مهم جدا واهم مافيه انه بيحسسك بقيمه الوقت
مبروك واهم حاجه التطبيق العملي علي حياتك مع الدوره
كيييييييييييب جوينج وماتنسيش الجيتار
والنت طبعا.

Reemo said...

بجد عندك حق يا رانيا الواحد لازم يبعد عن النت شويه شويه
انا اول مره اسمع عن موضوع التنميه البشريه ده
او بمعنى اصح اول مره اعرف ان الكلام اللى قولتيه ده يندرج تحت مسمى التنميه البشريه
انا كنت قريت عنه قبل كده
بس مكنتش اعرف انه تنميه بشريه
بجد يا رانيا انتى شوقتينى اقرى فى الموضوع ده واعرف فيه اكتر
تحياتى

احمد عزام said...

هاي رانيا
الموضوع شيق وبياخد العقل ....انا حاولت كتيير الموضوع ده وفعلا لقيته ناجح تماما
اول خطوه اننا نحدد الهدف
لو عندك مواد للموضوع يا ريت تعرضيها للجميع لتبادل الاستفاده
تحياتي

محمد عبد الغفار said...

ربنا يعينك ويقدرك ، احنا مأمورين بالأخذ بالأسباب وده احدهم

الحقيقه الدكتور ابراهيم الفقى ممتع ورائع وهدور على الدكتور صفا مصطفى واحاول اسمعه هو كمان

بس اهم شئ فى ده كله الفعل فى الأخر ماذا فعلنا او طبقنا مما قاله هذا او ذاك

مصر هى أمى said...

رانيا

فرحتلك اوى بالكورس
ده فعلا التنمية البشرية حاجة هايلة المهم عايزين نشوف تطبيقها على المدونة وممكن تعملى بوستات تلخصى فيها الكورسات ديه ونبقى استفدنا ببلاش

Anonymous said...

hi roroooo
وحشتينى واتمنى فعلا انك تقدرى تطوعى المعلومات الى انتى اخدتيها فى الكورس فى حياتك العملية

Rania Lelah said...

باذن الله يا جماعة انا نويت و النيه لله انزل كل الى اخدته على presentaions
لبور بوينت
و باذن الله كلنا هنستفيد منه
و اكيد باذن الله هطبقة على حياتى العمليه و خصوصا انى عايزة اعمل مشروع بس مشروع ايه لسه مقررتش
بس قررت انى اعمل خطة الاول و احدد شوية اهداف و بعدين ربكوا يسهل بقى
:))

يا مراكبي said...

دي خطوة ممتازة وبأعتبرها أولى خطوات الطريق الصحيح .. ربنا يوفقك

منتظرين منك عرض الموضوع علشان نستفيد زيك

أحييكي

Anonymous said...

افضل مصدر لتعلم الحياة هو الحياة نفسها وليست البرامج والدورات يا رانيا.
انا اخذت كورسات كتير في هالمواضيع بيكون مفعولها كبير بالبداية ولكن بعد فترة بتتنسي خاصة اذا ما تم تطبيقها بشكل مستمر.
تحياتي

Rania Lelah said...

الموضوع يا عمار مش موضوع دورات او كلام فى الهوا
دة واحد بيكلمك عن نفسك بيخليك تكتشف نفسك و قدراتك
و تعرف ان الناس التانية دى مش بتفكر كويس و انت بتفكر احسن منهم الف مرة و على اساس انك خلاص عرفت حياتك و نظمتها
حسيت بقدراتك المختفية و الى بها هتقدر تحس و تفهم الى قدامك و تعرفه كويس
جرب تانى صدقنى هتلاقى كويسة قثوى قوى قوى

Rania Lelah said...

يا مراكبى
اكيد باذن اله حضرتك هعرض الموضوع مفصلا
علشان الكل يستفيد
بس احب اوضح شىء
اول مرة هتكون فرى
مجانا يعنى
بعد كدة هطر اخد رسوم على الموضوع دة ربع جنيه من كل مواطن
اهو الواحد يسترزق بردة
و يبقى دة اول تطبيق من الكورس الى انا اخدته
مرسيى لتعليقك
و يا رب يخليك

حسام مراد said...

بجد التنميه البشريه مفيده جدا
والواحد مش هايعرف كده لما ياخد كورس او يقراء كتاب وهوه يعرف اد ايه قيمتها
والدكتور ابراهيم الفقى ده كان اول واحد اشتريتله كتاب فى التنميه البشريه وله الفضل انه حببنى فى هذا العلم الرائع
عندى سؤال انتى بتاخدى فى (زيدنى)ـ ؟

حسام مراد
شغال

Love & Feelings said...

موضوع تحفه فعلا ، و يا ريت تفيدينا كلنا بمعلومات اكتر ، في انتظار البرزنتاشين بتاعتك على احر من الجمر
تحياتي لكي اختي الغالية و دائما إلى الامام المفيد و برضوا ماتنسيش الجيتتار اصلي بفكر اتعلم انون او بيانو و اهو نسيب النت و نعمل فرقة انا و انتي بقى
تحياتي

خواطر شاب غاضب said...

جميل قوي ان يالاقي حد مهتم بالحرية
بس هي ايه الحربة

Rania Lelah said...

حسام مرادج
لا مش باخد هناك
و مرسيى على زيارتك
و على فكرة انا عرضت الموضوع زى ما وعدت


انجى
مرسيى يا قمر على زيارتك


يوميات شاب غاضب
هو انتوا مش هتسئلوا اسئله سهله بقى
مصر هى امى
يسئلنا يعنى ايه مصر؟
و انت تسئل يعنى ايه حرية
؟
مفيش اختيارات يا جماعة
مرسيى على زيارتك

citizenragab said...

بصراحه بحس ان موضوع تنمية الموارد البشريه ده جزء كبير منه نصب
وإبراهيم الفقي نفسه نصاب

MaMaDo said...

التنميه البشريه
بجد حاجه جمده اوى اوى
انا لما كان اصحابى بيقولو لى عشان اروح معاها التنميه كنت بنفض بس لما احضرت اول محضره
بصرحه بقيت اكتر واحد فيهم بروح

لان بجد يمكن المحاضره دى غيرت مسار مستقبلى الى كنت شايفه مظلم

تحياتى

Anonymous said...

برجاء زيارة موقعنا للتنمية البشرية

www.safamostafa.com