Tuesday, April 24, 2007

اختار رقمك يا معلم

اختار رقمك يا معلم
بجد بجد لعبوها صح
حركة جامدة بجد و دعاية عن حق
انا طبعا هنا بتكلم عن الشبكة التالته للمحمول
و الى دلوقت منزله خاصية جديدة
انك ممكن تحجز رقم خطك و الى يعجبك عن طريق الموقع بتاعها
هأأأأأأأأو
هما عارفين ان الشعب المصرى يموت فى المنظرة و يموت فى الحاجة الغريبة
ابويا دخل عليا مرة و قالى بت يا رونا
قلتله اينعم يا ابتى
قالى واحد صحبى ورانى رساله عندة بيتقوله انه حجز رقم خط فى الشبكة التالته و ايه
كمان اختارة بنفسة و اختارة شبة رقمه الاولانى ما عدا رقم
بينى و بينكوا يعنى مع احترامى لابتى
بس مش عارفة بصتله بصة غريبة قوى
قالى بتبوصيلى كدة ليه يا بنت ال................ ما علينا ما علينا
المهم قلتله عادى
قالى ادخلى و شوفى الموضوع و احجزيلى خط
دخلت الموقع لقيت
فعلا الكلام الى بيقوله صح
قلت ابص لقيت ارقام و بيقولك اختار الرقم الى انت عايزة
و مقسمنهم ارقام فضى و ارقام ذهبى
تقريبا الذهبى ب 15 جنيه
و الفضى ب 10 جنيه
انا قلت خلينا فى الرخيص
و طبعا جة فى دماغى الاخ احمد سمير و الى اشترى خطة ب 1200
انا مش بقول كدة لا سمح الله لا علشان اغيظة ولا افرسة انا مش كدة
:))))
دخلت و اخترت رقم و لقيت الموضوع عادى انك بتحجز الرقم
و فى خلال 6 اسابيع بتروح تشتريه
بجد بجد عجبتنى الدعاية قوى فكرة جهنمية تحس انهم درسوا الشعب صح
عرفوا هو بينبهر بايه
و بينى و بينكوا الى غظنى الناس الى بتنبهر
و بتروح تغيظ بعضها انها خلاص حجزت رقم و الى على مزاجها
و يااااااااااااا يا ما نعيش يا ما نشوف و عجبى
و اخيرا و ليس باخر حبيت اهنىء ابتى و اقوله
مبروك الخط عليك يا ابتى

11 comments:

احمد عزام said...

هاي رانيا
والله موضوع الارقام ده واضح انه حاله نفسيه منتشره بين العرب عموما
انا شخصيا لاحظت ده في نفسي
ابتداء من اني كنت في مصر عندي خطين واحد كليك وواحد موبينيل بنفس الرقم
وحتي هنا في الامارات عملت زي بابا وصاحبه بالظبط وحجزت نفس الرقم برضه علي الشبكه الجديده
وحاولت اجيب رقم عربيتي يكون مميز او علي الاقل اختاره بنفسي
بيني وبينك (انا نفسي اخلف ولد يكون تاريخ ميلاده نفس تاريخ ميلادي )
مبروك الرقم لبابا

محمد عبد الغفار said...

ولسه دول هيقشطوا الشعب كله بالوهم

خواطر شاب غاضب said...

انتي منش بتزوري مدونتي ليه

Rania Lelah said...
This comment has been removed by the author.
الحصان الأسود said...
This comment has been removed by the author.
khaled said...

انا بقه قاعدت يجى نص ساعه اكتب ارقام ويقولى محجوزه
ده تهريج

الحصان الأسود said...

هههههههه انا مع كلام محمد عبد الغفار بس هوة فية سؤال عندي

هوة الشعب لسة ماتقشطش يا سي محمد

أم نبيل و فودة فون و زيرو تسعمية و رنات ونغمات ولوجوهات و مسابقات ومخالفات العربيات و فواتير الكهرباء و المياة و النضافة و التليفونات و غيرة و غيرة
مقشطين الشعب أول بأول ومن زمان قوي

تحضرني كلمة قديمة قالها كارتر للسادات ايام كامب ديفيد لما السادات قاللة احنا عاوزين معونة
كارتر قاللة معونة لية يا سادات دة انتوا في مصر اغني بلد في العالم

السادات قاللة ازاي بقى يا كارتر

فقاللة طبعا انتوا اغنى بلد, برغم كل السرقة والهبش و الاستغلال لكن لسة الشعب معاه فلوس و عايش

ييجي كارتر يتفرج النهاردة

تحياتي

AHMED SAMIR said...

اللي اداكي يدينا يا ست رانيا
انا كمن الحمد لله حجزت رقم ذهبي...بس مش عارف الرقم الدهبي دة هيكون لونه اصفر ولا ايه؟
بس ايه البوستات النار دي...كل يوم بوست بقى ولا ايه؟احنا مانقدرش على كدة
تحياتي ليكي

Rania Lelah said...

احمد عزام اتمنى انك ربنا يرزقك بولد نفس تاريخ ميلادك
هههههههههه
انا نفسى بقى اجيب عربية من غير رقم بس تيجى:((

محمد عبد الغفار
عندك حق انا الايام دى كل ما اشوف واحد يقولى انت حجزتى و لا
و لو قلتله لا يقولى معقوله؟؟؟؟؟؟؟؟؟؟؟
اكنى يعنى جاية من كوكب زوحل مثلا
منور

خالد
معلش خليها عليك المرة دى
جرب تانى و احجز
بس انا سمعت ان فى رسوم على الموضوع
و سمعت كمان ان ممكن يكون رسوم الحجز توصل ل 1000 جنيه غير سعر الخط الى هو تقريبا ب 15 جنيه:))
و الله اعلم

الحصان الاسود
شرفتنا يا باشا
على رايم يجى كارتر يشوف هيييييييييه
دنيااااااااااااا

احمد سمير
المعلم الكبير مساء السكر و يا ترى حجزت خطك بكام
حكم انت بقيت لقطة
ههههههههههههه
طبعا بهزر
ربنا يوفقك
:))

Anonymous said...

اهي الشركة التالتة طلعت مقلب كبييييير بعد ما نزلوا أسعارهم ..
والشركة التالتة هتاخد مقلب واصلاً محدش هيحولها ..

maioya said...

والله هيا لعبتها صح في الاول
بس اعتقد انها فقدت شويه من مصدقيتها
لانها قلبت الاسعار بعد كده
وده اسمو لعب عيال هما كانوا بيجسوا نبض ولاايه
مانخلينا في المضمون
مالها فوداافون ولاموبينيل اهم علي الاقل حفظناهم
بلا خط جديد بلا بتاع
الواحد حاسس انه هايفتح سنترال