Sunday, March 4, 2007

الاعلام و الاستفزاز

بصراحة و بكل صراحة على راى الاغنية القديمة

الواحد دلوقت اما بيقعد يتفرج على التليفزيون

بقى بيتحرق دمة بجد

كل ما تقلب على اى قناه يتحرق دمك

طبعا اولها المسلسلات الى لما بتتفرج عليها تحس ان مصر دى بقت من دول العالم الاول و احنا ولا نعرف و لا على بالنا

الناس بتتكلم على صفقات بالملايين الدولارات

و العمولات الى بردة بالملايين

هو ايه يا خويا دة؟؟؟؟؟؟؟؟

فين الحاجات دى مش بنشوفها يعنى

الى بشوفه عن نفسى يعنى

شباب مطحون ليل و صبح فى دكان بقاله علشان بس يحوش مبلغ و يروح ياخد دورات تدريبية لعل و عسى يلاقى شغلانه عليها الطله

و الى بشوفه كمان

اب بيصحى من الفجر علشان يروح يشوف اكل عيشة علشان يعرف يصرف على اولادة

و بشوف كمان ام بتعمل 3 جمعيات من ام 10 جنيه زى ما بتقول

علشان تعرف تساعد الاب و تجيب لبس العيد للعيال

طب ليه يا ام العيال الحوسة دى ؟

تقولك علشان اساعد ابو محمد فى المصاريف و نجيب لبس للعيال و نبسطهم و نجبلهم اللحمة

لا اله الا الله

امال فين بقى نظام الصفقات بالملايين مش بشوفها يعنى

و لا دى لها ناسها

هو دة الاعلام و الى بيعمله ,الاستفزاز؟؟؟؟؟؟

استفزاز الطبقات الفقيرة

واقناعها بالقوة و القهر ان السرقة هى الى بتجيب الفلوس و الملايين الى بيتفوجوا عليها دى.

و طبعا فى الى بيقفلها و يستعيذ بالله من الشيطان و منهم الى بيتفرج بعمق علشان يعرف الطريقة

تفتكروا المواطن ناقص يسخط على الحكومة و البلد اكتر من كدة

؟؟؟؟؟؟؟؟؟؟؟؟؟؟

معتقدش< هما ساخطين بما فية الكفاية اساسا

لا و لا ايه الاغانى الشعبية المؤثرة و غير المؤثرة و المعبرة و غير المعبرة ؟

و الكليبات الممتازة و غير الممتازة و العارية و غير العارية

oopse

سورى معلش نسيت العارية بس

و لا الكلمات يا هوووووووو

ردح و قله ادب و معانى لا تمت للغة بشىء و

ميحكمش؟

فى بنى ادمة يا ناس تعمل اغنية اسمها ميحكمش؟

امال ايه الى يحكم يا اختى؟

اركب الحنطورواتحنطر؟

يا نهار

مفيش اغنية تانية تعبر عن حال الشعب المصرى مثلا تقول اركب التوك توك واتك تك

اغانى بقت غريبة و الى يغيظ الواحد ان الشباب دلوقت بقوا مقبلين على الموضوع دة بطريقة غريبة

بقى اسهل طريق للشهرة

ما اهو انت هتعمل اغنية الناس هتشوفك ,,الاغنية هتطلع هايفة و هتعمل بلبله فى الصحف القومية و غير القومية

المنتجين هيخطفوك تعملك فيلم تاخد فيه كدة

فكرة بردة ؟؟؟؟؟؟

بجد بقى استفزاز من كله

منكرش ان فى برامج هادفة و جميله بجد حلوة قوى بس مش كتير, الاكترية هى الحاجات المستفزة دى. بجد الواحد بقى بيضايق قوى

طبعا يقولك

معاك الريموت اقلب

طب اقلب على ايه يا اخوانا؟

ما هو كله كدة

و المفروض مين الى يغير احنا الشعب الى نغير؟ و لا الاعلام هو الى يغير سياسته

يغير الافلام الهايفة و الى بتثير الغرائز و بس

يغير المسلسلات الرخمة و السخيفة و الى تحرق الدم دى و يغييروا

الكليبات السخيفة و العارية و الكلمات السخيفة الى بتتقال دى معنتش بتدى اى معنى مفيد و الى بقى الاطفال بيرددوها من غير وعى

و يزودوا شوية من البرامج الهادفة والموضوعية و الى بتتكلم عن المجتمع و كيفية التكيف معاه

انما ايه الى بيحصل دة؟

حاجة غريبة على راى الاغنية الشعبية الجديدة الى لسه سمعاها امبارح و الى اتاثرت جدا بمعناها

هتزعلنى هزعلك

هتجرحنى هجرحك

هتكسر؟

هنكســـــــــــــــــر

و عجبى


7 comments:

شخبطة ملوكى said...

جميل يا رانيا و الله
استفزتينى و خليتنى اتقهر تانى و تالت و رابع
بجحد استفزيت و مش عارف افتكرت ليه الاستاذ اللى نعت الاعلام المصرى بالاعلام الوهابى و يومها كنت فطسان على روحى من الضحك
انما لما افتكرت النهارده اتغاظت سبحان الله مش عارف انا البلاوى اللى بتتحدف علينا دى حتى الكام برنامج الدينى اللى اصبحوا عمله نادرة على التليفزيون مستكترينهم و خلوا الاعلام بسببها اعلام وهابي
http://almamlouk.blogspot.com/2007/03/blog-post_04.html

Abd El Rahman said...

طب ما تريحوا دماغكوا وتتفرجوا على روتانا سينما او اي ار تي حكايات ! انتم اللي غاويين وجع قلب !

mermaid said...

ما هو لازم الاعلام بتاعنا يكون اعلام هايف كلة اغانى وكلام فاضى امال عيزنهم يجبلكوا الحقيقة ويفتحوا عنيكوا المغمضة لازم يخلوا الشباب اعد طول الليل يحلم بهيفاء وغيرها من المغنيات علشان ميبصش للبيحصل حولية شىء عادى وطبيعى الغير عادى انك تلاقى شىء محترم او هادف

rania said...

مرسيى استاذ طارق
كلنا مقهورين

rania said...

مرسيى ليك عبد الرحمن بس انت عايزنا نتفرج على حكايات ماشى الكلام يا عم
نروح ندفع 200 جنيه علشان نتفرج على مسلسلات معتقة
و لا نتفرج على روتاناسينما مش هتقدر تفتح بقؤؤك
مرسيى على المشاركة

rania said...

مرسيى ليكى ميرميد
عندك حق تقريبا بقى الموضوع كدة

koukawy said...

ليكي حق بالصراحه مش ناقصاهم
و بمناسبة الكليبات و الأغاني انا كتبت بوست اسمه
انا هعبّي شريط